Rawaniꞌa Manumanu Laloo ei Peꞌi
4
Lomi na asisi naranaraa haiꞌou aꞌa feni bigiꞌa haiꞌouna paꞌi uaa fei faloloaꞌiaa mei Haidaa. 2 Agia, haiꞌouna momoꞌai aꞌa ei bigiꞌopaꞌaia ma ei i famamafaiaa haiꞌou; lomi haiꞌouna sifisifi, ana lomi haiꞌouna filoginaa fei wareaa mei Haidaa. Agia, aꞌa fei ba haiꞌouꞌaa faꞌarewaiaa tamanu na faꞌuai, haiꞌouna farawaninaa ana haiꞌou aꞌa minaa ei ramaꞌa i pudaa mei Haidaa. 3 Ma nabaa na hawaiꞌopaꞌai fei rawaniꞌa wareaa haiꞌou, ina hawaiꞌopaꞌai aꞌa ei roꞌei paꞌailao. 4 Mei haidaniaa feni au eꞌeni na tapuꞌaa naranaraa ei abaa narafaweꞌia ba roneiꞌaa fanunupaꞌaa fei weꞌai fei rawaniꞌa wareaa fei haweraa Christ—mei paꞌaa haduoo mei Haidaa. 5 Uaa, lomi haiꞌouꞌaa uꞌugaa ana haiꞌou maꞌuaa Jesus Christ, hia mei Fasu ma haiꞌou aleꞌei nafii hamuꞌou, uaa Jesus. 6 Uaa mei Haidaa, mei i ware ba, “Inei weꞌa fei weꞌai laloo fei roromaa,” hia na faweꞌaiaa fei weꞌaina laloo iaa haiꞌou ba i fanaa haiꞌou fei weꞌai fei apaꞌaa fei haweraa mei Haidaa i pudaa Christ.7 Maꞌuaa haiꞌouna paꞌi feni paꞌaa rawaniꞌa manumanu laloo iaa haiꞌou aleꞌei ei peꞌi ua ba i famaꞌaiaa fei baua faufau noramiana aꞌa mei Haidaa ma aꞌa ba haiꞌou. 8 Namina fitaninaa haiꞌou, maꞌuaa lomi haiꞌouna marata; haiꞌouna hamamagua maꞌuaa lomi haiꞌouna rawaꞌaꞌafai; 9 haiꞌouna tonaa haperararaia, maꞌuaa lomi na diꞌininaa haiꞌou mei Haidaa; rona foꞌafapasiaa haiꞌou, maꞌuaa lomi haiꞌouna maꞌe. 10 Ranimai, haiꞌounaꞌo talaiporoꞌaa fei maꞌeaa Jesus aꞌa ei hudi unuu haiꞌou ba fei harenuaa Jesus ana nei arewa aꞌa ei hudi unuu haiꞌou. 11 Uaa, eꞌeni, haiꞌouꞌei werawera, maꞌuaa ronaꞌaida fifaninaa haiꞌou aꞌa fei maꞌea, uaa Jesus, ba fei harenuana nei arewa aꞌa eni hudi unuu haiꞌou, ei unuu maꞌea. 12 Siꞌei, fei maꞌea fi foraiaa haiꞌou, maꞌuaa fei harenua fi foraiaa hamuꞌou.
13 Ina neꞌidii ba, “Una narafaweꞌi; siꞌei una ware.” Wagii fei spiritii fei narafaweꞌia, haiꞌouna ware, 14 uaa haiꞌouna aida ba mei i faꞌasiꞌanaa mei Fasu Jesus aꞌa fei maꞌea, ana iwe faꞌasiꞌanaa haiꞌou aꞌa Jesus ma hupuꞌinaa haiꞌou aꞌa hamuꞌou inamoana. 15 Minaa eni aleꞌei fararawanii hamuꞌou ba fei rawaniꞌa, fei fi talenaa aꞌa watauda neimina fawareaa watauda ba ‘ta’ ma ba i tonaa hawera wagina mei Haidaa.
16 Siꞌei, lomi na asisi naranaraa haiꞌou. Maꞌuaa faꞌua ba ei hudi unuu haiꞌou fi hafelolao, maꞌuaa ina farawaninaa laloo iaa haiꞌou aꞌa hepapalo arewaa. 17 Uaa eni awataa eni na papaa ma lomi i madii, eni fi bigifanaa haiꞌou fei hawera lomi i pedutoo, fei namina awatadiai laraa minaa ei. 18 Siꞌei, lomi haiꞌouna narapaꞌaa tamanu haiꞌouna fanunupaꞌia eni maꞌuaa ei lomi haiꞌouna fanunupaꞌia. Uaa tamanu ona fanunupaꞌia, manumanuu eꞌeni ua, maꞌuaa ei lomi ona fanunupaꞌia, lomi i pedutoo.