3
Eꞌeni, lomi haiꞌouꞌaa ware ba haiꞌouna rawani. Ana lomi haiꞌou aleꞌei hefiꞌadiai ba haiꞌounei paꞌi neꞌia i dinaa aꞌa hamuꞌou o nomai aꞌa hamuꞌou ba haiꞌou rawaniꞌa. 2 Ana hamuꞌou ua aleꞌei hepalo neꞌia, hepalo na ude laloo iaa haiꞌou ba minaa ei ramaꞌa nei igoia ma apaꞌia. 3 Hamona famaꞌaia ba hamuꞌou aleꞌei fei neꞌia noranarai aꞌa Christ ba sifei fei fuaa fei bigiꞌaa haiꞌou. Ma fei neꞌia fei, abaa neꞌiaa roꞌou nanaꞌi, maꞌuaa aꞌa fei Spiritii mei Haidaa, mei fi oalao ma ana lomi na waꞌa pafoo naꞌa, maꞌuaa laloo naranaraa ramaꞌa. 4 Na paꞌi oꞌugiaa haiꞌou i pudaa mei Haidaa uaa Christ. 5 Abaa haiꞌouna bigipaꞌi ana haiꞌou, maꞌuaa haiꞌouna bigipaꞌi uaa mei Haidaa. 6 Ina fabigipaꞌaa haiꞌou aꞌa fei manufau fiꞌugaia, fei abaa paꞌafina fei neꞌia maꞌuaa fei Spiriti; uaa fei neꞌia na fani maꞌea, maꞌuaa fei Spiriti na fani harenua.
Fei Haweraa fei Manufau Fiꞌugaia
7 Nabaa fei bigiꞌa wagii fei neꞌia pafoo naꞌa na paꞌi maꞌea ma na nofininamii fei hawera ba ei Israel, lomi ro araiaa pudaa Moses hamatee fei hawerana, fei fi mafofolao, 8 haa, lomi ba na muaidinia fei haweraa fei bigiꞌaa fei Spiriti? 9 Nabaa na paꞌi hawerana fei bigiꞌa, fei na uniaa ei hafeloꞌaa ei ramaꞌa, poꞌo batanaidiai haweraa fei bigiꞌa na fani wanewanea! 10 Uaa fei nadoꞌo paꞌi hawerana mina, lomi i paꞌidiai laraa fei na paꞌi baua hawerana. 11 Ma nabaa fei na mafofo na nofininamii fei hawera, poꞌo batanaidiai haweraa fei na oalao!
12 Siꞌei ba na oꞌonai unuu oꞌou aꞌa fei, onamina lauguꞌua. 13 Aꞌa ba oꞌou aleꞌei Moses, mei na hawainaa pudana ba ei Israel neiꞌaa fanunuia ei fi mafofolao fei hawerana. 14 Maꞌuaa na lalawaꞌai naranaraa roꞌou, uaa nopaꞌamii wagieni, fei hawaa puda, ana fi ude ei roꞌaa igoaa fei watanai fiꞌugaia. Atawe lelegi, uaa aꞌa Christ ua i lelegi. 15 Wagieni anaa, nabaa roꞌaa igoaa ei neꞌiaa Moses i lalawaꞌai naranaraa roꞌou. 16 Maꞌuaa nabaa nemea i momoꞌainaa aꞌa mei Fasu, fei hawa i lelegi. 17 Mei Fasu, hia fei Spiriti ma fawelei na oa wagina fei Spiritii mei Fasu, ei ramaꞌa, roꞌaa ala. 18 Ma oꞌou eni lomi na hawai pudaa oꞌou. Ma ona faꞌarewaiaaa fei haweraa mei Fasu ma filogii aleꞌei maumauna wagii fei hawera, fei fimina nogipelao, fei noramiana aꞌa mei Fasu, mei hia fei Spiriti.