3 Lomi ba haiꞌouꞌaa lawaraa talaa nemeadiai ba ei ramaꞌa, roneiꞌaa fanunufahafelo aꞌa fei bigiꞌaa haiꞌou. 4 Agia, hamatee haiꞌou nafii mei Haidaa, haiꞌounamina warefarawaninaa ana haiꞌou aꞌa minaa ei tala: wagii fei baua apitaia, aꞌa ei hafeloꞌa, aꞌa ei rarabaa ma ei i fafiꞌiaa naranara, 5 aꞌa ei hafuhafu, aꞌa ei boboꞌaia, aꞌa ei baꞌananarai pani, aꞌa ei waiwaiaa bigiꞌa, lomi haiꞌouna tofarawani maꞌigua na poi, aꞌa ei baoa, 6 wagii tamanu na fafaꞌarai, tamanu ei apaꞌa, fei fawiwiꞌaia ma fei mau farawania; aꞌa fei Spiriti Apuna ma aꞌa fei paꞌaa hagua; 7 aꞌa fei faꞌua warea ma fei faufau mei Haidaa fininaa ei finefinee wanewanea aleꞌei ei hio, ei na panaronaa wagii guei pani maꞌau ma mauwii, 8 aꞌa tamanu na paꞌi hawerana ma ei na famamafa, aꞌa ei na fani rawaniꞌa haraa haiꞌou, o hafeloꞌa haraa haiꞌou. Haiꞌounapaꞌaa faꞌua, maꞌuaa ei ramaꞌa, rona nara ba haiꞌou sifisifi ramaꞌa; 9 rona apaꞌaa haiꞌou, maꞌuaa rona ware ba lomi rona apaꞌaa haiꞌou; ana haiꞌou bimaꞌe, maꞌuaa haiꞌouna gutalao; rona hafugaa haiꞌou, maꞌuaa lomi haiꞌouna maꞌe; 10 haiꞌouna faloloaꞌi, maꞌuaa haiꞌounaꞌu niꞌeniꞌe; lomi manumanuu haiꞌou, maꞌuaa haiꞌouna panii arerei aꞌa watauda; lomi manumanuu haiꞌou, maꞌuaa minaa ei manumanu, haiꞌouna paꞌi.

11 Haiꞌouna warefaꞌaꞌa ua aꞌa hamuꞌou ena Corinth ma namina bauanai ei naranaraa haiꞌou aꞌa hamuꞌou. 12 Haiꞌouna haguaa hamuꞌou, maꞌuaa lomi hamona haguaa haiꞌou. 13 Ba inei fiminaꞌei, a ware aꞌa hamuꞌou aleꞌei ba hamuꞌou naꞌuu—ana hamonei haguaa haiꞌou.

14 Apuna hupuꞌaifipui ei abaa narafaweꞌia. Uaa fei wanewanea ma fei hafeloꞌa lomi i bigifipui. Ma batanai ba fei weꞌai ma fei roromaa, i oafipui? 15 Batanai ba laguꞌaa gutafipui Christ ma Belial?^a Ma batanai ba laguꞌaa hupuꞌaifipui mei narafaweꞌia ma mei loꞌe? 16 Batanai ba i udefipui fei humuu mei Haidaa ma ei haidaa sifisifi. Uaa, oꞌou fei humuu mei Haidaa, mei fi oalao. Ana aleꞌei na wareia mei Haidaa ba, “Awe oafipui aꞌa roꞌou ma talai dupuaa roꞌou ma oanaa Haidaniaa roꞌou ma roꞌou maroau.”^b