JU PꞌULHNAN ALHIQUI JU ATSꞌOKNUNICALH JU TIMOTEO
Ju Pablo macꞌami ju Timoteo
1
Ju quitꞌin icPablo.
Ixlapanac ju Jesucristo icjunita.
Chai yuchi ju Dios ju quijuni ni acꞌajunilh ju lapanacni ixchivinti.
Pus yuchi ju Dios ju quintamakꞌalhtaxtun chai yuchi ju Cristo Jesús ju lhilaksiyau ni aquintalhiꞌanan ju lactꞌiyan.
2 Pus va icmacꞌamiyan ji Timoteo lacaꞌatsꞌoknut.
Ju uxintꞌi tachi vasalh quintsꞌalhꞌat unitꞌa ni quitꞌin ju icmalacaꞌinin ju ixchivinti Dios.
Pus ictapainini ju quimpaiꞌan Dios chai ju quiꞌucxtinꞌan Cristo Jesús ni catanaviniyan lamapainin chai cataꞌaktaijuyan lacaꞌamapaininti chai cataꞌaktaijuyan ni jantu calacꞌalh ju miꞌalhunut.
Alin ju lapanacni ju jantu sok taꞌamalaninin
3 Pus tachi ju icjunin acsni icꞌalh ju xalacatꞌun Macedonia pus aktam acjunchokopalan lacaꞌatsꞌoknut.
Atꞌaꞌulhcaꞌ ju lakꞌachakꞌan Efeso.
Ju chunch laich aꞌunaꞌ ju aliꞌin ni jantu catamasulh ju lhamapꞌaksin ju jantu soknicꞌa.
4 Nin yuchi ni lai na tuꞌuꞌ catalhiula ju va chivintich.
Nin yuchi ni catalhitakꞌaya ju tuchi tanajunch ni tanavita ju makꞌaniya ixlacpaiꞌan mas jantu.
Pus jantu tavanan lai catitamatankꞌaxtukꞌo ju chunch.
Chai ju chunch atalacpastꞌacꞌat puꞌalin va asacminti.
Jantiyuꞌ ju lai catiꞌaꞌaktaiju ixmakpitsica ju ixchivinti Dios junta najun ni calhilacaꞌau ju Jesús.
5 Para ju Dios quintaxtaknitan ju ani lhichꞌalhcat ni laich caꞌaꞌaktaijuyaꞌ ju Dios ju lapanacni ni laich cataꞌamapaininilh.
Chai laich cataꞌamapaininilh acsni na salaka ju ixꞌalhunutꞌan chai acsni jantu tuꞌuꞌ tanavita ju laich catalhixcanilh ixꞌalhunutꞌan chai acsni slivasalh talhilacaꞌan ju Jesús.
6 Para ni jantu chun ixjunita ju isꞌatsucuntiꞌan ju aliꞌin lapanacni pus yuchi jantu sok xatalhiꞌan.
Jantu tamasui ixchivinti Dios.
Alai yuchi ju tamasui ju va tuꞌuꞌ chivinti ju jantu lhitapalai.
7 Ju yuꞌunch taꞌamalaninimputun ju lhamapꞌaksin ju tsꞌoklh ju Moisés para nin yuꞌunch jantu tamachakxai ju ixchivintiꞌan tuchi tanajun nin yuchi ju tuchi pꞌas tanajun ni stavasalanti.
8 Pus cꞌatsayau ni na lai aquintaꞌaktaijuyan ju ixlhamapꞌaksin ju Moisés acsni camavasalanicanau.
9 Pus ju vasalh machakxai ju anuꞌ lhamapꞌaksin cꞌatsai ni jantu lhinavicanta ju va ixlacataꞌan ju lackꞌoxin lapanacni.
Alai yuchi lhinavicalh ixlacataꞌan ju jantu tuꞌuꞌ talhiulai ju lhamapꞌaksin chai ju jantu lai talacaꞌi chai ju jantu tuꞌuꞌ talhiulai ju Dios chai ju na taꞌalactuꞌunun chai ju jantu tuꞌuꞌ alhiulanan chai ju tanajun macxcai chivinti chai ju tamakni ju ixpaiꞌan chai ixnatiꞌan chai ju tamakni ju ixtꞌalapanacꞌan.
10 Vachuꞌ navicanta ixlacataꞌan ju va tapuxcajui ixnavinꞌan chai ju talalactuꞌui sia papanin u sia chakolun chai ju va taꞌokxkꞌalhajui ixtꞌalapanacꞌan chai ju tanajun taꞌaklhtamat chai ju va kꞌaya tamucꞌani ixtalakꞌalhin apumatam chai ju tanavi tachi chun atumpa alactuꞌunti ju jantu lhijun lacasoknicꞌa lhamapꞌaksin ni catanavi.
11 Pus ju ixchivinti Dios ixlacata ju Cristo najun ni ixlacataꞌan yuꞌunch ju puꞌalilh ju lhamapꞌaksin.
Pus laꞌixchivinti Dios putasui ni slivasalh xakꞌai ju paxcat Dios.
Chai yuchach ixchivinti Dios ju icxtaknicanta quitꞌin ni laich acꞌamasunilh ju lapanacni.
Ju Pablo juni lakꞌailaktsꞌiuch ju Cristo
12 Pus ju quitꞌin icjuni lakꞌailaktsꞌiuch ju Jesucristo ju quiꞌucxtinꞌan ni yuchi ju xaquixtakni ju quintachaput ni laich acnavilh ju ani lhichꞌalhcat.
Pus ju yuchi cꞌatsaich ni lai acmuctaxtuyaꞌ.
Yuchi quilhixtaknilh ju ixlhichꞌalhcat.
13 Chunch quiꞌulhtulh ju Jesús mas na macxcai xaclhichivinin ju Dios ju makꞌanchich chai xacꞌalhimakchapui ju ixtalhilacaꞌanta ju Cristo chai na macxcai chivinti xacꞌajuni.
Para ju Dios quiꞌaktaiju lacaꞌamapaininti va ixlacaꞌatalh ni jantu xacmachakxai tuchi xacnavi acsni tucaꞌ xaclhilacaꞌanta ju Cristo.
14 Pus na lhu lana xaquinavini lamapainin ju quiꞌucxtinꞌan Cristo.
Chai yuchi iclhilhilacaꞌalh ju Jesús chai alilh ju amapaininti laquiꞌalhunut.
Yuchi ju alin laꞌixmacni Cristo Jesús.
15 Pus ju ani chivinti ju aclajunau stavasalanti chai lhijun ni calacaꞌiyau ixlhichux quiꞌalhunutꞌan.
Yuchi ni quilachilh ju Cristo Jesús ju ani lacamunutpaꞌ ni caꞌamakꞌalhtaxtulh ju alactuꞌunin.
Chai tachi chun ju alactuꞌunin ju alin pus quitꞌin ju palai xacꞌalactuꞌunun.
16 Pus ju Jesucristo ixꞌapumalacasuniputun ju lapanacni laquiꞌatsucunti ni jantu tavanan jeks ui ju yuchi.
Yuchi xaquilhiꞌaktaijui ju quitꞌin lacaꞌamapaininti mas palai na xacꞌalactuꞌunun ju quitꞌin.
Chai astan cataꞌalinaꞌ ju lapanacni ju vachuꞌ catalhilacaꞌanaꞌ ju Jesucristo chai ixlhiyuchi caꞌalinaꞌ ju isꞌatsucuntiꞌan jonkꞌalhita lactꞌiyan.
17 Tus mas va tavananch catalhonicalh chai calakꞌayacalh ju Dios.
Pus ju yuchi jonkꞌalhita xakꞌai ucxtin.
Chai ju yuchi jantu lai ni.
Chai jantu lai laktsꞌincan.
Pus va yuchi ju Dios junita.
Vasalh chunch junita.
18 Ju ani lhamapꞌaksin icxtakniyan ji quintsꞌalh Timoteo tachi ju tanaulh ju milacata ju yuꞌunch ju tachivinin ixchivinti Dios.
Chai ju anuꞌ ixchivinti Dios ju tanaulh ju yuꞌunch caꞌaktaijuyan ni lai apꞌusastꞌucꞌaꞌ ju macxcai.
Para va tachi alhilacꞌapꞌich ju Cristo chai jantu tuꞌuꞌ anavitꞌi ju calhixcaniyan ju miꞌalhunut.
19 Jantu chun alatꞌi tachi ju talalh ju aliꞌin.
Ju yuꞌunch jantu tanavilh ju kꞌox mas ixtacꞌatsai ni istasqꞌuini ni catanavi.
Jantu ixlhichux ixꞌalhunutꞌan talhilaksi ju Dios.
Chai yuchi lana talhicapkꞌolh ju Dios.
20 Pus pumatꞌui sia yuꞌunch ju chunch tanavilh yuchi ju Himeneo chai ju Alejandro.
Pus ju quitꞌin icꞌajuni ju ixlapanacni Dios ni jantu catamalakꞌavi ju yuꞌunch.
Chach amamakꞌalhkꞌajni ju lhacaticuru.
Ta tsꞌa jantu catapucꞌatsayach ni jantu kꞌox ni macxcai catalhichivinilh ixchivinti Dios.