Ta yu tꞌachivincan ju Dios
2
Pus pꞌulhnan iclamapꞌaksiyau ni atꞌapꞌaininitꞌit ju Dios chai atꞌachꞌivinintꞌit chai asqꞌuinitꞌit ju Dios chai aꞌunitꞌit lakꞌailaktsꞌiuch.
Chunch alatꞌit ixlacataꞌan tachi chun ju lapanacni.
2 Vachuꞌ chunch alatꞌit ixlacataꞌan ju xalackꞌajin chai ixlacataꞌan ixchuxꞌan ju ucxtinin.
Ju chunch ni laich kꞌox catsucuyau.
Jantu caꞌalilh ju laclakꞌaiti para lai catalhoniu ju Dios chai lai kꞌox catꞌalalhiꞌau ju quintꞌalapanacniꞌan.
3 Chai tachi chun ju ani na kꞌoxich lhiulai ju quiꞌamakꞌalhtaxtunuꞌan Dios.
4 Ju yuchi lacasqꞌuinch ni catatakꞌalhtaxtulh tachi chun ju lapanacni chai catamispalh ju stavasalanti chivinti ixlacata ju Cristo.
5 Pus va pumatam ju Dios.
Chai va pumatam ju lai apumaꞌamigoxla ju lapanacni ju Dios.
Yuchi ju malakachacanchilh ju ani ni lapanac catsucuyaꞌ.
Yuchi ju Jesucristo.
6 Yuchach ju tamakꞌaxtaklh isꞌakstu ju quilacataꞌan quinchuxꞌan ni laich aquintalhimalakxtun.
Chai chunchach ju ajunilh ju lapanacni acsni chilh ju avilhchan ju ilhcaꞌulacanta.
7 Chai ju quitꞌin icsacxtucanta ni acnonach ju chivinti ixlacata ju Jesús chai ixtamalakachan acva chai acꞌamamakaꞌuyach ju yuꞌunch ju jantu israelitanin tajunita.
Acꞌajunach ni catalhilacaꞌalh ju Jesús chai catalacaꞌilh ju stavasalanti ixlacata ju yuchi.
Pus jantu va kꞌaya icnajun.
Vasalh ixtamalakachan Jesús icjunita ixlacataꞌan ju yuꞌunch ju jantu israelitanin tajunita.
8 Pus iclacasqꞌuinch ni yuꞌunch ju jokꞌatni catatꞌachivinilh ju Dios vanta anchach cava junta tatakꞌaixtꞌokꞌa ju talhilacaꞌanta ju Jesús.
Para tasqꞌuini ni salaka cava ju isꞌatsucuntiꞌan laꞌixmacni Dios chai jantu xamatiꞌ catꞌalatalhkꞌamnilh nin catꞌalaxcailh akꞌantam.
9 Vachuꞌ iclacasqꞌuin ni catalakchꞌilh ju ixpumpuꞌan ju chakolun tachi ju va kꞌoxich.
Jantiyuꞌ ju va capumamaxanicalh u va caputalacasu tachi ju va lakachapui.
Chai jantu ixlhiyuchi camaxantila ju ixꞌaiꞌan ni va catalhitakꞌaya ni na cꞌusich catasu.
Nin yuchi ni catalacatocꞌalh oro u plata u catalakchꞌi ixpumpuꞌan ju na laklhu ixtapalh va ixlacaꞌatalh ni tachi tam xakꞌai catalacasu.
10 Alai catanavi kꞌox lhichꞌalhcat tachi ju lhijunch ni catanavi ju chakolun ju tanajun ni tatalhoni ju Dios.
Yuchach ju catalhimaxantila isꞌatsucuntiꞌan.
11 Ju chakolun chach va sek tatavi lacatalhavat acsni tꞌoncan chivinca.
Chai catatalhonilh ju ixlhamapꞌaksinꞌan ju jokꞌatni.
12 Ju lacatalhavat jantu iclacasqꞌuin ni cataꞌamalaninilh ixchivinti Dios ju chakolun.
Caꞌamalanicalh ju jokꞌatni.
Nin yuchi ni lai xamatiꞌ caꞌamapꞌaksinin.
Alai va sek catatavi.
13 Ju chakolun jantu chunch catalalh ni pꞌulhnan navicalh ju Adán.
Astan ju Eva.
14 Chai jantiyuꞌ ju Adán ju ixꞌokxchokꞌocanta.
Alai yuchi ju chakoꞌulh ju okxchokꞌocalh chai yuchi ju pꞌulhnan alactuꞌunuꞌ va.
15 Pus ixlhiyuchi jantu kꞌox ni va cataꞌamalaninilh ixchivinti Dios lacatalhavat.
Ju ixlhichꞌalhcatꞌan ju yuꞌunch yuchi ni catalakꞌayalh ju isꞌaskꞌatꞌan chai catamalanilh ju kꞌox chai catalhilacaꞌankꞌalhilh ju Jesús.
Cataꞌamapaininilh.
Catatsuculh tachi ju kꞌox lhiulai ju Dios.
Chai jantu va kꞌaya catatalacasu.
Pus ni catamuctaxtukꞌoyaꞌ ju chunch pus catatakꞌalhtaxtuyaꞌ.