Ju Xivan amalakachani ju Jesús ixlapanacni
11
Ju Jesús acsni amapꞌaksikꞌo ju ixpumacautꞌuiꞌan ixꞌamamakaꞌui pus taxtulh ju anch.
Alh amalaniniꞌ ju lapanacni.
Chai alh nonaꞌ ni lhinomputun ju Dios laꞌisꞌatsucuntiꞌan.
Ixꞌalhtanatꞌajun tachi chun ju lakꞌachakꞌanixni ju vanin ixtavilanalh.
2 Pus ju Xivan ixtꞌalhnucanta para cꞌatsa tuchi ixnavich ju Cristo.
Chai amalakachanilh ju Jesús ixtꞌiyunꞌan ju ixꞌamamakaꞌui.
3 Ajunich ni catasacmi ju Jesús ni ma yuchach cava ju Cristo ju ixnoncan camalakachatachilh ju Dios u ma tasqꞌuini ni catipacxanchokolh apumatam.
4 Pus acsni tachaꞌalh chai tasacmi pus ju Jesús chani akꞌalhtayanalh:
―Aꞌinchꞌokꞌochitꞌit.
Amacꞌatsꞌanichitꞌit ju Xivan tuchꞌi xalaktsꞌinatꞌit chai tuchꞌi xakꞌasmatꞌatꞌit.
5 Aꞌunitꞌit ni lai taꞌalacꞌavanan ju alakꞌachꞌixnin ixtajunita.
Chai laich taꞌalhtanan ju ixtalacchꞌantakꞌalhita.
Chai talaclacamacaxlich ju ixtapacxanta ju macxcai tsꞌitsꞌi ju puchꞌiꞌan.
Chai laich takꞌasmatꞌa ju va kꞌatapa ixtajunita.
Chai ju ixtanita malokꞌonichokocalh.
Chai ju quilhpatinin ajunicalh ta yu laich cataputakꞌalhtaxtulh.
6 Vachuꞌ aꞌunitꞌit ni na kꞌachan ju tam lapanac ju jantu astan najun ni jantu quinchꞌakꞌokꞌaputun.
―Chunch ju ajunicalh ju ixꞌamamakaꞌui ju Xivan.
7 Chai acsni taꞌanchokolh ju yuꞌunch pus ju Jesús lana tsuculh alacsacminiꞌ ju lapanacni ixlacata ju Xivan.
Chani ajuni:
―Acsni qꞌuilaktsꞌintꞌit ju Xivan ju lacamacni tis chavaich ju ixlaktsꞌimpꞌutꞌunatꞌit.
Cꞌatsꞌayatꞌit ni jantiyuꞌ ju lhiqꞌuilatꞌit ju anch ni va alaktsꞌimpꞌutꞌutꞌit tam lapanac ju va tam tam najun tachi ju lai ju tuꞌuꞌ xaxkꞌoi actiyac acsni lacatam lacatam sun lhiꞌan ju un.
8 Pus tis chavaich ju ixlaktsꞌimpꞌutꞌunatꞌit.
Cꞌatsꞌayatꞌit ni jantiyuꞌ ju lhiqꞌuilatꞌit ju anch ni va alaktsꞌimpꞌutꞌutꞌit tam lapanac ju na va kꞌox camalakchꞌinilh.
Jantiyuꞌ ju lhiqꞌuilatꞌit ju anch ni va laꞌixchakaꞌan ju xalackꞌajin ucxtinin tavilanancha ju na kꞌox tamalakchꞌininta.
9 Pus tis chavaich ju ixlaktsꞌimpꞌutꞌunatꞌit.
Cꞌatsꞌayatꞌit ni va ixlaktsꞌimpꞌutꞌunatꞌit ju lapanac ju najun ixchivinti Dios.
Chai vasalh chunch junita ju Xivan.
Para palai kꞌai lhichꞌalhcat ju xtaknicanta ju yuchi.
Palai jantu va tichi lapanac ju najun ixchivinti Dios.
10 Pus yuchi ju Xivan ju ispastaccan acsni chani ju tsꞌokꞌulacalh laꞌixchivinti Dios:
Acmalakachayaꞌ ju quilapanac ju pꞌulhnan caꞌanaꞌ.
Astan ju uxintꞌi.
Chai yuchach ju caꞌalakꞌoxiniyaꞌ ju ixꞌalhunutꞌan ju lapanacni ni cataꞌamaklhtayananan acsni achꞌipꞌinaꞌ.
Chunch ju tsꞌokcanta laꞌixchivinti Dios.
11 Slivasalh ju iclajunau.
Tus chavai jantu tavanan alinta tam xamatiꞌ ju palai kꞌai cava.
Va yuchi ju Xivan ju amakpaxanaꞌ.
Para va tichi chavaich ju palai jantu tuꞌuꞌ lhiulacan laꞌixmacni ixtꞌalapanacni sia yuꞌunch ju quintalhilaksi yuchach ju palai kꞌai cajunaꞌ ju lactꞌiyan junta lhinajun ju Dios.
Palai jantu chun junita ju Xivan ju chavai.
12 Tus acsni tsuculh amalaniniꞌ ju Xivan tus chavai pus ju lapanacni slivasalh laꞌixlhichux ixꞌalhunutꞌan taꞌamputun ju lactꞌiyan junta lhinajun ju Dios.
13 Pus acsni tucaꞌ ixmin ju Xivan pus ju Moisés chai ju aliꞌin makꞌaniya ixlapanacni Dios si tanonkꞌo ni ma calhinonaꞌ ju Dios ju ani lacamunutpaꞌ.
Chai acsni milh ju Xivan pus tsuculh uctaxtunuꞌ ju ixchivintiꞌan.
14 Chai ni va cꞌatsꞌapꞌutꞌunatꞌit ixlacata ju Elías ju ixnoncan ni caminaꞌ pus yuchach ju Xivan.
15 Pus ju alin ixpakꞌasmatni cakꞌasmatlich ju iclajunau.
16 Ju uxijnan ju chavai tꞌonatꞌit ca laich acnaulh ni ixtꞌachunch untꞌatꞌit tachi ju askꞌatꞌan ju takꞌamanan laclhitamau.
Chai ju quilhmactam chani talajuni ju aquilhmactam:
17 “Ju quijnan xacskꞌolau para ju uxijnan jantu xaꞌatꞌininatꞌit.
Chai icmilhpauch ju amakꞌanit para sin chunch jantu xakꞌachꞌaniyatꞌit ni jantu xalackꞌalhunatꞌit”.
18 Laich acnaulh ni vana va chunch untꞌatꞌit ju uxijnan ni vachuꞌ jantu tuꞌuꞌ kꞌox lhiulayatꞌit.
Ju uxijnan ixnonatꞌit ni va ixpacxanta lhacaticuru ju Xivan ni va isꞌakstu ju ixꞌucxuntꞌajun chai jantu ixꞌalactꞌavemputun ju lapanacni chai jantu ixkꞌotputun ju vino.
19 Chai astan icmilh ju quitꞌin ju quimalakachatachilh Dios ni lapanac actsucuyaꞌ ju ani.
Chai ju uxijnan nonatꞌit ni va chavani lapanac icjunita chai icꞌakꞌotnu lapanac chai ixꞌamigoꞌan icjunita ju achꞌinin chai ju aliꞌin alactuꞌunin.
Chunch ju nonatꞌit ni icꞌalactꞌaꞌucxuntꞌajun ju lapanacni chai icꞌalactꞌavajin chai ickꞌotꞌa ju vino.
Para ni alin ju lapanacni ju talacaꞌinilh ixchivinti ju Xivan chai quintalacaꞌinilh ju quinchivinti pus putasui ni slivasalh na acꞌatsananta ju Dios ni chunch ju xaquintalhilhcayan ju laquiꞌatsucunti quincꞌan.
Alin ju lakꞌachakꞌan junta jantu taquiclacaꞌiputun ixchivinti Dios
20 Pus ju acsnich ju Jesús tsuculh alakꞌakꞌaimanaꞌ ju amachakꞌan ju lakꞌachakꞌanixni junta palai lhu ixnavita ju lhamakꞌan.
Alakꞌakꞌaima ni jantu tavanan ixtamacomputun ixꞌalactuꞌuntiꞌan.
Pus chani ajuni:
21 ―Painiꞌitnich untꞌatꞌit ju uxijnan ji amachakꞌan Corazín.
Painiꞌitnich untꞌatꞌit ju uxijnan ji amachakꞌan Betsaida.
Pus ni caꞌixꞌanavinicancha ju amachakꞌan Tiro chai ju amachakꞌan Sidón ju lhamakꞌan ju malacꞌasunicꞌantꞌatꞌit ju uxijnan pus makꞌanchich ixtamacaulh ixꞌalactuꞌuntiꞌan ju yuꞌunch.
Chai ixtalakchꞌilh ixlacpumpuꞌan ju na tsꞌiti chai ixtatavi lacalhcꞌacꞌa ni cacꞌatsacalh ni vasalh na ixtamacomputun ixꞌalactuꞌuntiꞌan.
22 Pus ixlhiyuchach acsni camucꞌanicanaꞌ ju ixtalakꞌalhinꞌan ju lapanacni pus ju amachakꞌan Tiro chai ju amachakꞌan Sidón palai jantu lhu caꞌalinaꞌ ju ixmakꞌalhkꞌajnatꞌan.
Palai lhu ju amamakꞌalhkꞌajnicꞌanaꞌitꞌit ju uxijnan.
23 Chai ju uxijnan ji quintꞌaꞌamachakꞌan ju lakꞌachakꞌan Capernaum na va takꞌayayatꞌit.
Para amamaxanicꞌanaꞌitꞌit.
Pus ni caꞌixnavicancha ju lakꞌachakꞌan Sodoma ju lhamakꞌan ju masunicꞌantꞌatꞌit ju uxijnan caꞌixꞌalinkꞌalhilhch tus chavai.
24 Chai iclajunau ni palai jantu lhu caꞌalinaꞌ ju ixmakꞌalhkꞌajnatꞌan ju amachakꞌan Sodoma acsni camucꞌanicanaꞌ ju ixtalakꞌalhinꞌan ju lapanacni.
Palai lhu caꞌalinaꞌ ju mimakꞌalhkꞌajnatꞌan ju uxijnan.
Ju Jesús alactꞌasani ju lapanacni laꞌixmacni ni cataꞌastacnalh
25 Pus ju acsnich ju Jesús chani naulh:
―Ju uxintꞌi ji quimpai xaꞌucxtinꞌat ju lactꞌiyan chai ju lacatꞌun.
Pus icjunan lakꞌailaktsꞌiuch ni jantu amavasalanitꞌa ju ani taxtokni ju na talhilaksi ixꞌatalanintiꞌan chai ixtacꞌatsanꞌan isꞌakstuꞌan.
Alai amavasalanitꞌa ju yuꞌunch ju talhilaksiyan tachi ju lai tam askꞌatꞌa acsni lhilaksi ixꞌamamakaꞌunuꞌ ni yuchi ju camalaniyaꞌ tuꞌuꞌ.
26 Pus chunchach ji quimpai.
Chunchach ju kꞌox xalhiulai ju uxintꞌi.
27 Chai ju acsnich ju Jesús chani ajuni ju lapanacni:
―Ju quimpai quixtaknikꞌota tachi chun ju taxtokni.
Para jantu xamatiꞌ vasalh quimispai.
Va yuchi ju quimpai.
Chai jantu xamatiꞌ vasalh mispai ju quimpai.
Va quitꞌin ju istsꞌalh icjunita.
Chai vachuꞌ tamispai tachi chun ju iclacasqꞌuin ni catamispa.
28 Atꞌatꞌit ju laquimacni tachi chun ju uxijnan ju na xkꞌoptꞌatꞌit ni jantu lai naviyatꞌit ju kꞌox chai ju uxijnan ju alin tuꞌuꞌ ju na tsꞌinqꞌui lamiꞌatsucuntiꞌan.
Pus laquimacni ju quitꞌin astꞌacnanaꞌitꞌit.
29 Alacꞌaꞌitꞌit ju quilhamapꞌaksin chai alakꞌaꞌitꞌit ni miꞌamamakaꞌunuꞌan acva.
Pus ju quitꞌin jantu jeks icꞌui chai jantu tuꞌuꞌ iclhitakꞌayai.
Pus ni chunch ju alatꞌit pus cakꞌachanach ju miꞌalhunutꞌan.
30 Pus jantu na lhixcai ixnavica ju quilhamapꞌaksin.
Chai jantu axkꞌopꞌaꞌitꞌit ixnavica.