Feni neꞌia i dinaa aꞌa ei losuu mei Haidaa yei Corinth ma aꞌa minaa ei apunaia yei Achaia:

2 Fei rawaniꞌa ma fei gutafarawania i dinaa aꞌa hamuꞌou, noranarai aꞌa mei Haidaa, mei hia Amaa oꞌou mawe mei Fasu Jesus Christ.

3 Udugia i dinaa aꞌa mei Haidaa, mei Amaa mei Fasuu oꞌou Jesus Christ, mei Amaa faloloaꞌia, mei hia Haidaniaa minaa ei faꞌunuwenuwea, 4 mei na faꞌunuwenuweaa haiꞌou aꞌa minaa ei awataa haiꞌou ba aꞌa fei unuwenuwea haiꞌouna tonia aꞌa mei Haidaa haiꞌounei faꞌunuwenuweaa hefiꞌadiai rona paꞌi tamunu ei mau awataa. 5 Uaa ana aleꞌei ei fiꞌiaa Christ na noꞌuamai aꞌa ei tatalaiaa haiꞌou, ana aꞌa Christ, fei unuwenuweaa haiꞌou imina apoidiai. 6 Nabaa haiꞌouna gutafafelo, fei paꞌafina sifei ba hamonei gutafarawani ua ma hamonei tela; nabaa haiꞌouna gutafarawani, paꞌafina sifei ba hamonei gutafarawani ua, ba wagii ei fiꞌia, ei haiꞌounadoꞌo tonia, ana hamonei tonaa fei mau apitaia. 7 Ma napaꞌaa oꞌonai unuu haiꞌou aꞌa hamuꞌou, uaa haiꞌouna aida ba ana aleꞌei hamoꞌaa tonaa ei fiꞌiaa haiꞌou, ana hamowe tonaa fei unuwenuwea haiꞌouna tonia.

8 Ena lofu, nunumiaa haiꞌou ba hamonei aida ba batanai ei awataa haiꞌouna tonia yei Asia. Haiꞌounamina temu ma namina ratanaa haiꞌou ba paꞌaa lomi haiꞌou apitaipaꞌi ma ba haiꞌoupoꞌo birawaꞌaꞌafai ua. 9 Hiꞌi. Laloo ei naranaraa haiꞌou, haiꞌouna nanamuinia ba haiꞌouꞌaa maꞌe. Maꞌuaa fei manumanu fei, ina nomai ba haiꞌouneiꞌaa oꞌugaa ana haiꞌou, maꞌuaa oꞌugaa mei Haidaa, mei i faꞌasiꞌanaa ei maꞌea. 10 Ina fatelaꞌanaa haiꞌou aꞌa ei hafeloꞌa manumanu, ei na paꞌi maꞌea wagina. Ma na oꞌonai unuu haiꞌou aꞌana ba ranimai iwe hadumaloo haiꞌou 11 ana aleꞌei hamona hadumaa haiꞌou wagii ei lafulafuaa hamuꞌou. Wagii fei rawaniꞌa, fei ina fanaa haiꞌou uaa ei lafulafuaa watauda, watauda roꞌaa ware ‘ta’ uaa haiꞌou.^a

12 Sifeni feni mamaguguaa haiꞌou: Lomi na marapu ei naranaraa haiꞌou wagii ei mau tatalaiaa haiꞌou yeni ano ma fei mau gutagutaa haiꞌou aꞌa hamuꞌou. Siguapaloei napaꞌaa apunai ma faꞌuai ma noramiana aꞌa mei Haidaa. Ma abaa haiꞌouna bigiꞌaa eꞌei aꞌa fei mau apaꞌaa feni ano, maꞌuaa aꞌa fei rawaniꞌaa mei Haidaa. 13 Uaa lomi haiꞌouna neꞌifanaa hamuꞌou hepalo manumanu lomi hamoꞌaa igopaꞌia o apaꞌia. Ma na oꞌugaa fei ba ana aleꞌei hamona 14 apaꞌaa haiꞌou maꞌida wagina ana hamonei aida ba ina rawani nabaa hamoꞌaa mamagugu uaa haiꞌou, ana aleꞌei haiꞌouna mamagugu wagii fei arewaa mei Fasu Jesus uaa hamuꞌou.

15 Siꞌei ba una oꞌugaa feni, na nara ba adoꞌomii maꞌa hamuꞌou ba hamoꞌaa to guapalo hawegia. 16 Una doꞌonara ba amii maꞌa hamuꞌou ena na tatalaidinaa Macedonia ma na hadiweꞌimai, a nomaꞌadimai hamuꞌou. Ma aleꞌei hamoꞌaa to guapalo hawegia. Ma hinene, te, hamonei alonaa yau Judea. 17 Eni a pagiaa feni talau feni, na paꞌi paꞌafina. Lomi na bigiꞌia aleꞌei fei mau feni ano. Haa, aleꞌei ba i guapaloi naranarau ba a nara ba, “Hiꞌi, a bigiꞌia” ma ana fi nara ba, “Loꞌe?”

18 Maꞌuaa ana aleꞌei ba mei Haidaa na oafagugu, fei wareaa haiꞌou aꞌa hamuꞌou abaa “Hiꞌi” ma “Loꞌe.” 19 Uaa mei Naꞌuu mei Haidaa, Jesus Christ, mei haiꞌou Silas^b ma Timothy na uꞌugia aꞌa hamuꞌou, hia abaa aleꞌei ba “Hiꞌi” ma “Loꞌe.” Maꞌuaa i aꞌana, ranimai ba “Hiꞌi.” 20 Uaa figa faꞌunaia na wareia mei Haidaa, minaa ei, “Hiꞌi” aꞌa Christ. Ma siꞌei, i aꞌana, ona ware ba, “Amen” ba nei to hawera wagina mei Haidaa. 21 Mei Haidaa, hia mei na bigiꞌia aleꞌei ba haiꞌou ma hamuꞌou, o ufaweꞌi aꞌa Christ. Ina papaditainaa oꞌou, 22 tamaꞌainaa oꞌou ba manumanuna ma augaa fei Spiritina laloo iaa oꞌou aleꞌei ba inadii tamaꞌainaa oꞌou nopaꞌaloo tamanu i nomai.

23 Mei Haidaa i fagianainau nabaa lomi a warefaꞌuai ba fei paꞌafina ba lomi una hadiweꞌinaa Corinth sifei ba ineiꞌaa fiꞌi naranaraa hamuꞌou. 24 Lomi haiꞌouna nunuminia ba haiꞌou aleꞌei fasu wagii ei weꞌiaa naranaraa hamuꞌou, maꞌuaa haiꞌouꞌaa bigifipui aꞌa hamuꞌou ba hamonei niꞌeniꞌe, uaa wagii fei narafaweꞌia, hamona ufaweꞌi.