2
Ju quitꞌin chani xacnajun ju laquiꞌalhunut.
Xacnajun ni jantuch aktam xaclalakꞌanchokoputunachau acsni va xaclhamakꞌaninin tuchꞌi xanaviyatꞌit.
2 Ni iclamamakꞌaniniu ju uxijnan pus matiꞌ apumatam ju lai aquimakꞌankꞌachayaꞌ.
Va uxijnan.
3 Jantucaꞌ xacꞌamputunacha ni xacnajun ni ca va lai xacꞌamakꞌaninilh ni xaclaktsꞌilh tuchꞌi ju layatꞌit.
Pus yuchi iclalhilakꞌakꞌaimauch lacatsꞌunin acsni iclaꞌatsꞌoknuniu pꞌulhnan.
Ju chunch acsni aclalakchaꞌanau ju uxijnan pus jantu aclhiꞌamakꞌanininaꞌ tuchꞌi layatꞌit.
Alai va aquilamakꞌankꞌachayau ju quitꞌin.
Pus iccꞌatsai ni vachuꞌ akꞌachꞌanaꞌitꞌit ju minchuxꞌan acsni iclalhikꞌachanauch ju uxijnan.
4 Pus acsni iclaꞌatsꞌoknunitau ju anuꞌ alhiqui slivasalh ni xaclalhamakꞌanininau chai slivasalh na xaquixcani ju quiꞌalhunut tus na ickꞌalhulh.
Jantiyuꞌ ju iclalhiꞌatsꞌoknuniu ni va aclamaꞌamakꞌaniniputu.
Alai va xaclacasqꞌuin ni apꞌucꞌatsꞌayaꞌitꞌit ni vasalh na iclamapainiyau ju uxijnan.
Ju Pablo alacjuni ni catamacꞌacxanilh ju anuꞌ alactuꞌunuꞌ
5 Ju anuꞌ lapanac ju xaꞌalactuꞌunun jantu quitꞌin ju xaquilhimamakꞌanini ju tuchi xanavi.
Alai uxijnan ju xatamamakꞌaniniyan.
Para ca palai kꞌox ni acnaulh ni va aliꞌin lamilhiꞌuxijnanꞌan ju amamakꞌaninicalh.
Ju chunch jantu na lhu icmucꞌani ixtalakꞌalhin ju anuch alactuꞌunuꞌ.
6 Pus ju uxijnan ni mamakꞌalhkꞌajnitꞌatꞌit ju anuꞌ alactuꞌunuꞌ acsni xatꞌakꞌaixtꞌokꞌatꞌit pus kꞌoxich.
Pus ju chavai jantu tasqꞌuini ni amamakꞌalhkꞌajnitꞌit aliꞌ.
7 Pus ju chavai amacꞌacxanitꞌit chai amatankꞌoxaxkꞌayatꞌit.
Jantu xcai ni va camacomputunach ju ixti Dios ni na caꞌamakꞌaninilh.
8 Yuchi iclalhijunau ni amalacꞌasunitꞌit ju chavai ni vasalh mapꞌainiyatꞌit ju anuꞌ lapanac.
9 Pus acsni iclaꞌatsꞌoknunitauch ju anuꞌ alhiqui ixlacata ju anuꞌ lhamakꞌan va xaclalaktsꞌimputunau.
Va xaccꞌatsaputunch ni vasalh lai lacꞌaꞌiyatꞌit tachi chun ju iclajunau u jantu.
10 Pus va tichi chavaich ju macꞌacxanitꞌatꞌit ju uxijnan pus vachuꞌ ju quitꞌin icmacꞌacxanita.
Pus ni alinch xamatiꞌ lamilhiꞌuxijnan ju quilactuꞌuta pus icmacꞌacxanita ni macꞌacxanitꞌatꞌit ju uxijnan.
Icmacꞌacxanita ni iccꞌatsai ni Cristo ju laktsꞌin tuchi icnavi.
11 Calamacꞌacxaniu ni tuꞌuꞌ lanaviyau.
Ju chunch jantu lai aquintaꞌokxchokꞌoyan ju Satanás.
Pus kꞌoxich cꞌatsayau ta yu laich ju yuchi.
Na ixꞌamakꞌaninin ju Pablo acsni ixvi ju lakꞌachakꞌan Troas
12 Pus ju quitꞌin xacꞌajumputun ju amachakꞌan Troas ixlacata ju Cristo.
Chai acsni icchaꞌalh ju anch pus ju Dios quiꞌaktaiju ni laich xacꞌajuni lhu lapanacni ju ixchivinti Dios.
13 Para jantu xackꞌachan ni tucaꞌ xaquilakchinchokoi ju quilakꞌauꞌan Tito.
Pus yuchi iclhiꞌalacmacꞌami ju amachakꞌan anch chai ictaxtucha.
Icꞌalh ju xalacatꞌun Macedonia.
Lai ictꞌalalhajayau ju macxcai
14 Para icjuni lakꞌailaktsꞌiuch ju Dios ni yuchach ju aktsꞌiya quintaꞌaktaijuyan ni lai tꞌalalhajayau ju macxcai ni va lakatam tꞌajuntau ju Cristo.
Chai ju Dios vachuꞌ quintaꞌaktaijuyan ni laich icꞌajuniu tachi chun ju lapanacni ixlacata ju Cristo.
Chai ju anuꞌ chivinti ixlacata ju Cristo chunch junita tachi ju tuꞌuꞌ ju na saksi acamin ju na makat ujtaican.
15 Pus ju quijnan chunch icjuntau tachi ju tuꞌuꞌ ju na saksi acamin chai ju Dios na kꞌox quintalhiulayan acsni icꞌajunau ju lapanacni ixlacata ju Cristo.
Pus na saksi ju chivinti ixlacata ju Cristo mas jantu si catatakꞌalhtaxtuyaꞌ ni jantu cataꞌanaꞌ ju lacajipi.
Va aliꞌin ju catatakꞌalhtaxtuyaꞌ.
16 Pus ju saksi chivinti ixlacata ju Cristo chunch junita tachi ju tuꞌuꞌ lhinin ixlacata yuꞌunch ju catamakꞌalhkꞌajnankꞌalhiyaꞌ.
Para ixlacataꞌan ju tatakꞌalhtaxtuta chunch junita tachi ju tuꞌuꞌ ju na can acamin ju xtꞌakꞌa ju atsucunti ju conkꞌalhiyaꞌ.
Pus slivasalh na tsꞌinqꞌui ju ani lhichꞌalhcat.
17 Para ju quijnan lai icnaviyau ni jantu chun iclayau tachi ju aliꞌin ju jantu sok taꞌamalaninin ixchivinti Dios.
Pus ju quijnan ni va lakatam ictꞌajuntau ju Cristo pus icnonau ixchivinti Dios laꞌixlhichux quiꞌalhunut quincꞌan.
Chai ni iccꞌatsayau ni Dios ju xaquintamalakachayachin pus tachi ju va jun laꞌixꞌucxlacapuꞌ yuchi ju icchivinau.