Fei Gufuu Oꞌou Pafea
5
Ma ona aida ba ei hudi unuu oꞌou aleꞌei ei pale, ei ona guta wagina. Ma nabaa na wataꞌoꞌo, ona paꞌi hepalodiai aꞌa mei Haidaa, hepalo pale lomi i pedutoo i pafea. Abaa faduaa ramaꞌa. 2 Eꞌeni oi aiꞌai ma nunumiai ba oꞌaa papainaa fei lawalawa aꞌa fei gutanaa oꞌou pafea, 3 uaa ena ona lalawai, lomi ba oꞌaa alawata. 4 Hamatee eni oi guta wagii eni pale eni, ona aiꞌai ma tonaa awataa, uaa lomi ona nunumiai ba oꞌaa alaꞌala maꞌuaa ba oꞌaa papai lawalawaa pafea ba fei unuu maꞌea nei filoginaa harenua. 5 Mei Haidaa na famamaraiaa oꞌou aꞌa fei ma na fanidigaa oꞌou fei Spiriti aleꞌei uniꞌuni aꞌa tamanu iwe nomai.6 Siꞌei, ranimai ona oꞌugi ua ma aida ba nabaa oꞌou yeni aꞌa eni pale eni, eni hudi unu eni, lomi ona oa aꞌa mei Fasu. 7 Ona tatalai wagii fei narafaweꞌia ma abaa tamanu ona fanunuia. 8 A ware ba oꞌouna oꞌugi ua ma nunumiau ba a faraua aꞌa feni hudi unuu ma dinaa aꞌa mei Fasu. 9 Siꞌei, nunumiaa oꞌou ba onei faniꞌeniꞌeia nabaa oꞌou yeni aꞌa eni hudi unu, o loꞌe. 10 Uaa minaa oꞌou, onei u i maꞌaa fei gutanaa Christ, mei fadududua ba hememea nei to ponoꞌana aꞌa tamanu na bigiꞌia ei fi guta wagii fei hudi ununa—ba rawaniꞌa o hafeloꞌa.
Fei Bigiꞌaa fei Fawanewaneaa Watola
11 Siꞌei ba haiꞌouna aida ba batanai fanaa maꞌaua aꞌa mei Fasu, haiꞌouꞌaa hofeaa ei ramaꞌa. Fei maumau haiꞌouna arewa aꞌa mei Haidaa ma nunumiau ba ana nei arewa aꞌa ei naranaraa hamuꞌou ba abaa haiꞌou sifisifi ramaꞌa. 12 Abaa haiꞌouꞌei warediai ba haiꞌou rawaniꞌa ramaꞌa, maꞌuaa nunumiaa haiꞌou ba hamoꞌaa mamagugu aꞌa haiꞌou ba hamonei paꞌi talaa wareaa hamuꞌou aꞌa ei rona mamagugu aꞌa tamanu rona fanunuia laraa tamanu na ude laloo fei naranara. 13 Nabaa hamona nara ba haiꞌou poapoa, manumanuu mei Haidaa; ma nabaa hamona nara ba lomi haiꞌouna poapoai woro ba i farawaninaa hamuꞌou. 14 Uaa fei haguaa Christ na farefuaa haiꞌou, uaa haiꞌouna aida ba hemea ua na maꞌe aꞌa minaa ei ramaꞌa ma siꞌei, minaa ei, rona tonaa fei maꞌeana. 15 Ma ina maꞌe uaa minaa ei ramaꞌa ba minaa ei roꞌaa gutaguta, roneiꞌaa guta ba roꞌaa farawaninaa ana roꞌou, maꞌuaa, ba ronei farawaninaa mei na maꞌe ma asiꞌadiai uaa roꞌou.
16 Siꞌei, eꞌeni ma nolao, fei fanunuaa haiꞌou ei ramaꞌa, abaa aleꞌei fei fanunuaa feni ano. Mina, haiꞌouna fanunuaa Christ aleꞌei, maꞌuaa loꞌe haiꞌouna bigidinia. 17 Siꞌei, hini i oa aꞌa Christ, hia aleꞌei manufau waninia; na paꞌaidii fei watanai; na nomai fei manufau! 18 Minaa eꞌei, noranamai aꞌa mei Haidaa. Ma ina fawanewaneaa watolana ma oꞌou uaa Christ ma fanaa haiꞌou feni bigiꞌa ba haiꞌounei faꞌarewaiaa feni 19 ba mei Haidaa na fawanewaneaa watolana ma ei ramaꞌaa feni ano uaa Christ ba lomi i narapaꞌaa ei hafeloꞌaa ei ramaꞌa. Ma ina fifaninamii aꞌa haiꞌou feni uꞌugaa feni fawanewanea watolaa mei Haidaa ma ei ramaꞌa. 20 Siꞌei, haiꞌou aleꞌei umuiaa umuu Christ, aleꞌei ba na biginaa haiꞌou mei Haidaa. Siꞌei, aꞌa Christ, haiꞌouꞌei iꞌigifaweꞌi aꞌa hamuꞌou ba hamonei fawanewaneaa watolaa hamuꞌou ma mei Haidaa. 21 Mei Haidaa na bigiꞌia ba mei lomi hafeloꞌana nei tonaaa ei hafeloꞌaa oꞌou ba onei wanewane i pudaa mei Haidaa.