Maknicalh ju Xivan ju amakpaxanaꞌ
14
Pus acsni ixtꞌajun tapasanaꞌ ju ani taxtokni pus ju Herodes kꞌasmatlh ixlacata ju Jesús.
Pus ju Herodes gobernador ixjunita.
2 Chai ju yuchi chani ajuni ju ixlapanacni:
―Ju anuꞌ ju Jesús talhixakꞌalai yuchach ju Xivan ju amakpaxanaꞌ.
Ju yuchi ca va lokꞌonchokolh junta quimacnucalh chai yuchi na kꞌai lhamakꞌan lhinavi.
―Chunch ju ajuni ju ixlapanacni.
3 Pus acsni ixtꞌajuncaꞌ ju Xivan pus ju Herodes ixlhinajunta ixchꞌapaca.
Chai lhinaulh ixmakchꞌica chai ixtꞌalhnuca.
Chunch ju ulhtucalh va ixlacaꞌatalh ju Herodías ju ixꞌamachakaꞌ ixjunita ju ispꞌisekꞌe ju Pilipe ixjuncan.
Para ju acsnich yuchi ju Herodes ixtꞌatꞌajun.
4 Pus ju Xivan acsni tucaꞌ ixtꞌalhnucanta chani ixjunita ju Herodes:
―Jantu lhijun ju lhamapꞌaksin ni va atꞌatsꞌucꞌuchꞌokꞌoch ju ixꞌamachakaꞌ ixjunita ju mimpꞌisekꞌe.
5 Pus ju Herodes lana ixlhinomputun ixmaknica ju Xivan para va ixꞌatalhoni ju lapanacni.
Pus ju yuꞌunch ixtanajun ni ixlapanac Dios ixjunita ju Xivan.
6 Para acsni chilh ju avilhchan acsni cꞌatanilh ju Herodes pus istsiꞌ ju Herodías tanucha junta ixtavilanalh ju lapanacni chai tsuculh atꞌiniꞌ.
Pus ju Herodes slivasalh na kꞌachanilh ju atꞌinti.
7 Pus lhipastacnilh Dios chai junilh ju atsiꞌ ni caxtakniyaꞌ va tuchi casqꞌuiniyach.
8 Pus ju anuꞌ atsiꞌ junilh ju Herodes tachi ju ixjunita ju ixnati.
Naulh:
―Aqꞌuixtꞌakninch laca tuꞌuꞌ kꞌai casavila ju isꞌaktsulh ju Xivan ju amakpaxanaꞌ.
9 Pus ju gobernador lana na amakꞌaninilh acsni kꞌasmatnilh ixchivinti ju anuꞌ atsiꞌ.
Para ni ixlhipastacta ju Dios acsni junilh ju atsiꞌ ni caxtakniyach va tuchi casqꞌuiniyach chai ni ixtakꞌasmatꞌa ju ixtavilanalh anch pus jantu lai junilh ni jantu.
Aktsꞌiya lhinaulh ixtaknica ju tuchi xasqꞌuinch ju atsiꞌ.
10 Pus malakachalh ju ixtaropa chai ju yuchi alh.
Maknilh ju Xivan lacapulachꞌin.
11 Chai lhiminicalh ju isꞌaktsulh lacakꞌai casavila.
Chai xtaknilh ju atsiꞌ.
Chai ju yuchi lana lhiꞌanilh ju ixnati.
12 Pus ju acsnich tachincha ju ixꞌamamakaꞌui ju Xivan.
Taquiꞌi ju ixlacatuna chai taquimacnu.
Astan taquimacꞌatsanilh ju Jesús.
Ju Jesús amava lakaquis milh jokꞌatni
13 Pus ju Jesús acsni cꞌatsa ni ixmaknicanta ju Xivan pus lana taxtulh.
Taju lacabarco chai alh ju lacatam junta va aseknicꞌa ixjunita.
Para ju lapanacni tacꞌatsapa chai tataxtulh lakꞌachakꞌanixni.
Tachꞌajaxꞌalh junta ixtanajun ni cachaꞌanaꞌ ju Jesús.
14 Pus ju Jesús acsni tacutcha lacabarco laktsꞌilh ni na lhu ixtatakꞌaixtokta ju lapanacni.
Pus na amapaini ju yuꞌunch chai acꞌuchꞌulh ju ixtalactakꞌankꞌai sia lhiyuꞌunch.
15 Para acsni tokꞌoxalh pus talakꞌalh ju ixꞌamamakaꞌui chai tajuni:
―Ju ani slivasalh ni na aseknicꞌa chai tapasalh ju hora acsni vencan.
Amalakꞌachꞌatꞌi ju lapanacni.
Chach taꞌancha ju lakꞌachakꞌanixni tamonin ixvaitiꞌan.
16 Para ju Jesús chani alacjuni:
―Jantu tasqꞌuini ni cataꞌalh.
Axtꞌaknitꞌit ju uxijnan ju vaiti.
17 Chai ju yuꞌunch tajuni:
―Para va xaman akxquis vati chai lakatꞌui pamata ju icmamatau ju ani.
18 Chai ju Jesús alacjuni:
―Aquilalhiminiuch.
19 Pus ju acsnich ju Jesús ajuni ju lapanacni ni catatavi lacaꞌatsꞌinan.
Chai ju yuchi chꞌapalh ju anuꞌ akxquis vati chai ju lakatꞌui pamata.
Chai talakstꞌalh ju lactꞌiyan chai xtaklh lakꞌailaktsꞌiuch ixlacata ju vaiti.
Astan chꞌekꞌelh ju vati chai ju pamata.
Chai axtaknilh ju ixꞌamamakaꞌui.
Chai ju yuꞌunch tatsuculh lhilaksakꞌonin ju lapanacni.
20 Pus taꞌokꞌolh ixchuxꞌan chai talhilalh.
Chai tasacchokolh ju xajcha ju jantu xataꞌokꞌojui chai talaktsama lakacautꞌui tankꞌalin.
21 Pus ju anuch ju tavailh ixtachaꞌanta lakaquis milh jokꞌatni.
Jantu aputꞌekꞌecalh ju chakolun nin ju askꞌatꞌan.
Ju Jesús alhtanalh laꞌixꞌucxni ju atantsꞌin
22 Pus ju acsnich ju Jesús lana pꞌas alacjuni ju ixꞌamamakaꞌui ni catataju lacabarco chai catapꞌulhꞌanchalh ju lhimakꞌantacutni ju atantsꞌin.
Pus ju yuchi tavilhcaꞌ ni laich caꞌamalakachachokoyaꞌ ju lapanacni laꞌixchakaꞌan.
23 Chai acsni taꞌankꞌo ju lapanacni pus ju Jesús alh junta akstijun ixjunita.
Alh tꞌachiviniꞌ ju Dios va isꞌakstu.
Chai acsni tokꞌoxalh pus va isꞌakstu ixvi ju Jesús ju anch.
24 Pus ju barco laꞌixlacaitat ju atantsꞌin ixchaꞌanta.
Para ni na pꞌas ixlai ju un chai na ixnekꞌespꞌit ju xcan pus jantu lai ixtamalhtanai ju barco.
25 Para acsni ixtꞌajun tuncuntilanaꞌ pus alakꞌalh ju Jesús.
Alhtanaꞌalh laꞌixꞌucxni xcan.
26 Para ju ixꞌamamakaꞌui acsni talaktsꞌilh ni alhtanaꞌantachalh laꞌixꞌucxni xcan lana na tatalhanalh.
Talaclajunich:
―Ca yuchi ju macxcai un.
Chai na talactꞌasalh ni na ixtatalhanan.
27 Para ju Jesús lana axakꞌala.
Chani alacjuni:
―Quitꞌin.
Jantu atꞌalhanantꞌit.
Akꞌachꞌantꞌit.
28 Pus ju acsnich ju Pitaluꞌ xakꞌala ju Jesús chai juni:
―Quiꞌucxtin ni vasalh uxintꞌiꞌat pus yauch aqꞌuiꞌun ni acꞌanchan pakxtoknun.
Acꞌalhtanaꞌanchalh laꞌixꞌucxni xcan.
29 Chai ju Jesús juni:
―Asokꞌoch.
Pus ju Pitaluꞌ lana tacutlh ju lacabarco.
Alhtanalh laꞌixꞌucxni xcan ni ixꞌamputun pakxtoknuꞌ ju Jesús.
30 Para acsni laktsꞌilh ni na pꞌas ixtꞌajun ju un pus lana talhanalh chai ixnitajuputun lacxcan.
Pus pꞌas tꞌasalh.
Naulh:
―Quiꞌucxtin aqꞌuimakꞌalhtꞌaxtꞌuch.
31 Pus ju Jesús lana xtaknilh ixmacaꞌ.
Macchꞌapacha chai chani juni:
―Tis va yuchach ji lapanac ni jantuch quilhilacꞌapꞌin.
Tas ni va xaqꞌuincꞌapꞌach.
32 Chai acsni tatajuchokolh ju yuꞌunch ju lacabarco pus lana sek va ju un.
33 Pus ju acsnich ju ixtatanumanalh lacabarco talakꞌayalh.
Tajunich:
―Slivasalh ni istsꞌalhꞌat Dios.
Ju Jesús acꞌuchꞌu ju amachakꞌan Genesaret
34 Acsni tachaꞌalh ju lhimakꞌantacutni ju atantsꞌin ju Jesús chai ju ixꞌamamakaꞌui pus tachaꞌalh ju xalacatꞌun Genesaret.
35 Chai ju amachakꞌan anch acsni tamispa ju Jesús pus lana tamalakachalh chivinti tachi chun ju lakꞌachakꞌanixni ju vanin ixvi.
Pus ju lapanacni talhiminilh ju Jesús tachi chun ju takꞌankꞌanin.
36 Chai tatapaininilh ni laich catalakchaꞌanilh mas va lacatsꞌunin ixquilhtuꞌ ixpumpuꞌ.
Pus ju Jesús alakꞌaꞌinilh.
Chai tachi chun ju talakchaꞌanilh ju ixpumpuꞌ palaich tava.