Atapaininican ni catatꞌachivinaꞌ ju Dios ju ixlacata
3
Vachuꞌ iclajumputunau ji quiꞌalakꞌavin ni asqꞌuinitꞌit ju Dios ju quilacata quincꞌan.
Chach makpitsicalh ju ixchivinti ju quiꞌucxtinꞌan chai chach lakꞌayacalh tachi ju navicanta lamilhiꞌuxijnanꞌan.
2 Vachuꞌ asqꞌuintꞌit ni laich actakꞌalhtaxtuyau laꞌixmacaꞌan ju lapanacni ju na kꞌai tajunita.
Alin lapanacni ju chunch tajunita ni jantu si lhilacaꞌancan ju Jesús.
3 Ju Dios muctaxtui ju najunta.
Chai ju yuchi cataꞌaktaijuyan chai catalhistꞌacꞌan ni jantu cataꞌokxchokꞌoyan ju lhacaticuru.
4 Pus iclhilaksiyauch ju quiꞌucxtinꞌan Jesucristo ni yuchi ju cataꞌaktaijuyan ni laich atꞌailhipꞌinaꞌitꞌit ju tuchi iclajuntauch.
5 Pus ictapainini ju quiꞌucxtinꞌan Jesús ni yuchi ju cataꞌaktaijuyan ni laich amapꞌainininaꞌitꞌit tachi ju amapaininin ju Dios chai laich achꞌixkꞌoyaꞌitꞌit tachi chun ju macxcai tachi ju lalh ju Cristo.
Tasqꞌuini ni pumatamin cachꞌalhcatnalh
6 Chai iclajunauch ji quiꞌalakꞌavin laꞌixtapakaꞌut ju quiꞌucxtinꞌan Jesucristo ni jantu amalakꞌavitꞌit tachi chun ju quiꞌalakꞌavinꞌan ju va tamalheknin.
Ju jantu tachꞌalhcatnamputun.
Jantu chun talai tachi ju xaclalhimapꞌaksiyauch ju uxijnan.
7 Pus ju uxijnan miꞌakstuꞌan cꞌatsꞌayatꞌit ni tasqꞌuini ni anavitꞌit tachi ju laktsꞌintꞌatꞌit laquiꞌatsucunti quincꞌan.
Pus ju quijnan jantu va kꞌaya xaclacꞌucxuntꞌonau acsni xaclatꞌavilau ju uxijnan.
8 Jantu tavanan va lacaꞌamapaininti acꞌuniu ixvaiti tam xamatiꞌ ju lamilhiꞌuxijnan.
Alai xacchꞌalhcatnanauch lacalhichꞌalhcat ju tuncuj chai ju tsꞌis.
Chai na xacxkꞌopꞌau.
Ju chunch ni jantu xamatiꞌ xaclhimamakꞌalhkꞌajniyau ju lamilhiꞌuxijnan ju va quimavacach quincꞌan.
9 Pus jantu va ixlhiyuchi xacnaviyau chunch ni va jantuch calhiva ju lhamapꞌaksin ni acxtaknicauch ju tuꞌuꞌ vaiti.
Alai yuchi xaclhinaviyau chun ni va xacputalacasuputunau ju stavasalanti ni chunchach ju anaviyaꞌitꞌit vachuꞌ.
10 Pus acsni xaclatꞌavilaucaꞌ ju uxijnan xaclajunau ni jantuch cavailh va tichi chavaich ju jantuch chꞌalhcatnamputun.
11 Pus icmacꞌatsanicantauch ni taꞌalin ju lamilhiꞌuxijnan ju jantu tachꞌalhcatnamputun.
Lana jantu tuꞌuꞌ tanaviputun.
Va kꞌaya tatanui junta jantu ixlhicꞌatsatꞌan.
12 Para vachuꞌ tꞌajun ju quiꞌucxtinꞌan Jesucristo laꞌixꞌalhunutꞌan ju yuꞌunch.
Pus yuꞌunch ju icꞌamapꞌaksiyau laꞌixtapakaꞌut ju quiꞌucxtinꞌan Jesucristo.
Chai kꞌasi icꞌajunau ni va seknicꞌa lapanacni catava chai catachꞌalhcatnalh.
Chai yuchi ju cataꞌuyach ju va talhajatach laꞌisꞌakstuꞌan.
13 Chai ju uxijnan ji quiꞌalakꞌavin jantu jeks aꞌutꞌit ju ixnavica ju kꞌox.
14 Para ni caꞌalilh xamatiꞌ ju jantu calacaꞌiyaꞌ ju quinchivinti quincꞌan ju iclajuntauch ju ani lacaꞌatsꞌoknut pus amispꞌatꞌitch tichi chavaich chai jantu amalakꞌavitꞌit.
Chunch ju alatꞌit ni tsꞌa ma camaxanalh.
15 Para jantu alhixcꞌaꞌitꞌit tachi ju va mintꞌalaxcaiꞌan cava.
Va amapꞌaksitꞌit tachi ju va milakꞌauꞌan.
Ju Pablo sqꞌuini ju Dios ixlacataꞌan
16 Yuchi ju quiꞌucxtinꞌan Jesús ju aꞌaktaijunun ni jantu calacꞌalh ju quiꞌalhunutꞌan.
Chai ju quitꞌin ictapainini ju yuchi ni isꞌakstu va tachi cataꞌaktaijuyan ni jantu calacꞌanaꞌ ju miꞌalhunutꞌan mas va tuchi camilh lamiꞌatsucuntiꞌan.
Vachuꞌ ictapainini ju quiꞌucxtinꞌan Jesús ni catatꞌatolanch ju minchuxꞌan ju uxijnan.
17 Pus ju quitꞌin icPablo.
Chai tus ani apumatam xaquiꞌatsꞌoknuni ju ani alhiqui.
Para ju chavai laquimacaꞌ quiꞌakstu iclaꞌatsꞌoknuniyau ju ani chivinti acsni iclamacꞌamiyau.
Chai laquiꞌatsꞌoknut putasui ni quiꞌanuch tachi chun ju alhiqui ju iclaꞌatsꞌoknunitau ni chunchach ju iclhaꞌatsꞌoknun.
18 Ictapainini ju quiꞌucxtinꞌan Jesucristo ni catanaviniyan lamapainin minchuxꞌan ju uxijnan.