Ju achꞌananaꞌ chꞌanlh ju tꞌin
13
Pus ju acsni avilhchan ju Jesús taxtulh ju lacachakaꞌ.
Chai tolhcha vanin laꞌixquilhtuꞌ ju atantsꞌin.
2 Chai ni na lhu talakchaꞌalh ju lapanacni pus ju yuchi taju lacabarco ni laich caꞌamalanikꞌolh ixchuxꞌan.
Anch ju tavi chai tachi chun ju lapanacni lacatꞌun tataya laꞌixquilhtuꞌ atantsꞌin.
3 Pus ju acsnich ju Jesús na lhu taxtokni ju xaꞌamalani ju lapanacni.
Para si lacatuꞌuꞌ chivinti ju ixtꞌalaktsꞌipaxcavaich ju tuꞌuꞌ.
Chani xaꞌajuni:
―Pumatam achꞌananaꞌ alh lhavanaꞌ ju ixꞌachꞌananti.
4 Chai acsni ixtꞌajun lhavanaꞌ pus lacatsꞌunin ju xatꞌin tamacha va lacati.
Chai tamilh ju tsꞌokꞌo chai tasacꞌulh.
5 Chai ju aliꞌ ju xatꞌin tamacha laꞌixꞌucxni chiux junta matiꞌ lhu ixjunita ju tꞌun.
Pus ju yuchi va tsꞌalhti pꞌunlh ni matiꞌ lhu ixjunita ju tꞌun.
6 Para acsni xajchilh ju avilhchan lana macchalh chai lana xixlh ni jantu makat ixtinui istisivic.
7 Chai ju aliꞌ ju xatꞌin tamacha junta vachuꞌ ixma ju xatꞌin alhtucunuꞌ.
Pus ju alhtucunuꞌ palai vatsꞌalhti takꞌaya chai akxtakmalh ju anuꞌ achꞌananti.
8 Para ju aliꞌ xatꞌin tamacha junta na kꞌox ixjunita ju tꞌun.
Chai ju yuchi pꞌunlh.
Takꞌaya.
Chai tocꞌalh ju xalhiꞌut.
Pus talhava ju akatamin achꞌananti.
Ju aliꞌ tocꞌalh tam cientos xalhiꞌut.
Ju aliꞌ tocꞌalh sesenta xalhiꞌut.
Chai ju aliꞌ tocꞌalh va lakapꞌuxamcau ju xalhiꞌut.
9 Pus va tichi chavaich ju alin ixpakꞌasmatni pus cakꞌasmatlich ju tuchi iclajunau.
Tajuch ni jantu vas ajuncan ju lapanacni
10 Pus ju acsnich ju ixꞌamamakaꞌui ju Jesús talakmilh chai chani tajuni:
―Tajuch ni va alacmalani ju lapanacni lacatuꞌuꞌ chivinti ju ixtꞌalaktsꞌipaxcavaich ju tuꞌuꞌ.
11 Chai ju Jesús alacjuni:
―Ju uxijnan lacꞌasqꞌuinicꞌantꞌatꞌit ni amachꞌakxayaꞌitꞌit ju chivinti ju najun ni lhinomputun ju Dios laꞌisꞌatsucuntiꞌan ju lapanacni.
Para ju aliꞌin lapanacni jantu alakꞌaꞌinican ni catamachakxa.
12 Pus ju lacaꞌi ju juncan pus aliꞌ cajuncanaꞌ chai lhu camachakxayaꞌ.
Para ju jantu lacaꞌiputun ju tuchi juncan pus camacꞌapꞌanicanaꞌ ju tuchi ixlacaꞌita.
13 Pus ju lapanacni ni lana jantu tamispai tuchi nomputun mas talaktsꞌin tuchi icnavi chai lana jantu talacaꞌi nin catamachakxa ju quinchivinti mas takꞌasmatꞌa pus yuchi icꞌalhilhixakꞌalai ju lapanacni lacatuꞌuꞌ chivinti ju ixtꞌalaktsꞌipaxcavaca ju tuꞌuꞌ.
14 Chai laꞌisꞌatsucuntiꞌan ju yuꞌunch uctaxtui ixchivinti ju makꞌaniya ixlapanac Dios ju Isaías ixjuncan.
Pus ju yuchi chani naulh:
Ju uxijnan slivasalh akꞌasmatꞌaꞌitꞌit para jantu lana amachꞌakxayaꞌitꞌit.
Chai slivasalh alacꞌavananaꞌitꞌit para jantu anaviyaꞌitꞌit cuenta tuchꞌi ju laktsꞌinatꞌit.
15 Chunch ju catapasayaꞌ lamiꞌatsucuntiꞌan ni na pꞌas xajun ju miꞌalhunutꞌan.
Chai lana jantu kꞌasmatꞌatꞌit tuꞌuꞌ.
Chai tachi ju va lakpustꞌoktꞌit ni va jantu tuꞌuꞌ laktsꞌimpꞌutꞌunatꞌit.
Chai jantu tuꞌuꞌ kꞌasmatpꞌutꞌunatꞌit.
Chai jantu tuꞌuꞌ machꞌakxapꞌutꞌunatꞌit.
Chunch ju layatꞌit ni jantu macꞌompꞌutꞌunatꞌit ju miꞌalactuꞌuntiꞌan ni laich aclamakꞌalhtaxtuch.
Chunch ju naulh ju Isaías.
16 Para na paxcat untꞌatꞌit ju uxijnan ji quintsꞌalan ni vasalh pꞌuꞌalacꞌavananatꞌit ju milakchulhꞌan chai pꞌakꞌasmatnanatꞌit ju miꞌakꞌaxkꞌolhꞌan.
17 Pus slivasalh ju iclajunau.
Na lhu ixꞌalin ju makꞌaniya ixlapanacni Dios chai ju aliꞌin makꞌaniya lapanacni ju soknicꞌa ixjunita ju isꞌatsucuntiꞌan ju na ixtalaktsꞌimputun ju tuchꞌi laktsꞌinatꞌit ju uxijnan.
Para jantu tavanan talaktsꞌilh.
Chai na ixtakꞌasmatputun ju tuchꞌi kꞌasmatꞌatꞌit para jantu tavanan takꞌasmatlh.
Ju Jesús mavasalai ju chivinti ixlacata ju achꞌananaꞌ
18 Ju Jesús tailhiꞌalh ju ixchivinti chai chani ju ajuni ju ixtamamakaꞌun:
―Pus akꞌasmatꞌit ju uxijnan tuchi nomputun ju chivinti ixlacata ju achꞌananaꞌ.
19 Pus ju tꞌin ju tamacha vanin laꞌixquilhtuꞌ ti yuꞌunch ju takꞌasmatꞌa ju chivinti junta najun ni lhinomputun ju Dios laꞌisꞌatsucuntiꞌan ju lapanacni.
Para ju yuꞌunch jantu tamachakxai.
Chai lana min ju lhacaticuru chai amacꞌapꞌani ju chivinti ju ixꞌachꞌananicanta laꞌixꞌalhunutꞌan.
20 Chai ju tꞌin ju tamacha laꞌixꞌucxni chiux yuꞌunch ju takꞌasmatꞌa ixchivinti Dios chai lana soko takꞌachani.
21 Para chunch tajunita tachi ju anuꞌ xapꞌun laꞌixꞌucxni chiux.
Jantu vasalh laꞌixlhichux ixꞌalhunutꞌan ju takꞌachani.
Va pantsꞌiquis ju talacaꞌi.
Para acsni min ju tuꞌuꞌ makꞌalhkꞌajnat u tuꞌuꞌ axcayanti va ixlacata ni talacaꞌi ju ixchivinti Dios pus lana tamacajun ixti ju Dios.
22 Chai ju tꞌin ju tamacha junta ixꞌalin ju xatꞌin alhtucunuꞌ pus yuꞌunch ju takꞌasmatꞌa ixchivinti Dios para va tachi talhamakꞌaninin ju xataxtokni ju ani lacamunutpaꞌ chai va taputaꞌokxchokꞌoi ju tumin.
Pus tachi chun ju ani taxtokni va amacꞌapꞌani ju chivinti ju ixchꞌananicanta laꞌixꞌalhunutꞌan chai jantu tavanan vasalh tasui ixtachaput ju Dios laꞌisꞌatsucuntiꞌan.
23 Para ju tꞌin ju tamacha lacakꞌoxi tꞌun yuꞌunch ju takꞌasmatꞌa ju ixchivinti Dios chai tamachakxai.
Chai lana tasui laꞌisꞌatsucuntiꞌan ixtachaput ju Dios.
Ju aliꞌin slivasalh lhu tasui ixtachaput Dios laꞌisꞌatsucuntiꞌan.
Ju aliꞌin palai na lacatsꞌunin chai ju aliꞌin palai tucan na lacatsꞌunin.
Pumatam chꞌanlh ju tꞌin ju jantu kꞌox laꞌixꞌachꞌananti apumatam
24 Chai ju Jesús ajunilh ju lapanacni ju ani alakatam chivinti ju ixtꞌalaktsꞌipaxcavaich ju tuꞌuꞌ.
―Junta lhinajun ju Dios chunch tapasai tachi ju tapasalh laꞌisꞌatsucunti pumatam lapanac.
Ju yuchi chꞌanlh ju kꞌoxi xatꞌin trigo laꞌixcuxtu.
25 Para ju tsꞌis acsni ilhtatacan pus milh ju ixtꞌalaxcai ju anuꞌ lapanac chai alhavanalh ju xatꞌin achꞌitin.
Va lhitayalh ju kꞌoxi tꞌin.
Chai acsni chꞌankꞌo pus lana taxtucha.
Alh.
26 Pus pꞌunlich ju kꞌoxi tꞌin chai vachuꞌ pꞌunlich ju xatꞌin achꞌitin.
Tatakꞌaya.
Para acsni tsuculh aliniꞌ ju xatocꞌat ju trigo acsnicaꞌ ju tasu ju achꞌitin ju ixchꞌancanta.
27 Pus ju acsnich ixlapanacni ju amatꞌun talakmilh chai tajuni:
“Ja jantu xachꞌan ju kꞌoxi tꞌin lamincuxtu.
Pus tas anchach ju xaminacha ju va achꞌitin”.
28 Chai ju amatꞌun ajunich:
“Yuchi ju quintꞌalaxcai ju xachꞌan ju xatꞌin ju va achꞌitin”.
Chai ju acsnich ju ixlapanacni tasacmich.
Tajunich:
“Ja lacꞌasqꞌuin ni acꞌauch laxtunin”.
29 Para ju yuchi chani ajuni:
“Jantu ni va lai tꞌapꞌulhutꞌit ju kꞌox achꞌananti acsni tꞌipꞌulhuyatꞌit ju achꞌitin.
30 Amacꞌaꞌuntꞌit.
Chach takꞌaya kꞌaixtam tus acsni caꞌalinach ju xatocꞌat.
Ju acsnich chani acꞌajunaꞌ ju catapꞌuxaꞌ:
Pꞌulhnan apꞌulhutꞌitch ju achꞌitin.
Chai apꞌachꞌimayaꞌitꞌit makxapatamin ni laich caxavacanaꞌ.
Chai astan apꞌulhutꞌit ju trigo chai amakꞌatꞌit laquimpacꞌatsꞌa”.
Ju Jesús apumalani ju lapanacni ju xatꞌin mostaza
31 Ju Jesús alacjuni ju lapanacni alakatam chivinti ju ixꞌapumavasalaniputun ni lhu catalhilaksiyaꞌ ju Dios acsni talaktsꞌin ni lhinajun ju yuchi laꞌisꞌatsucuntiꞌan ju aliꞌin ixtꞌalapanacni.
Pus chani ju ajuni:
―Acsni lhinajun ju Dios laꞌisꞌatsucuntiꞌan ju lapanacni pus chunch ju tapasai tachi ju tapasai acsni chꞌancan ju xatꞌin mostaza.
32 Ju anuꞌ xatꞌin yuchi ju palai lacatꞌicstꞌi tachi chun ju tꞌin.
Para acsni takꞌayai na kꞌalhapakꞌai jun.
Tasui tachi ju lacatꞌicstꞌi qꞌuiu.
Chai ju tsꞌokꞌo tamin chai tamucꞌai ixpamalhiquiꞌan laꞌixꞌacatan.
Ju Jesús apumalani ju lapanacni ju xatꞌin xkapavati
33 Ju Jesús vachuꞌ alacjuni ju lapanacni alakatam chivinti ju ixꞌapumavasalaniputun tuchi tapasai acsni lhinajun ju Dios laꞌisꞌatsucuntiꞌan ju lapanacni.
Pus chani ju ajuni:
―Acsni lhinajun ju Dios laꞌisꞌatsucuntiꞌan ju lapanacni chunch ju tajunita tachi ju tuꞌuꞌ xatꞌin xkapavati ju calhiyaulh tam chakoꞌulh ju lakatꞌutu achꞌapanta ju harina.
Pus lana lhitayakꞌojui chux.
Tajuch ni va chunch xaꞌamalaninin ju Jesús
34 Tachi chun ju ani taxtokni ju Jesús ajunkꞌo ju lapanacni lacatuꞌuꞌ chivinti ju ixtꞌalaktsꞌipaxcavaich ju tuꞌuꞌ.
Jantu lana tuꞌuꞌ ju vas ajunilh.
35 Chai ni chunch ju navilh ju Jesús pus uctaxtulh tuchi ju naulh ju makꞌaniya lapanac ju ixnajun ixchivinti Dios.
Chani ma xanajun ju yuchi:
Acꞌalhixakꞌalayaꞌ ju lapanacni lacachivinti ju tꞌalaktsꞌipaxcavacan ju tuꞌuꞌ.
Acꞌajunaꞌ ju taxtokni ju jantu ixtamachakxai ju lapanacni tus laꞌixputaiꞌulacan lacamunutpaꞌ.
Ju Jesús amavasalai tuchi nomputun acsni chꞌanlh ju trigo ju anuꞌ lapanac
36 Pus ju acsnich ju Jesús amacꞌamilh ju lapanacni chai milh laꞌixchakaꞌ.
Pus lana talakmilh ju ixꞌamamakaꞌui chai tajunich:
―Aquilamavasalaniu ju chivinti ixlacata ju tꞌin ju jantu kꞌox ju ixchꞌancanta laꞌixtꞌun ju anuꞌ lapanac.
37 Pus ju acsnich chani alacjuni ju Jesús:
―Pus quitꞌin ju icchꞌan ju kꞌoxi xatꞌin.
Quitꞌin ju quimalakachatachilh ju Dios ni lapanac actsucuyaꞌ ju ani.
38 Chai ju lacacuxtu yuchi ju lacamunutpaꞌ.
Chai ju kꞌoxi tꞌin yuꞌunch ju alhcanicanta ni laich catatanu ju lactꞌiyan junta lhinajun ju Dios.
Chai ju tꞌin ju jantu kꞌox ixjunita yuꞌunch ju na kꞌai tajunita.
39 Chai ju anuꞌ ixtꞌalaxcai ju amatꞌun ju chꞌanlh ju tꞌin ju jantu kꞌox yuchi ju lhacaticuru.
Chai acsni ixchakxꞌican ju xatocꞌat yuchi ixꞌaclanti ju lacamunutpaꞌ.
Chai ju taꞌi ju xatocꞌat yuꞌunch ju anquilhnin.
40 Chai tachi ju tatipꞌulhulh ju achꞌitin ju jantu kꞌox ixjunita chai talacxava pus chunchach vachuꞌ catapasayaꞌ laꞌixꞌaclanti ju lacamunutpaꞌ.
41 Pus ju quitꞌin acmalakachatachilh ju quiꞌanquilhnin.
Ju quitꞌin ju quimalakachatachilh ju Dios ni lapanac actsucuyaꞌ ju ani.
Chai ju quiꞌanquilhnin catamakꞌaixtꞌokꞌach chai catatamacxtuyaꞌ laquimpuꞌucxtin tachi chun ju lapanacni ju taꞌalactuꞌunun chai tachi chun ju amakꞌalhkꞌosui ju aliꞌin lapanacni.
42 Chai caꞌamacaꞌancanach lacajipi.
Pus ju anch catakꞌalhunanta chai catalamatantsꞌacayach istatsalatꞌan ni na catamakꞌalhkꞌajnanaꞌ.
43 Pus ju acsnich ju alaktsꞌincan ni soknicꞌa laꞌixmacni Dios slapꞌapꞌa catasuyach tachi ju tasui ju avilhchan.
Chunch catajunaꞌ junta lhinajun ju quimpaiꞌan.
Pus ju alin ju ixpakꞌasmatni chach kꞌasmatlh ju iclajunau.
Ju chivinti ixlacata ju tumin ju ixmacnucanta ju lacatꞌun
44 Junta lhinajun ju Dios chunch junita tachi ju tuꞌuꞌ tumin ju ixmacnucanta ju lacatꞌun.
Pus pumatam lapanac lhitajulh ju anuꞌ tumin para lana macnuchokolh.
Chai ni na ixlhikꞌachanta pus lana stꞌakꞌo tachi chun ju ixꞌalinta chai lhitamaulh ju anuꞌ lacatꞌun.
Ju chivinti ixlacata ju chiux ju na laklhu ixtapalh
45 Junta lhinajun ju Dios vachuꞌ chunch junita tachi ju tam lapanac ju ixmalakxtui ju chiux ju laklhu ixtapalh.
46 Pus acsni lhitajulh lakatam chiux ju slivasalh na kꞌox ixjunita pus ju anuꞌ lapanac alh chai stꞌakꞌo tachi chun ju ixꞌalinta chai lhitamaulh ju anuꞌ chiux.
Ju chivinti ixlacata ju chꞌokxni
47 Junta lhinajun ju Dios vachuꞌ chunch junita tachi lakatam chꞌokxni ju macaꞌancalh lacaꞌalama chai anch ju tanulh tijpachux ju pamata.
48 Chai acsni aktsamalh ju chꞌokxni pus ju ixchꞌapanin pamata taxakꞌalhiꞌalh lakꞌakxixni.
Chai anch tatꞌatavilhch chai tatsuculh maxtunin ju pamata ju kꞌox.
Tatsuculh munin laꞌispastiꞌan.
Chai tamakꞌalh ju jantu kꞌox.
49 Pus chunchach vachuꞌ catapasayaꞌ laꞌixꞌaclanti ju lacamunutpaꞌ.
Cataminach ju anquilhnin chai catasacxtuyaꞌ ju alactuꞌunin.
Catamaconach ju laktsꞌincan ni soknicꞌa laꞌixmacni Dios.
50 Chai camacaꞌancanach ju alactuꞌunin lacajipi.
Chai ju anch catakꞌalhunanta chai catalamatantsꞌacayach istatsalatꞌan ni na catamakꞌalhkꞌajnanaꞌ.
Ju tam lapanac lai maxtui ju ixmakꞌalit mas yuchi ju va ancaꞌ makꞌata u yuchi ju makꞌanchich makꞌata
51 Pus ju acsni ju Jesús chani asacmilh ju ixꞌamamakaꞌui:
―Ja machꞌakxayatꞌit tachi chun ju ani ju iclajuntau.
―Tachi chun ju lapanacni ju talhatalanininta ju ixchivinti Dios chai talakꞌaꞌita ni calhinaulh ju Dios laꞌisꞌatsucuntiꞌan pus chunch tajunita tachi tam makꞌaliꞌ.
Ju yuchi lai maxtui laꞌixmakꞌalit ju taxtokni acsni maktasqꞌuinican.
Lai maxtui ju va ancaꞌ makꞌata u yuchi ju makꞌaniya makꞌatach.
Pus vana va chun ju anuꞌ lapanacni.
Ju yuꞌunch vachuꞌ lai tamaxtui ju chivinti ju tamakꞌata laꞌixꞌalhunutꞌan ni laich catapuꞌaktaiju tam xamatiꞌ.
Lai catamaxtulh ju chivinti ju makꞌanch tacꞌatsata u yuchi ju va ancaꞌ xatalani.
Ju Jesús ixvi ju lakꞌachakꞌan Nazaret
53 Pus ju Jesús acsni nonkꞌo tachi chun ju ani chivinti ju ixtꞌalaktsꞌipaxcavaich ju tuꞌuꞌ pus taxtulh ju anch.
54 Milh laꞌixtꞌun.
Chai tsuculh amalaniniꞌ laꞌixpujitatꞌan ju istꞌaꞌisraelitanin.
Chai ixtꞌaꞌamachakꞌan na talhamakꞌaninilh chai chani tanaulh:
―Tas anchach nuꞌ ju xalani ju ani chivinti.
Tas laich lhinavi ju kꞌai lhamakꞌan.
55 Ni yuchi jumpalat ju istsꞌalh ju axpitniꞌ.
Chai ixnati yuchi ju Malia.
Chai ju isꞌapꞌisekꞌen yuꞌunch ju Jacobo chai José chai Simón chai Judas.
56 Chai isꞌapꞌisekꞌen atsiꞌin ni ani tatꞌajun vachuꞌ.
Pus tas anchach ju xalani ju ani taxtokni.
57 Pus talhixcailich.
Para ju Jesús chani ajuni:
―Ju lapanac ju najun ixchivinti Dios kꞌox lhiulacan vanta anchach ju an.
Va ixtꞌaꞌamachakꞌan chai ju tatanumanalh laꞌixchakaꞌ ju jantu kꞌox talhiulai.
58 Pus ju anch jantu lhu xanavi ju kꞌai lhamakꞌan va ixlacaꞌatalh ni jantu ixtalhilaksi ju yuchi.