2
Siꞌei, una naradii ba uneiꞌawii maꞌadinaa hamuꞌou ma fani fiꞌiaa hamuꞌou. 2 Uaa, nabaa a fafaloloaꞌinaa hamuꞌou, hinidiai i faniꞌeniꞌeau. Haa, abaa ana hamuꞌou ena una fafaloloaꞌinaa hamuꞌou? 3 Una neꞌi aleꞌei famaꞌa ba ena na nomai, lomi i bibiyei naranarau aꞌa hamuꞌou, hamuꞌou ena ba hamoꞌaa faniꞌeniꞌeau. Uaa una aida ba nabaa una niꞌeniꞌe, ana hamoꞌaa niꞌeniꞌe. 4 Uaa una naranara watauda ma na fiꞌi naranarau eni a neꞌinaa feni fininaa pasiaa ranuu pudau aꞌa hamuꞌou. Abaa a fanarawataudanaa hamuꞌou, maꞌuaa ba a faꞌaiaa hamuꞌou fei walaloaa fei haguau hamuꞌou.Futoaa Hafeloꞌaa mei na Tata
5 Aꞌa mei na fafiꞌiaa ei naranara, lomi namina fiꞌi naranarau aleꞌei fiꞌiaa naranaraa hamuꞌou wagina. 6 Fei fanaa hamuꞌou lagina na hawia. 7 Eꞌeni, hamonei futoaa fei tatana ma farawaninaa naranarana ba neiꞌamina fuaꞌonia fei faloloaꞌiana. 8 Siꞌei, a iꞌigifaweꞌi aꞌa hamuꞌou ba hamonei famaꞌadinia fei haguaa hamuꞌou aꞌana. 9 Fei paꞌafina a neꞌinaa aꞌa hamuꞌou famaꞌa, sifei ba a apaꞌia ba ana hamoꞌaa u paꞌi aꞌa fei manimania ma guainau aꞌa minaa ei manumanu. 10 Nabaa hamoꞌaa futoaa hafeloꞌaa nemea, yau ana a futoaa ei hafeloꞌana. Ma tamanu una futoia—nabaa faꞌua ba ina paꞌi hafeloꞌana—una futoia i pudaa Christ Jesus uaa hamuꞌou 11 ba ineiꞌaa sifipaꞌaa oꞌou Satan. Uaa, ona aidadii ei mau sifisifina.
Ei Bauana Wagii fei Manufau Fiꞌugaia
12 Ei a dinaa Troas ba a uꞌugaa fei rawaniꞌa wareaa Christ ma na fanunupaꞌia ba mei Fasu nadii gigiaa fei gigei aꞌau, 13 ana lomi na rawani fei naranarau, uaa lomi na bapaꞌaa mei lofuu Titus yei. Siꞌei, una diꞌininaa roꞌou ma dinaa Macedonia.
14 Ma na ware ‘ta’ aꞌa mei Haidaa uaa ranimai Christ na famuainaa haiꞌou ma fatalaifaniꞌeaa haiꞌou wagina. Uaa haiꞌou, ina fatalainaa fei faꞌapaꞌaa haiꞌou hia aleꞌei hepalo dufaa manumanu. 15 Uaa aꞌa mei Haidaa, haiꞌou aleꞌei fei malelee fei dufaa unuu Christ dupuaa ei roi tela ma ei roi paꞌai. 16 Aꞌa ei roi paꞌai, haiꞌou aleꞌei fei raiaa maꞌea ma aꞌa ei roi tela, haiꞌou aleꞌei fei dufaa harenua. Ma hini i bigipaꞌaa ei manumanu ei? 17 Abaa haiꞌouna uꞌugaa fei wareaa mei Haidaa ba haiꞌouꞌaa to ponoꞌa wagina aleꞌei bigiꞌaa wataudadiai. Agia. Aꞌa Christ, haiꞌouꞌaa ware i pudaa mei Haidaa fininaa fei mau faꞌuaia ana aleꞌei ei ramaꞌa aloamiaa mei Haidaa.