11
Pus chunchach ju alatꞌit lamiꞌatsucuntiꞌan tachi ju iclai ju quitꞌin.
Chai ju quitꞌin isꞌatsucunti Cristo ju quilhilaktsꞌintaiti icnavita.
Chanich ju catalalh ju chakolun
2 Na kꞌox iclhiulai ji quiꞌalakꞌavin ni pꞌastꞌackꞌoyatꞌit tachi chun ju iclajuntauch chai naviyatꞌit tachi chun ju iclamalanitauch.
3 Para va iclacasqꞌuin ni amispꞌatꞌit ni yuchi ju Dios ju saꞌaktsulh junita laꞌisꞌatsucunti ju Cristo.
Chai yuchi ju Cristo ju saꞌaktsulh junita laꞌisꞌatsucunti tachi chun ju jokꞌatni ju talhilacaꞌanta ju Cristo.
Chai ju jokꞌat saꞌaktsulh junita laꞌisꞌatsucunti tam chakoꞌulh.
4 Pus na lhimaxan acsni aktanun ju ixꞌaktanut tam jokꞌat acsni tꞌachivinin ju Dios chai acsni najun ixchivinti Dios.
5 Chai vachuꞌ na lhimaxan ni jantu lakpaxtakcanta ju tam chakoꞌulh acsni tꞌachivinin ju Dios chai acsni najun ixchivinti Dios.
Pus ni jantu lakpaxtakcanta pus va ixtꞌachunchach junita tachi acsni va casitmakꞌalh ju ixꞌai.
6 Ju tam chakoꞌulh ni jantu lakpaxtakputuncan pus chach lana lakpalipipi va.
Para ni lhimaxan lhiulai ni va casitlh ju ixꞌai u ni va lakpalipipich cava pus yuchi calhilakpaxtakcalh.
7 Ju tam jokꞌat jantu catilakpaxtakcalh ni navicalh tachi ju Dios.
Chai laꞌisꞌatsucunti putasui ni vasalh kꞌai ju Dios.
Chai laꞌisꞌatsucunti tam chakoꞌulh putasui ni na kꞌai ju jokꞌat.
8 Pus ju Dios acsni tavanan navilh ju pꞌulhnan jokꞌat jantu laꞌixlacatuna ju chakoꞌulh ju maxtulh.
Alai laꞌixlacatuna ju jokꞌat ju maxtulh ju pꞌulhnan chakoꞌulh.
9 Chai ju pꞌulhnan jokꞌat jantiyuꞌ lhinavicalh ni caꞌixꞌalilh tam chakoꞌulh ju va ixmaktasqꞌuinich ju ixlakꞌau.
Alai yuchi lhinavicalh ju chakoꞌulh ni na ixmaktasqꞌuinich ixlakꞌau ju anuꞌ jokꞌat.
10 Pus ixlhiyuchach ju tam chakoꞌulh calhilakpaxtakcalh ni anch ju caputasuyaꞌ ni maklacaꞌanita ju ixpapa.
Vachuꞌ yuchi chunch calhilalh va ixlacata ju anquilhnin ju anch tavilanalh.
11 Para ju Dios lhilhcata ju isꞌatsucuntiꞌan ixtꞌiyunꞌan ni talamaktasqꞌuini.
12 Pus ju pꞌulhnan chakoꞌulh laꞌixlacatuna ju jokꞌat ju maxtucalh.
Chai ju chavai laꞌixmacni ju chakoꞌulh ju lakꞌajun ju jokꞌat.
Para Dios ju anavikꞌo chux ixtꞌiyunꞌan.
13 Pus aquilajunau.
Ja lhijun ni catꞌachivinilh ju Dios ju tam chakoꞌulh acsni jantu lakpaxtakcanta.
14 Ju va lamintacꞌatsanꞌan miꞌakstuꞌan ja jantu lai machꞌakxayatꞌit ni lhimaxan catasu ju tam jokꞌat ni calakꞌaya ju ixꞌai.
15 Para ju tam chakoꞌulh ni lakꞌayanicantach ju ixꞌai pus ixmakꞌoxinch junita ju chakoꞌulh.
Tachi ju va ixlhilakpaxtakcanch junita ni laklhman ju ixꞌai.
16 Para ni alin tam xamatiꞌ ju va lhilasaputun ju ani chivinti pus camachakxa ni va chunch ju iclhilanitauch ju quijnan chai ju aliꞌin lapanacni ju talhilacaꞌanta ju Cristo.
Jantu kꞌox talai ju aliꞌin acsni tatakꞌaixtꞌokꞌa ni pastaccan ixꞌaninti ju Jesús
17 Pus ju chavai iclajumputunau ixlacata tuchꞌi layatꞌit acsni tꞌakꞌaixtꞌokꞌatꞌit.
Pus lana jantu kꞌox iclhiulai tachi ju layatꞌit.
Pus acsni tꞌakꞌaixtꞌokꞌatꞌit jantu laꞌaktꞌaiꞌuyatꞌit.
Alai va lhilakꞌalhipꞌalatꞌit ju miꞌatsucuntiꞌan.
18 Ickꞌasmatꞌa ju quitꞌin ni jantu va quilhmactam untꞌatꞌit acsni tꞌakꞌaixtꞌokꞌatꞌit ju lamimpujitatꞌan.
Chai paitat iclacaꞌi ni chunch ju untꞌatꞌit.
19 Para ca aktsꞌiya tasqꞌuini ni jantu va quilhmactam aꞌuntꞌit.
Ju chunch cataputasuyach ju vasalh tanaviniputun ixkꞌachat ju Dios chai tichi chavaich ju jantu.
20 Pus ju uxijnan tꞌakꞌaixtꞌokꞌatꞌit chai nonatꞌit ni kꞌotpꞌutꞌunatꞌit ju vino chai upꞌutꞌunatꞌit ju xkapavati ju ixpupastaccan ixꞌaninti ju Jesús.
Para jantu vasalh pꞌastꞌacꞌatꞌit ju ixꞌaninti ju Jesús ni quilhmaclhu untꞌatꞌit.
21 Pus ju uxijnan acsni venatꞌit pus ju pumatamin pumatamin va isꞌakstu uchokoi ju lhiminta mas jantucaꞌ tolhkꞌocan junta vencan.
Pus ju chunch ju aliꞌin jantuch lai talhilai.
Chai ju aliꞌin lhu takꞌotꞌa ju vino chai talactꞌakꞌapꞌaich.
22 Chunch ju layatꞌit tachi ju va matich ju minchakaꞌan junta lai avaꞌintꞌit chai lai akꞌotꞌit ju vino.
Tachi ju va jantu tuꞌuꞌ lalhiulayatꞌit ju uxijnan ju aliꞌin ju talhilacaꞌanta ju Cristo vachuꞌ.
Chai va amamaxaniyatꞌit ju quilhpatinin ni jantu na lhu talhimin ju ixvaitiꞌan.
Pus tas aclajunauch.
Ju uxijnan ja nonatꞌit ni kꞌoxich aclhiulayaꞌ ju chunch.
Pus iclajunau ni lana jantu kꞌox iclhiulai tachi ju layatꞌit.
Ta yu taiꞌulalh ju vaiti ixpupastaccan ixꞌaninti ju Jesús
23 Pus isꞌakstu Jesús ju quijuni tuchi iclamasunitauch ixlacata ju vaiti ju pupastaccan ixꞌaninti.
Pus ju anuꞌ atatsꞌisni acsni makꞌaxtakcalh ju Jesús pus ju yuchi chꞌapalh lakatam xkapavati.
24 Chai acsni xtaknilh lakꞌailaktsꞌiuch ju Dios pus lana chꞌekꞌelh ju xkapavati chai ma ajunilh ju ixꞌamamakaꞌui:
“Axakꞌatꞌaꞌitꞌit.
Aꞌutꞌitch.
Ju ani xkapavati ju iclaxtakniyau yuchi ju quilacatuna ju acxtꞌakꞌaꞌ ju milacataꞌan.
Va tsa chani alatꞌit ni laich apꞌupꞌastꞌacꞌaꞌitꞌit ju quiꞌaninti ju milacataꞌan”.
Ma chunch ju ajuni ju Jesús.
25 Chai ju astan acsni tavenkꞌolhch pus ju Jesús chꞌapalh ju vaso ju ixputajun ju vino chai ma ajuni ju ixꞌamamakaꞌui:
“Ju ani ma vino yuchi ju quiꞌacꞌalhni ju mavasalai ju sastꞌi chivinti ju iclalhitꞌatakꞌoxiyauch ju uxijnan.
Pus va ta pakchux ju akꞌotꞌaꞌitꞌit va aquilapupastꞌacꞌauch ju quitꞌin”.
Chunch ju quimavasalanilh isꞌakstu ju Jesús.
26 Pus iclajunau ni va ta pakchux ju aꞌuyaꞌitꞌit ju ani xkapavati chai akꞌotꞌaꞌitꞌit ju ani vino pus va apꞌumalacꞌasuyaꞌitꞌit ni vasalhch nilh ju Jesús ju milacataꞌan.
Chai chunch ju atꞌailhipꞌitꞌit tus acsni caminchokoyaꞌ ju yuchi.
Chani alatꞌit acsni va pꞌastꞌacpꞌutꞌunatꞌit ixꞌaninti ju Jesús
27 Chai ni chunch ju naulh ju Jesús pus na kꞌai talakꞌalhin canavi va tichi chavaich ju jantu kꞌox junita ju isꞌatsucunti laꞌixmacni Dios acsni caꞌuyaꞌ ju anuꞌ xkapavati chai cakꞌotꞌaꞌ ju anuꞌ vino ju ixpupastaccan ixꞌaninti ju Jesús.
Tachi ju va jantu tuꞌuꞌ ixtapalhni lhiulai ixlacatuna chai ixꞌacꞌalhni ju Jesús.
28 Pus va ta pakchux ju cakꞌotꞌaꞌ ju vino chai caꞌuyaꞌ ju xkapavati pus tasqꞌuini ni cacꞌatsa ju pumatamin pumatamin ta yu junita ju ixꞌalhunut isꞌakstu laꞌixmacni Dios u alin ixtalakꞌalhin ju jantu macꞌacxanicanta u jantu.
29 Pus ni xamatiꞌ cakꞌotꞌaꞌ ju anuꞌ vino chai caꞌuyaꞌ ju anuꞌ xkapavati chai jantu canavi cuenta ni chunchach ju pupastaccan ixꞌaninti ju Jesús pus isꞌakstu ulanichokocan ixtalakꞌalhin.
30 Chai ni alin ju sia milhiꞌuxijnan ju chunch ixtalai pus ixlhiyuchi na lhu alin ju lamilhiꞌuxijnan ju jantu lactachapunin tajunita chai ju va talactakꞌankꞌai chai na lhu ju tapunita.
31 Pus ni va cacꞌatsauch ta yu junita ju quiꞌalhunutꞌan laꞌixmacni Dios chai jantu va kꞌaya calauch pus ju chunch ju Dios jantu aquintamamakꞌalhkꞌajniyan.
32 Para acsni quintamamakꞌalhkꞌajniyan ju Dios pus ju yuchi va lacasqꞌuin ni camacajuch ju macxcai.
Chai ju chunch pus jantu aquintamamakꞌalhkꞌajniyan ju Dios tachi ju caꞌamamakꞌalhkꞌajnikꞌalhiyach ju jantu talhilacaꞌanta ju Jesús.
33 Pus ji quiꞌalakꞌavin acsni tꞌakꞌaixtꞌokꞌatꞌit acsni upꞌutꞌunatꞌit ju anuꞌ ixpupastaccan ixꞌaninti ju Jesús pus alapꞌacxantꞌitch acsni avenaꞌitꞌit.
34 Chai ni xamatiꞌ ju na chavani pus chach venchalh laꞌixchakaꞌ.
Pus ni chunch ju alatꞌit pus ju Dios jantu catamamakꞌalhkꞌajniyan.
Pus ju aliꞌ taxtokni astan aclajunau acsni aclalakchaꞌanchokoyauch.