2 Hamonei auꞌuaiaa haiꞌou laloo naranaraa hamuꞌou. Lomi haiꞌouna bigifafelo aꞌa hemeadiai, lomi haiꞌouna fapasiaa hemea, lomi haiꞌouna sifiꞌaa hemea ba haiꞌouꞌaa to manumanu wagina. 3 Abaa a ware aleꞌei ba a warefafeloaa hamuꞌou hamatee unadii ware ba hamonapaꞌaa oa laloo naranaraa haiꞌou ma lomi manumanu nabaa haiꞌouꞌaa gutafipui aꞌa hamuꞌou o maꞌefipui aꞌa hamuꞌou. 4 Una oꞌugaa hamuꞌou; unamina mamagugu aꞌa hamuꞌou. Namina rarawani naranarau; aꞌa minaa ei hafeloꞌa na nobapaꞌamii haiꞌou, ei niꞌeniꞌeau na fuaꞌonau.

5 Uaa ei haiꞌou sufudaimai yei Macedonia, lomi haiꞌouna gutafawenai, maꞌuaa haiꞌouna momoꞌainaa hitani, ei hafeloꞌa na bapaꞌaa haiꞌou ma ei maꞌaua laloo naranaraa haiꞌou. 6 Maꞌuaa mei Haidaa, mei naꞌo farawaninaa ei naranaraa ei rona oafafelo, na fahaweninaa haiꞌou aꞌa fei noramiaa Titus 7 ma abaa fei noramiana ua, maꞌuaa fei ba hamona farawaninia anaa. Ina uꞌufanaa haiꞌou ba hamonapaꞌaa nunuminau ma hamonamina faloloaꞌi ma naranara watauda uaa yau. Ma aꞌa eꞌei, namina apoidiai fei niꞌeniꞌeau.

8 Nabaa una famamalouaa iaa hamuꞌou aꞌa fei neꞌiau mina, lomi una faloloaꞌi wagina. Maꞌuaa una faloloaꞌi hamatee na aida ba fei neꞌiau na famamalouaa iaa hamuꞌou maꞌida ua au, 9 maꞌuaa eꞌeni, una niꞌeniꞌe. Fei paꞌafina aꞌa ba hamona faloloaꞌi, maꞌuaa sifei ba wagii fei faloloaꞌiaa hamuꞌou, hamoꞌaa filoginaa naranaraa hamuꞌou. Uaa hamonawe faloloaꞌi aleꞌei fei ude nunumiaa mei Haidaa ma siꞌei, aꞌa ba haiꞌouna fafeloaa hamuꞌou maꞌida. 10 Ma i pudaa mei Haidaa, ei faloloaꞌiaa ei ramaꞌa wagii ei hafeloꞌaa roꞌou, i fafiloginaa naranaraa roꞌou ma noduginaa roꞌou aꞌa fei telaꞌana ma lomi roꞌaa naranara watauda wagina, maꞌuaa fei mau faloloaꞌiaa feni ano i fani maꞌea. 11 Maꞌaia ba fei faloloaꞌia aꞌa mei Haidaa na biginaa nunumiaa hamuꞌou ba hamoneipaꞌaa faꞌuai, lomi tataa hamuꞌou, hamona siba aꞌa ei hafeloꞌa, ei hamona baꞌarofomaꞌau wagina ma ana ina biginaa hamuꞌou ba hamona narapaꞌaa hefiꞌadiai ma refurefu aꞌa ei na wanewane. Aꞌa minaa ei manumanu, hamona famaꞌaia ba lomi tataa hamuꞌou wagii fei ba i aꞌa hamuꞌou, hamona fawanewaneaa mei na bigifatata. 12 Siꞌei, fei paꞌafina ba una neꞌinaa aꞌa hamuꞌou, aꞌa ba mei na bigifatata, o mei na tonaa awatana wagina, maꞌuaa sifei ba i pudaa mei Haidaa, hamonei fanunupaꞌia ba hamonapaꞌaa nunuminaa haiꞌou. 13 Aꞌa minaa eni namina mamalawia naranaraa haiꞌou.

Ma pafoo fei, haiꞌounapaꞌaa unuwenuwe wagii fei niꞌeniꞌeaa Titus, uaa minaa hamuꞌou, hamona farawanidinaa fei spiritina. 14 Una warefaꞌagu aꞌana uaa hamuꞌou ma lomi hamona famamafaiau. Maꞌuaa ana aleꞌei ba na faꞌua minaa ei wareaa haiꞌou aꞌa hamuꞌou, ana na faꞌua ei warefaꞌaguaa haiꞌou hamuꞌou aꞌa Titus. 15 Ma fei haguana aꞌa hamuꞌou namina nogipelao ei i nonomipaꞌia ba minaa hamuꞌou na guaitonaa ei wareana ma taufagutania fininaa honua ma maꞌaua. 16 Una niꞌeniꞌe ba unamina oꞌugaa hamuꞌou.