Aꞌapoo Aweia
13
Feni, fei faꞌodupoa ba amii maꞌa hamuꞌou. “Minaa ei dududua nei paꞌi helagui, o oꞌodui ramaꞌa rona fanunupaꞌaa tamanu na tata.” 2 Una aweidigaa hamuꞌou aꞌa fei faguapoaa maꞌau hamuꞌou. Eꞌeni, eni lomi yau aꞌa hamuꞌou, a waredinia: Ena una hadiweꞌidimai awe fanimaꞌaiaa ei ronadoꞌo bigifafelo, o hinidiai, 3 siꞌei ba nunumiaa hamuꞌou ba hamoneipaꞌaa aida ba ufi umuinaa Christ. Aꞌa ba ina maralele ei na fawanewaneaa hamuꞌou, maꞌuaa na paꞌi faufauna dupuaa hamuꞌou. 4 Faꞌua ba ina maralele ei i fatawa, maꞌuaa fi oalao aꞌa fei faufau mei Haidaa. Ma ana aleꞌei, haiꞌouna maralele aꞌana, maꞌuaa aꞌa fei faufau mei Haidaa, haiꞌouna oafipui aꞌana ba haiꞌounei hadumaa hamuꞌou.5 Fanunumaꞌaiaa ana hamuꞌou ba paꞌaa faꞌua ba hamona narafaweꞌi; maniaa ana hamuꞌou. Haa, lomi hamona aida ba Christ Jesus, hia laloo iaa hamuꞌou? Nabaa lomi, woro ba lomi hamoꞌaa muainaa fei manimania. 6 Ma una nunuminia ba hamonei fanunuꞌapaꞌia ba haiꞌouna muainaa fei manimania. 7 Haiꞌouꞌei lafulafunaa aꞌa mei Haidaa ba lomi hamoꞌaa bigiꞌaa hepalo tata. Fei paꞌafii fei, aꞌa ba ei ramaꞌa, ronei fanunupaꞌia ba haiꞌouna muainaa fei manimania, maꞌuaa ba hamoꞌaa bigiꞌaa tamanu na wanewane anaa nabaa rona nara ba lomi haiꞌouna muainaa fei. 8 Uaa lomi ba haiꞌouꞌaa bigiꞌaa hepalo manumanu ba i fadugeaa fei faꞌuaia, maꞌuaa fei na faweꞌinaa fei faꞌuaia. 9 Nabaa haiꞌouꞌaa maralele, haiꞌouna niꞌeniꞌe wagina uaa, hamona faufau ma ei lafulafuaa haiꞌou, siꞌei ba hamoneiꞌaa paꞌi hepalo tata. 10 Sifei, fei paꞌafina ba a neꞌifanaa hamuꞌou eni manumanu ei yau lomi aꞌa hamuꞌou, ba ena na nomai, uneiꞌaa fafofolaa aꞌa fei foraforau—fei na fanau mei Fasu ba unei farawaninaa hamuꞌou ma aꞌa ba unei fafeloaa hamuꞌou.
Ei Fapopoꞌii Wareaa Paul
11 Ei fapopoꞌii wareau, ena lofuu maꞌadinaa hamuꞌou. Hamonei niꞌeniꞌe, fafirarawaninaa naranaraa hamuꞌou, nei paꞌi ua hepalo naranara. Gutafirawanii. Ma mei Haidaniaa fei hagua ma fei gutafirawania, iwe oafipui aꞌa hamuꞌou.
12 Fihatofii pudaa hamuꞌou aꞌa fei fafaꞌarai maumau. 13 Minaa ei apunaia, rona famafufuoinaa hamuꞌou.
14 Inei ude pafoo hamuꞌou fei rawaniꞌaa mei Fasu Jesus Christ ma fei haguaa mei Haidaa ma fei gutafipuiaa fei Spiritii Apuna.