Ju tuchi xtꞌakꞌa ju Spiritu Santu
12
Iclacasqꞌuin ji quiꞌalakꞌavin ni amachꞌakxatꞌit ixlacata ju lhakꞌailaktsꞌin ju quintaxtakniyan ju Spiritu Santu.
2 Pus apꞌastꞌactꞌit.
Acsni jantucaꞌ ixlhilacꞌapꞌinatꞌit ju Jesús ixmalacꞌaꞌinicꞌantꞌatꞌit ni na tuꞌuꞌ ju santo mas jantu lai chivinin.
3 Pus iclacasqꞌuin ni lai amachꞌakxayaꞌitꞌit ta yu pucꞌatsacan ni tꞌajun chiviniꞌ tam lapanac laꞌixtachaput ju Spiritu Santu.
Chai yuchi iclalhijunau ju ani.
Acsni xamatiꞌ chivininch laꞌixtachaput ju Spiritu Santu pus jantu lai chani catinaulh:
“Chach mamakꞌalhkꞌajnikꞌalhicalh ju Jesús”.
Chai jantu lai xamatiꞌ catinaulh ni lhilaksich ju Jesús chai yuchach ju ixꞌucxtin ni jantu caꞌaktaijulh ju Spiritu Santu ni lai chunch canaulh.
4 Na tijlhu alin ju lhakꞌailaktsꞌin ju xtꞌakꞌa ju Spiritu Santu ixlacata ixlhichꞌalhcat ju Dios.
Para va pumatam ju xtꞌakꞌa.
Va yuchi ju Spiritu Santu.
5 Chai na tijlhu alin ju lhichꞌalhcat laꞌixmacni Dios para va pumatam ju chꞌalhcatnanican.
Va yuchi ju Jesús.
6 Chai yuchi ju Dios ju axtakni ju pumatamin tijtamin lhichꞌalhcat.
Chai isꞌakstu ju Dios ju quintaxtakniyan ju quintachaputꞌan ni lai naviyau ju tuchi lhichꞌalhcat ju quintalhcaꞌulanitan ju yuchi.
7 Pus laꞌisꞌatsucuntiꞌan ju pumatamin pumatamin tasui ixtachaput ju Spiritu Santu ni laich caꞌapuꞌaktaiju ju aliꞌin.
8 Pus ju pumatam xtaknicanta ju lhakꞌailaktsꞌin ni na acꞌatsananta chai laich sok amalaninin ixchivinti Dios.
Chai ju apumatam xtaknicanta ixlhakꞌailaktsꞌin ni na lai masui ixchivinti Dios junta palai xcai machakxacan.
Chai yuchi ju Spiritu Santu ju axtakni ixtꞌiyunꞌan ju ixlhakꞌailaktsꞌinꞌan.
9 Chai ju apumatam xtaknicanta ju ixlhakꞌailaktsꞌin ni ixlhichux ixꞌalhunut ju lhilaksi ixchivinti Dios ni vasalh camuctaxtuyaꞌ tachi ju najun ju yuchi.
Chai vana yuꞌ ju Spiritu Santu ju xtaknita ju ani lhakꞌailaktsꞌin.
Chai ju apumatam xtaknicanta ju ixlhakꞌailaktsꞌin ni lai palaich anavi ju takꞌankꞌanin.
Para vana yuꞌ ju Spiritu Santu ju xtakni ju chunch lhakꞌailaktsꞌin.
10 Ju apumatam xtaknicanta ju ixlhakꞌailaktsꞌin ni laich navi ju tuꞌuꞌ lhamakꞌan.
Chai ju apumatam xtaknicanta ju lhakꞌailaktsꞌin ni laich najun ixchivinti Dios.
Chai apumatam xtaknicanta ixlhakꞌailaktsꞌin ni lai camispa ni yuchi ju Spiritu Santu ju axakꞌalai ju lapanacni u jantu.
Chai ju apumatam xtaknicanta ixlhakꞌailaktsꞌin ni laich cachivinaꞌ atumpa chivinti mas jantu aktam chivininta ju chunch.
Chai ju apumatam xtaknicanta ixlhakꞌailaktsꞌin ni laich camavasalayaꞌ ju anuꞌ chivinti.
11 Para tachi chun ju ani lhakꞌailaktsꞌin isꞌakstu ju Spiritu Santu ju xtꞌakꞌa chai yuchi ju alhvakxtaknikꞌojui ju pumatamin tachi ju kꞌoxich lhiulai isꞌakstu.
Tachi chun ju quijnan va lakatam lacatuna juntau
12 Ju quilacatunaꞌan va lakatam.
Para na lhu ju ixpuchꞌalhcatna.
Para mas na lhu ju ixpuchꞌalhcatna va lakatamch lacatuna junita.
Pus vana va chun tachi chun ju talhilacaꞌanta ju Cristo.
13 Acsni tavanan akpaxtauch pus ju Spiritu Santu quintanavinitan tachi ju va lakatam lacatuna juntau ju quijnanꞌan ju lhilacaꞌantauch ju Cristo ni si pacxankꞌotauch ju anuꞌ Spiritu Santu.
Va lakatam lacatuna juntau mas israelitanin juntau u jantu israelitanin.
Mas xalapanac juntau u tam xamatiꞌ ju matiꞌ ixꞌucxtin.
14 Na lakalhu ju ixpuchꞌalhcatna ju quilacatunaꞌan.
Jantu va lakatam.
15 Pus ni laich cava cachivinilh ju quinchꞌajaꞌan laich chani canaulh:
“Ju quitꞌin jantu ixpuchꞌalhcatna ju lacatuna ni jantu icmacaꞌ”.
Para mas chunch ju canaulh jantu nomputun ni jantu vasalh lacalacatuna ju tinui.
16 U ni laich cava cachivinilh ju quiꞌakꞌaxkꞌolhꞌan laich chani canaulh:
“Ju quitꞌin jantu ixpuchꞌalhcatna ju lacatuna ni jantu iclakchulh”.
Para mas chunch ju canaulh jantu nomputun ni jantu lacalacatuna ju tinui.
17 Pus ni va si lakchulh cava ju quilacatunaꞌan tas anchach ju capakꞌasmatnau.
U ni va si akꞌaxkꞌolh cava ju quilacatunaꞌan tas anchach ju capaxaniu.
18 Para ju Dios lhilhcaꞌulata ju lakatamin xataxtokni ju quilacatunaꞌan tachi ju kꞌoxich lhiula ju yuchi.
19 Ni va lakatam ixpuchꞌalhcatna ju lacatuna ixva pus matiꞌ ixva ju lacatuna.
20 Pus ju Dios mas quintaxtaknitan na lhu ju ixpuchꞌalhcatna ju quilacatunaꞌan para va lakatam lacatuna junita.
21 Chai ju quilakchulhꞌan ni laich cava cachivinilh jantu lai catijunilh ju quimacaꞌan:
“Jantu icmaktasqꞌuiniyan”.
Nin yuchi ju quiꞌaktsulhꞌan ni laich cava cachivinilh jantu lai catijunilh ju quinchꞌajaꞌan:
“Jantu icmaktasqꞌuiniyan ju uxintꞌi”.
22 Tachi chun ju pacxantau ju laquilacatunaꞌan alin ju tasui tachi ju va jantu na lhu cachꞌalhcatnalh.
Para yuchach ju palai maktasqꞌuiniyau.
23 Chai alin ju pacxantau ju laquilacatunaꞌan ju palai jantu tuꞌuꞌ lhiulayau.
Para yuchach ju palai maxantilayau.
Chai alin ju ixpuchꞌalhcatna ju quilacatunaꞌan ju jantu lhijun ni calaktsꞌincalh chai ju yuchi kꞌox malakchꞌiniyau.
24 Para ju ixpuchꞌalhcatna ju quilacatunaꞌan ju na cꞌus pus jantu tasqꞌuini ni acmaxantilalh.
Chai ju puchꞌalhcatna ju palai jantu tuꞌuꞌ lhiulacan pus yuchi ju palai maxantilayau.
25 Ju chunch ju ixpuchꞌalhcatna ju quilacatunaꞌan jantu talaclasai.
Alai va talalhistꞌacꞌa.
26 Chai acsni camakꞌalhkꞌajnanaꞌ lakatam ixpuchꞌalhcatna ju quilacatunaꞌan pus chux quilacatunaꞌan vachuꞌ makꞌalhkꞌajnan.
Chai acsni cajuncanaꞌ lakatam ixpuchꞌalhcatna ju quilacatunaꞌan ni na kꞌox pus chux ju quilacatunaꞌan na kꞌachan.
27 Pus vana va chun ju uxijnan.
Ju uxijnan tachi ixlacatuna Cristo untꞌatꞌit.
Chai pumatamin ju uxijnan tijtamin tijtamin lhichꞌalhcat ju canaviyaꞌ.
28 Pus junta takꞌaixtꞌokꞌau ju quijnanꞌan ju lhilacaꞌantauch ju Cristo alin ju tucan ixtamalakachan Jesús tajunita.
Chai alin ju laich tanajun ixchivinti Dios mas jantu tucan ixtamalakachan Jesús tajunita.
Chai alin ju na lai taꞌamalaninin.
Chai alin ju na lai tanavi ju tuꞌuꞌ lhamakꞌan.
Chai ju aliꞌin lai palai tanavi ju takꞌankꞌanin.
Chai ju aliꞌin na tacꞌatsai ta yu laich apuꞌaktaijui ju aliꞌin.
Chai ju aliꞌin laich talhinajun lacatalhavat ju talhilacaꞌanta ju Jesús.
Chai vachuꞌ alin ju lai tachivinin atumpa chivinti mas jantu aktam tachivininta ju chunch.
29 Para alaktsꞌintꞌit.
Jantu si ixtamalakachan ju Jesús tajunita.
Jantu si ixnonin ixchivinti Dios tajunita.
Jantu si lai taꞌamalaninin.
Jantu si lai tanavi lhamakꞌan.
30 Jantu si lai palai anavi ju takꞌankꞌanin.
Jantu si lai tanajun atumpa chivinti ju jantu aktam tachivininta.
Chai jantu si lai tamavasalai ju anuꞌ chivinti.
31 Pus ixlhichux ju miꞌalhunutꞌan anavitꞌit cuenta ta yu laich apꞌuꞌamaklhtꞌayananaꞌitꞌit ju palai lackꞌox lhakꞌailaktsꞌin ju xtꞌakꞌa ju Spiritu Santu.
Para ju quitꞌin aclajunau ta yu palai kꞌox lana ju alayaꞌitꞌit.