Jantu tuꞌuꞌ calhiulacanaꞌ ju ixlhamapꞌaksin Dios
2
Ji quiꞌalakꞌavin iclajumputunau ixlacata ju anuꞌ avilhchan acsni caminchokoyach ju quiꞌucxtinꞌan Jesucristo chai kꞌaixtam calakꞌanau ju yuchi.
2 Pus iclatapaininiyau ni jantu va aꞌoktantsꞌankꞌatꞌit ju lamiꞌatalacpastꞌacꞌatꞌan.
Nin yuchi ni lai alhitꞌalhanantꞌit ju tuꞌuꞌ chivinti junta tanajun ni lana chinta ju avilhchan acsni caminchokoyaꞌ ju quiꞌucxtinꞌan Jesús.
Jantu chun alatꞌit mas tanajun ni ma chunch quijuni ju Spiritu Santu.
U ma chunch icꞌajuni ju aliꞌin.
U ma chunch iclaꞌatsꞌoknunitau.
3 Tun xamatiꞌ cataꞌokxchokꞌon.
Pus pucꞌatsacan ni vanin minta ju anuꞌ avilhchan acsni caminchokoyaꞌ ju Jesús acsni na lhu catanonach ni jantuch talhilacaꞌamputun ju Cristo.
Vachuꞌ pꞌulhnan catalacasuyach ju anuꞌ lapanac ju lana jantu tuꞌuꞌ calhiulayaꞌ ju ixlhamapꞌaksin Dios.
Yuchach ju anuꞌ ju lhilhcacanta ni catsꞌankꞌakꞌalhiyach.
4 Ju yuchi na kꞌai cacꞌatsayaꞌ ju va laꞌisꞌakstu.
Chai ju yuchi calaclhikꞌalhtsoyaꞌ tachi chun ju dios ajuncan mas jantu vasalh Dios tajunita.
Chai calactꞌalakꞌayach ju talhilaksi ju Dios.
Chai catolach laꞌixpujitat Dios.
Calhitalacasuyach tachi ju vasalh Dios mas jantu.
5 Ja va jantu pꞌastꞌacꞌatꞌit ni chunch ju xaclajunau acsni xaclatꞌavilaucaꞌ ju uxijnan.
6 Chai ju uxijnan cꞌatsꞌayatꞌit ni tucaꞌ lakꞌaꞌinican ni laich catalacasu.
Pus acsnich ju calakꞌaꞌinicanach acsni cachinach ju avilhchan ju alhcanilh ju Dios.
7 Pus mas chavai alin ju jantu tuꞌuꞌ talhiulai ju ixlhamapꞌaksin Dios mas jantucaꞌ lai machakxacan tajuch ni va chunch ju talai.
Chai jantucaꞌ lai talacasui ju anuꞌ lapanac ju lana jantu tuꞌuꞌ calhiulayaꞌ ixlhamapꞌaksin Dios.
Tus acsnich ju lai catapasayaꞌ ju chunch acsni camakꞌosucanach ju anuch ju asastucnun ju chavai.
8 Chai acsnicaꞌ ju catalacasuyach ju anuꞌ lapanac.
Para ju Jesús laꞌixtachaput ju ixchivinti capumakniyaꞌ ju anuꞌ lapanac.
Pus mas va yuchi ni caminchokoyaꞌ ju Jesús pus lana caniyaꞌ ju anuꞌ lapanac.
9 Pus acsni catalacasuyaꞌ ju anuꞌ lapanac ju lana jantu tuꞌuꞌ lhiulai ju ixlhamapꞌaksin Dios pus lana chunch calayaꞌ tachi ju lai ju Satanás.
Chai acsni catalacasuyach pus camalacasuyaꞌ ju ixtachaput.
Chai camalacasuyach ju tuꞌuꞌ ju caꞌapumamachakxaniputunaꞌ ju lapanacni ni jantu va lapanac junita ju yuchi.
Chai vachuꞌ canaviyaꞌ ju kꞌai lhamakꞌan.
Para tachi chun ju ani taxtokni chunchach ju canaviyaꞌ ni va caꞌapuꞌokxchokꞌoputunach ju lapanacni.
10 Chai ju yuchi canaviyaꞌ tachi chun ju aꞌokxchokꞌonti va ixlacaꞌatalhꞌan ju lapanacni ju tatꞌajun tsꞌankꞌakꞌalhinin.
Chai caꞌapunavicanaꞌ chunch va ixlacaꞌatalh ni jantu tavanan tuꞌuꞌ talhiulata ju stavasalanti ixlacata ju Cristo mas ajunicalh ta yu laich caꞌixtaputakꞌalhtaxtulh.
11 Chai ni chunch catalayaꞌ pus ju Dios calhilakꞌaꞌiyaꞌ ni caꞌalilh ju aꞌokxchokꞌonti ni chach talacaꞌi ju va taꞌaklhtamat.
Catalacaꞌiniyaꞌ ju anuꞌ lapanac acsni canonaꞌ ni yuchach ju Dios.
12 Pus ju chunch caꞌapuꞌulanicanaꞌ ixtalakꞌalhinꞌan tachi chun ju jantuch talacaꞌita ju stavasalanti ixlacata ju Cristo.
Alai va yuchi ixtakꞌachani ju jantu kꞌox.
Ju aliꞌin asacxtucalh ni catatakꞌalhtaxtuyaꞌ
13 Pus ju Dios na tamapainiyan ju uxijnan ji quiꞌalakꞌavin.
Chai ju quijnan lhijun ni va tachi acjuniuch ju Dios lakꞌailaktsꞌiuch ju milacataꞌan ji quiꞌalakꞌavin ni tasacxtutan ju Dios tus laꞌixputaiꞌulacan lacamunutpaꞌ ni laich atꞌakꞌalhtꞌaxtꞌuyaꞌitꞌit.
Vachuꞌ tasacxtutan ni laich catalasastꞌiniyan ju miꞌalhunutꞌan ju Spiritu Santu chai laich lhilacꞌapꞌinatꞌit ju stavasalanti ixlacata ju Jesucristo.
14 Pus ju Dios lacasqꞌuin ni alaktsꞌinaꞌitꞌit ni vasalh xakꞌai junita ju quiꞌucxtinꞌan Jesucristo chai yuchi xatalhitꞌasaniyan laꞌixchivinti Dios ju iclajunauch.
15 Pus ji quiꞌalakꞌavin va tachi alhilacꞌapꞌitꞌitch chai va tachi apꞌastꞌactꞌitch ju anuch amalaninti ju iclamalanitau laquiꞌatsꞌoknut quincꞌan chai laquinchivinti quincꞌan.
16 Pus isꞌakstu ju quiꞌucxtinꞌan Jesucristo chai quimpaiꞌan Dios ju quintamapainitan.
Chai yuꞌunch ju quintamatankꞌoxaxkꞌayakꞌalhiyan.
Chai quintaꞌaktaijuyan ni laich va tachi calhilaksiyauch ju yuchi ni aquintalhiꞌanan ju lactꞌiyan.
Chai chux ju ani quintanaviniyan va ixlacata ni xaquintanaviniyan lamapainin.
17 Pus ictapainini ju yuꞌunch ni catamatankꞌoxaxkꞌayayan chai tachapunch catanaviyan ni laich anaviyaꞌitꞌit tachi chun ju kꞌox chai va yuchi ju kꞌox chivinti ju anonaꞌitꞌit.