Ju ixtamamakaꞌun tapꞌuxlh ju xatocꞌat ju trigo
12
Pus lakatam avilhchan paꞌastacni ju Jesús ixtꞌajun tapasanaꞌ junta ixchꞌancanta ju trigo.
Vachuꞌ ixtatꞌaꞌanta ju ixꞌamamakaꞌui.
Chai ju yuꞌunch na ixtachavanita chai ixtapꞌuxlhiꞌanta ju xatocꞌat ju trigo chai ixtaꞌui.
2 Para acsni taꞌalaktsꞌinilh ju fariseonin tajunilh ju Jesús:
―Alaktsꞌich.
Ju mintamamakaꞌun va tanavich ju lhichꞌalhcat.
Para jantu lhijun ni chunch ju catalalh ni va avilhchan paꞌastacni junita.
3 Para ju Jesús chani alacjuni:
―Ja lana jantu pꞌastꞌacꞌatꞌit tuchi navilh ju David acsni chavanilh ju yuchi chai chux ju ixtatꞌaꞌanta.
4 Ja lana jantu pꞌastꞌacꞌatꞌit ni lai tanu junta ixlakꞌayacan ju Dios chai ulh ju xkapavati ju ismokslanicanta ju Dios.
Chai ju anuꞌ xkapavati jantu lai va kꞌaya ixꞌucan.
Va yuꞌunch ju palijni ju lai ixtaꞌui.
5 Chai ja lana jantu pꞌastꞌacꞌatꞌit tachi ju najun lacalhamapꞌaksin ju tsꞌoklh ju Moisés.
Ju anch ma najun ni matiꞌ ixtalakꞌalhinꞌan ju palijni mas tachꞌalhcatnan junta lakꞌayacan ju Dios ju avilhchan paꞌastacni.
6 Pus ni alin ju lhamapꞌaksin ni lai tachꞌalhcatnan ju palijni junta lakꞌayacan ju Dios mas avilhchan paꞌastacni junita pus iclajunau ni vana jantu talakꞌalhin tuchi xatanavi ju quiꞌamamakaꞌunti ni palai tuꞌuꞌ ju quilhamapꞌaksin ju quitꞌin.
Palai jantu ju anuꞌ makꞌaniya lhamapꞌaksin.
7 Para ca jantu xamachꞌakxayatꞌit ju ixchivinti Dios ju tsꞌokcanta junta ma chani najun ju Dios:
“Ju quitꞌin iclacasqꞌuin ni alaꞌaktꞌaiꞌutꞌit lacaꞌamapaininti.
Jantu va yuchi ni aquilalhikꞌailaktsꞌiu ju tuꞌuꞌ atapacxat”.
Ni ca ixmachꞌakxatꞌit ju tuchi nomputun ju chunch pus jantu caꞌixꞌamucꞌanitꞌit ixtalakꞌalhinꞌan ju lapanacni ju jantu tuꞌuꞌ macxcai tanavita.
8 Pus quitꞌin ju lai icnajun tuchi lai navican ju avilhchan paꞌastacni.
Quitꞌin ju quimalakachatachilh Dios ni lapanac actsucuyaꞌ ju ani.
Ixꞌalin pumatam lapanac ju va ixixnita ju ixmacaꞌ
9 Pus ju Jesús taxtucha ju anch.
Milh laꞌixpujitatꞌan ju istꞌaꞌisraelitanin.
10 Chai ju anch ixtanumacha pumatam lapanac ju va ixixnita ju ixmacaꞌ.
Chai ju aliꞌin ju vachuꞌ anch ixtatanumanalh va ixtapuxconiputun ixtalakꞌalhin ju Jesús.
Chai yuchi chani talhijuni:
―Ja lai acꞌuchꞌununcan ju avilhchan paꞌastacni.
11 Chai ju Jesús chani alhikꞌalhtayanalh:
―Ju tam xamatiꞌ ju milhiꞌuxijnan ni capacxalh lakatam ixborrego chai ju yuchi cataju junta puculhucnicꞌa ju avilhchan paꞌastacni ja jantu caꞌalh macutunuꞌ.
12 Chai aktsꞌiya palai tapalai ju isꞌatsucunti ju tam lapanac.
Palai jantu ju va tuꞌuꞌ borrego.
Pus yuchi lai lhinavican ju kꞌox ju avilhchan paꞌastacni.
13 Pus ju acsnich ju Jesús chani juni ju anuꞌ lapanac:
―Alhitꞌach ju mimacaꞌ.
Chai acsni xtaknilh ju ixmacaꞌ pus lana takꞌoxilh.
Lana ixtꞌachunch va tachi ju ixjunita ju ixtamactam.
14 Para ju fariseonin lana tataxtulh chai talacchivinilh sia yuꞌunch ixlacata ju Jesús ta yu laich catapumakni.
Chani ixtanajun ju makꞌaniya ixlapanacni Dios ixlacata ju Jesús
15 Pus ju Jesús acsni cꞌatsa tuchi ixtapastꞌacꞌa ju fariseonin pus taxtuchokolh ju anch.
Chai lhu lapanacni tachꞌakꞌokꞌalh.
Chai ju Jesús palaich anavikꞌo tachi chun ju takꞌankꞌanin.
16 Chai slivasalh alhimapꞌaksi ni jantu catanaulh tichi lapanac ju yuchi.
17 Chai ni chunch ju xachꞌalhcatnan ju Jesús pus uctaxtulh ju tuchi naulh ju makꞌaniya ixlapanac Dios ju Isaías ixjuncan.
Ju yuchi ma naulh ni ma chani naulh ju Dios ixlacata ju Jesús:
18 Yuchi ju ani ju quilapanac ju icsacxtuta.
Chai na icmapaini ju yuchi.
Na iclhikꞌachan ju yuchi.
Acxtakniyaꞌ ju quiSpiritu Santu.
Chai ju yuchi caꞌajunaꞌ ju lapanacni ju jantu israelitanin tajunita ta yu laich catatakꞌalhtaxtulh.
19 Ju yuchi jantu calasayaꞌ nin pꞌas cachivinaꞌ.
Chai jantu xamatiꞌ cakꞌasmatniyaꞌ ni na pꞌas cachivinilh lacatijixni.
20 Ju yuchi jantu lana camucꞌaniyaꞌ ixtalakꞌalhin tam xamatiꞌ ju na xcai macajun ju amacxcai.
Chai ju yuchi jantu casamakꞌanaꞌ xamatiꞌ mas va lacatsꞌunin ju lhilaksi ju Dios.
Chunch ju canaviyaꞌ tus acsni caꞌalinaꞌ ju ixpuꞌucxtin junta si soknicꞌa cajunaꞌ.
21 Chai yuꞌunch ju jantu israelitanin catalhilaksiyaꞌ ju yuchi.
Ixtanajun ju lapanacni ni laꞌixtachaput ju lhacaticuru ju chꞌalhcatnan ju Jesús
22 Pus ju acsnich lhiminicalh ju Jesús pumatam lapanac ju ixtanun ju lhacaticuru laꞌixlacatuna.
Chai ju yuchi alakꞌachꞌix ixjunita chai va ixnunulata.
Pus ju Jesús cꞌuchꞌu.
Chai ju acsnich ju anuꞌ lapanac chivinilh chai alacꞌavanalh.
23 Chai tachi chun ju lapanacni va talhamakꞌaninilh.
Chai chani ixtanajun:
―Ju ani ja laich nuꞌ yuchi cava ju istsꞌalh David.
Ju ixnoncan ni camalakachatachilh ju Dios.
24 Para ju fariseonin acsni takꞌasmatlh ni chunch ixtanajun ju lapanacni tanaulh:
―Ju ani ya lapanac va tixcoxtui ju lhacaticuru laꞌixlacatuna tam lapanac laꞌixtachaput ju Satanás.
25 Pus ju Jesús mas jantu kꞌasmatnilh ixchivintiꞌan ju fariseonin para cꞌatsa tuchi ixtapastꞌacꞌa chai chani ajuni:
―Tachi chun ju kꞌai lacatꞌun junta lhinajun ju tam kꞌai ucxtin ni quilhmaclhu cajuncalh chai catalaclasa ju sia isꞌakstuꞌan pus va caꞌaclalh.
Chai ju amachakꞌan va tuchi lakꞌachakꞌan u tuchi chakaꞌ ju va catalaclakꞌailh ju sia ixlhiꞌakstuꞌan pus jantu lai va lakputam catitatsucukꞌalhi.
26 Pus vana va chun ju lhacaticuru.
Ju yuchi ni caꞌatixcoxtulh ju aliꞌin ixtꞌalhacaticurulhni pus tachi ju va atꞌalasai ju ixlapanacni.
Chai ju chunch jantu lai catilhinonkꞌalhi laꞌixpuꞌucxtin.
27 Ju uxijnan nonatꞌit ni laꞌixtachaput ju Satanás ju ictixcoxtui ju lhacaticurulhni.
Para ju mintamamakaꞌun vachuꞌ tamaktasqꞌuini ni xamatiꞌ caꞌaxtaknilh ixtachaputꞌan ni laich catatixcoxtuyaꞌ ju lhacaticurulhni laꞌixlacatunaꞌan ju lapanacni.
Chai yuꞌunchach ju catajunan ni jantu slivasalh ni laꞌixtachaput ju Satanás ju apuxcoxtucan ju lhacaticurulhni tachi ju nonatꞌit ju uxijnan.
28 Alai laꞌixtachaput ju iSpiritu Santu Dios ju icꞌaxcoxtui ju lhacaticurulhni laꞌixlacatunaꞌan ju lapanacni chai yuchi lhitasui ni lhinajun ju Dios lamilhiꞌuxijnan.
29 Tas laich calhitanuyach tam xamatiꞌ laꞌixchakaꞌ apumatam ju na tachapun junita chai laich camaxtunilh ixtaxtokni ni jantu pꞌulhnan camacchꞌimalh.
Acsnicaꞌ ju laich camaxtunicalh ju ixtaxtokni ni va jantu lai tamacyajui.
Pus ju Jesús naulh ju chunch ni va ixꞌamamachakxaniputun ju lapanacni ni yuchi ju tꞌalalhajalh ju lhacaticuru chai yuchi lai alhixcoxtui ju lhacaticurulhni laꞌixlacatunaꞌan ju lapanacni.
30 Chai tailhiꞌalh ixchivinti ju Jesús.
Naulh:
―Pus ju jantu quintꞌaꞌanta yuchi ju quintꞌalaxcai junita.
Chai ju jantu quiꞌaktaijui ixmakꞌaixtꞌokꞌa ju lapanacni ju aquintalhilacaꞌanach pus va asastucnun.
31 Pus ni xaquilajunau ni laꞌixtachaput ju Satanás ju icxcoxtui ju lhacaticurulhni laꞌixlacatunaꞌan ju lapanacni pus yuchi iclalhijunau ni laich caꞌamacꞌacxanicanaꞌ ju lapanacni tachi chun ju alactuꞌunti ju tanavi chai tachi chun ju macxcai chivinti ju tanajun.
Para ni catanaulh macxcai chivinti ixlacata ju Spiritu Santu pus jantu lai tavanan catiꞌamacꞌacxanicalh.
32 Chai va tichi chavaich ju canonaꞌ macxcai chivinti ju quilacata pus camacꞌacxanicanaꞌ.
Quitꞌin ju quimalakachatachilh Dios ni lapanac actsucuyaꞌ ju ani.
Para va tichi chavaich ju canonaꞌ macxcai chivinti ixlacata ju Spiritu Santu jantu lai tavanan catimacꞌacxanicalh nin ani lacamunutpaꞌ nin astan.
Laxatocꞌat pucꞌatsacan tas junitach ju tuꞌuꞌ qꞌuiu
33 Ni kꞌox ju xatocꞌat ju tuꞌuꞌ qꞌuiu pus pucꞌatsacan ni na kꞌox ju xaqꞌuiu.
U ni jantu kꞌox ju xatocꞌat pus pucꞌatsacan ni jantu kꞌox ju xaqꞌuiu.
Pus laxatocꞌat ju pucꞌatsacan ju tuꞌuꞌ qꞌuiu.
Tamalhch ju kꞌox chai tamalhch ju jantu.
34 Pus vana va chun ju uxijnan.
Ju uxijnan ni slivasalh na kꞌai untꞌatꞌit pus tas laich alhinonaꞌitꞌit ju tuꞌuꞌ kꞌox.
Pus tuchi alin lamiꞌalhunutꞌan yuchach ju nonatꞌit.
35 Ju kꞌox lapanac maxtui laꞌixꞌalhunut ju kꞌoxi chivinti ni yuchach ju makꞌata laꞌixꞌalhunut.
Para ju tam lapanac ju kꞌai junita pus laꞌixpulacni ixꞌalhunut ju maxtui ju chivinti ju jantu kꞌox ni yuchach ju makꞌata laꞌixꞌalhunut.
36 Pus chani iclajunau.
Acsni cachinaꞌ ju avilhchan acsni camakꞌosaspitcanaꞌ ju lapanacni pus ju Dios caꞌulaniyaꞌ ixtalakꞌalhinꞌan tachi chun ju lapanacni ju ixtanajunta macxcai chivinti.
37 Pus va ixlacaꞌatalh ju macxcai minchivintiꞌan capucꞌatsacanaꞌ ni na kꞌai untꞌatꞌit chai ixlhiyuchi aꞌulanicꞌanaꞌitꞌit ju mintalakꞌalhinꞌan.
Para va tichi chavaich ju najun ju kꞌoxi chivinti pus capucꞌatsacanaꞌ ni soknicꞌa isꞌatsucunti laꞌixmacni Dios chai ixlhiyuchi jantu catiꞌulanicalh ixtalakꞌalhin.
Ju aliꞌin tasqꞌuin ju tuꞌuꞌ ju catapumispayaꞌ tichi chavaich ju Jesús
38 Pus ju acsnich chani tajuni ju Jesús ju aliꞌin sia yuꞌunch ju fariseonin chai aliꞌin sia yuꞌunch ju na ixtalhatalanininta ixlhamapꞌaksinꞌan ju istꞌaꞌisraelitanin.
―Amamakaꞌunuꞌ iclaktsꞌimputunau tuꞌuꞌ lhamakꞌan ju apꞌumavasalaꞌ ni vasalh Cristoꞌat ju ixnoncan ni camalakachatachilh ju Dios.
39 Para ju Jesús chani akꞌalhtayanalh:
―Ju lapanacni ju na kꞌai tajunita chai ju tamacajunta ju Dios yuꞌunchach ju tasqꞌuin tuꞌuꞌ lhamakꞌan ju catapumispayaꞌ ju Cristo.
Para jantu catiꞌaxtaknicalh tuꞌuꞌ atumpa.
Va yuchi ju caꞌamapastꞌacꞌanicanaꞌ tuchi ju tapasalh laꞌisꞌatsucunti ju makꞌaniya lapanacni ju Jonás ixjuncan.
Yuchi ju ixnajun ixchivinti Dios.
40 Pus ju Jonás lakatꞌutu avilhchan chai lakatꞌutu atatsꞌisni ixtajun laꞌixpajan ju kꞌai pamata.
Chai vana va chun ju quitꞌin.
Lakatꞌutu avilhchan chai lakatꞌutu atatsꞌisni actaꞌacnuyaꞌ lacatꞌun ju quitꞌin ju quimalakachatachilh ju Dios ni lapanac actsucuyaꞌ ju ani.
41 Chai acsni cachinaꞌ ju avilhchan acsni camakꞌosaspitcanaꞌ ju lapanacni pus ju amachakꞌan Nínive catatayayaꞌ.
Chai va ixlacataꞌan ju yuꞌunch pus aꞌulanicꞌanaꞌitꞌit ju mintalakꞌalhinꞌan.
Pus ju yuꞌunch tamacaulh ixꞌalactuꞌuntiꞌan acsni ajuni ixchivinti Dios ju Jonás.
Para ju uxijnan jantu xamacꞌonatꞌit ju miꞌalactuꞌuntiꞌan mas ani icya ju palai xakꞌai icjunita.
Palai jantu ju Jonás.
42 Vachuꞌ ju acsni avilhchan acsni camakꞌosaspitcanaꞌ ju lapanacni pus ju anuꞌ chakoꞌulh ju xaꞌucxtin ixjunita ju lhisur catayayaꞌ.
Chai va ixlacata yuchi pus ju uxijnan amucꞌanicꞌanaꞌitꞌit ju mintalakꞌalhinꞌan.
Pus ju yuchi slivasalh na makat ju xaminacha ni va iskꞌasmatniputun ju ixꞌatalaninti ju kꞌai ucxtin Salomón.
Chai ani icya ju palai xakꞌai icjunita ju quitꞌin.
Palai jantu ju Salomón.
Para ju uxijnan jantu kꞌasmatpꞌutꞌunatꞌit ju quinchivinti.
Ju lhacaticuru lai tanuchokoi laꞌixlacatuna ju lapanac
43 Ju lhacaticuru acsni taxtui laꞌixlacatuna tam lapanac pus vaclhun ucxuntꞌajun junta axixninta.
Va puxcolhitꞌajun ta anchach ju lai catavi.
Para jantu lai lhitajui.
44 Chai ju acsnich chani najun:
“Alai acꞌanchokoyaꞌ laquinchakaꞌ junta xactaxtuyacha”.
Chai acsni chinchokoi pus lana tanuchokoi laꞌixlacatuna ju anuꞌ lapanac ni tachi lakatam chakaꞌ junita junta jantu xamatiꞌ tanun para na pulacpꞌalhcanta chai na cꞌus maxantilacanta.
45 Pus ju acsnich ju anuꞌ lhacaticuru taxtuchokoi.
An iniꞌ apumatujun lhacaticurulhni chai akꞌailhiminkꞌojui laꞌixlacatuna ju anuꞌ lapanac.
Chai ju anuꞌ ixpumatujunꞌan lhacaticurulhni palai kꞌai tajunita.
Palai jantu na chun ixjunita ju pꞌulhnan ixtanun va isꞌakstu.
Pus palai takꞌalhilh ju isꞌatsucunti ju anuꞌ lapanac ju acsni.
Palai jantu na chun ixjunita ju pꞌulhnan.
Pus vana va chun cajunaꞌ ju miꞌatsucuntiꞌan ju uxijnan ju tꞌonatꞌit ju chavai ju na kꞌai untꞌatꞌit.
Talakmilh ju Jesús ixnati chai isꞌapꞌisekꞌen
46 Acsni ixtꞌajuncaꞌ xakꞌalanaꞌ ju lapanacni ju Jesús pus tachincha ju ixnati chai isꞌapꞌisekꞌen.
Chai tataya makspaꞌ ni va ixtatꞌachivimputun ju Jesús.
47 Chai pumatam lapanac chani xajuni ju Jesús:
―Ju minati chai ju miꞌapꞌisekꞌen tayanancha makspaꞌ chai tatꞌachivimputunan.
48 Para ju Jesús chani juni ju anuꞌ lapanac ju ixmalakachacanta:
―Tis chavaich ju quinati chai tis chavaꞌitnich ju quiꞌapꞌisekꞌen.
49 Pus ju acsnich ju Jesús amacꞌanilh junta ixtavilanalh ixꞌamamakaꞌui chai naulh: