Ju Jesús asacxtulh ixpumacautꞌuiꞌan ixtamalakachan
10
Ju acsnich ju Jesús atꞌasanilh ju ixpumacautꞌuiꞌan ixꞌamamakaꞌui chai axtaknilh ixtachaputꞌan ni laich cataxcoxtuniyaꞌ ju lhacaticurulhni laꞌixlacatunaꞌan ju lapanacni chai ni laich palai catanavi ju lapanacni ju ixtachꞌapata tachi chun ju takꞌankꞌat.
2 Chani ixꞌajuncan ju ixpumacautꞌuiꞌan ixtamalakachan ju Jesús.
Pꞌulhnan yuchi ju Simón ju vachuꞌ juncan Pitaluꞌ.
Chai ixlakꞌau ju Tilix ixjuncan.
Chai ju Jacobo chai ju Xivan.
Pus ju Xivan ispꞌisekꞌe ixjunita ju Jacobo chai ju yuꞌunch istsꞌalan Zebedeo ixtajunita.
3 Chai ju Pilipe chai ju Bartolomé chai ju Tumax chai ju Mateo ju achꞌiniꞌ ixjunita.
Chai apumatam Jacobo ju istsꞌalh Alfeo ixjunita.
Chai ju Lebeo ju vachuꞌ Tadeo ixjuncan.
4 Chai apumatam Simón ju makyuꞌunch ixjunita ju cananistanin.
Chai ju Judas Iscariote.
Yuchi ju tucan makꞌaxtaklh ju Jesús astan.
Ju Jesús amalakacha ju ixtamamakaꞌun
5 Pus ju Jesús amalakacha ju ani ixpumacautꞌuiꞌan chai chani alhimapꞌaksi:
―Jantu apꞌitꞌit junta tavilanancha ju yuꞌunch ju jantu quintꞌaꞌisraelitanin tajunita.
Nin yuchi ni apꞌitꞌit laꞌixlakꞌachakꞌanꞌan ju samaritanonin.
6 Alai anchach ju apꞌitꞌit junta tavilanancha ju quintꞌaꞌisraelitanin.
Ju yuꞌunch chunch tajunita tachi ju tuꞌuꞌ borregojni ju va tatsꞌankꞌatach.
7 Chai vanta anchach ju achꞌipꞌinaꞌitꞌit aꞌunaꞌitꞌit ju lapanacni ni vaninch minta ju avilhchan acsni calhinonaꞌ ju Dios.
8 Palaich anavitꞌit ju tapacxanta ju macxcai tsꞌitsꞌi ju va puchꞌiꞌan.
Chai palaich anavitꞌit ju tapacxanta ju tuꞌuꞌ atumpa takꞌankꞌat.
Amalokꞌonitꞌit ju va tanita.
Chai axcꞌoxtꞌutꞌit ju lhacaticuru laꞌixlacatunaꞌan ju lapanacni.
Ju uxijnan jantu va xatamoyatꞌit ju ani tachaput.
Pus vana va chun jantu achꞌinintꞌit acsni aꞌaktꞌaiꞌuyaꞌitꞌit ju lapanacni.
9 Jantu alhipꞌitꞌit tuꞌuꞌ tumin lamimpuxaꞌan.
10 Nin yuchi ni alhipꞌitꞌit ju mimpastiꞌan ixlacata ju lacati.
Nin yuchi ni alhipꞌitꞌit kꞌalhtꞌui ju mimpumpuꞌan nin lakatꞌui ju minchꞌanxtꞌakꞌanꞌan.
Nin tuꞌuꞌ mimpalicꞌan.
Pus tachi ju lapanacni ju tamakchꞌalhcatnan ni anch ju tasukꞌojui ju ixvaitiꞌan pus vana va chun ju uxijnan.
Lhijunch ni catamavayan ju lapanacni ju aꞌunaꞌitꞌit ixchivinti Dios.
11 Chai vanta anchach ju atꞌanuyaꞌitꞌit u lacakꞌai lakꞌachakꞌan u lacalacatꞌicstꞌi lakꞌachakꞌan apꞌuxcꞌaꞌutꞌit pumatam ju na kꞌox lapanac lhiulacan.
Chai anchach laꞌixchakaꞌ ju atꞌolaꞌitꞌit tus acsni atꞌaxtꞌuchꞌokꞌoyaꞌitꞌit ju anuꞌ lakꞌachakꞌan.
12 Chai acsni atꞌanuyaꞌitꞌit ju anch junta atꞌolaꞌitꞌit pus amacꞌamitꞌit ju tatanumanalh anch.
Chai aꞌunaꞌitꞌit ni Dios ju caꞌaxtakniyaꞌ ju kꞌox isꞌatsucuntiꞌan.
13 Chai ju yuꞌunch ju tatanumanalh anch ni kꞌoxich cataꞌamaklhtayananan pus ju Dios vasalh caꞌaxtakniyaꞌ ju kꞌox isꞌatsucuntiꞌan tachi ju sqꞌuintꞌit.
Para ni jantu kꞌox cataꞌamaklhtayananan pus ju Dios jantu catiꞌaxtaknilh ju kꞌox isꞌatsucuntiꞌan tachi ju sqꞌuintꞌit.
14 Chai ju amachakꞌan ju anuꞌ chakaꞌ u ju anuꞌ lakꞌachakꞌan ni lana jantu taꞌamaklhtayanamputunan nin catakꞌasmatniputunan pus acsni atꞌaxtꞌuyaꞌitꞌit ju anch achꞌancꞌalhapꞌuxcꞌantꞌitch ju pokxni laminchꞌanxtꞌakꞌanꞌan ni catacꞌatsayaꞌ ni jantu kꞌox tachi ju xatalai.
15 Slivasalh iclajunau.
Acsni cachinach ju avilhchan acsni camakꞌosaspitcanaꞌ ju lapanacni palai macxcai caꞌalinaꞌ ju ixmakꞌalhkꞌajnatꞌan ju amachakꞌan ju anuꞌ lakꞌachakꞌan.
Palai jantu ju amachakꞌan ju makꞌaniya lakꞌachakꞌanixni Sodoma chai Gomorra.
Alhixcaican ixlacata ixchivinti Dios
16 Pus iclamalakachayau tachi ju tuꞌuꞌ borregojni junta na alin ju maktilin.
Acꞌatsꞌanantꞌit.
Chai salaka atsꞌucꞌutꞌit.
17 Alhistꞌaccꞌantꞌit laꞌixmacniꞌan ju lapanacni.
Pus ju yuꞌunch catalhiꞌanan lacapuꞌucxtin.
Chai catalakanekmayan laꞌixpujitatꞌan ju mintꞌaꞌisraelitanin.
18 Chai alhipꞌincꞌanaꞌitꞌit laꞌixꞌucxlacapuꞌan ju gobernadornin chai ju xakꞌai tucan junita va ixlacaꞌatalh ni quilatꞌaꞌalhtananau ju quitꞌin.
Para ju chunch laich aꞌunaꞌitꞌit ju quilacata ju xalackꞌajin chai ju yuꞌunch ju jantu quintꞌaꞌisraelitanin tajunita.
19 Para acsni amakꞌaxtꞌakcꞌanaꞌitꞌit laꞌixmacaꞌan ju xalackꞌajin tun tꞌiꞌamakꞌaninintꞌit ni jantu cꞌatsꞌayatꞌit tuchꞌi anonaꞌitꞌit nin ta yu alhakꞌalhtꞌayananaꞌitꞌit.
Jantu alhamakꞌaninintꞌit ni Dios ju cataxtakniyan ju acs pantsꞌiquis ju tuchꞌi anonaꞌitꞌit.
20 Pus jantu uxijnan ju achꞌivinaꞌitꞌit.
Alai yuchi ju iSpiritu Santu ju quimpaiꞌan Dios ju cataxtakniyan ju chivinti ju anonaꞌitꞌit.
21 Na lhu caꞌalinaꞌ ju laxcaiti ju va quilacata.
Ju ixlakꞌau ju tam xamatiꞌ laich calhimakꞌaxtꞌakꞌaꞌ laꞌixꞌaninti.
Ju xapai tam xamatiꞌ laich calhimakꞌaxtꞌakꞌaꞌ ju isꞌaskꞌatꞌa laꞌixꞌaninti.
Chai ju saꞌaskꞌatꞌan laich catatꞌalasayaꞌ mas ixpaichꞌan chai catatꞌalalhinonaꞌ ixmaknicaꞌan.
22 Chai tachi chun ju lapanacni cataxcayan va ixlacaꞌatalh ni quilachꞌakꞌokꞌayau.
Para va tichi chavaich ju cachꞌixach ju makꞌalhkꞌajnat tus catapasayaꞌ pus ju yuchi camakꞌalhtaxtucanaꞌ.
23 Chai acsni axcꞌaicꞌanaꞌitꞌit ju lakatam lakꞌachakꞌan pus apꞌitꞌit ju alacatam.
Pus slivasalh ju iclajunau.
Jantu atꞌilhilacꞌapꞌutꞌocꞌakꞌotꞌit tachi chun ju ixlakꞌachakꞌanꞌan ju quintꞌaꞌisraelitaninꞌan acsni acminchokoyaꞌ ju quitꞌin ju quimalakachatachilh ju Dios ni lapanac actsucuyaꞌ ju ani.
24 Ju amamakaꞌucanta jantiyuꞌ ju xalackꞌajin.
Alai yuchi ju xakꞌai ju amamakaꞌunuꞌ.
Chai ju xalapanac jantiyuꞌ ju xakꞌai.
Alai yuchi ju xakꞌai ju ixꞌucxtin.
25 Pus lhijunch ni vana va chunch caꞌaꞌulhtucanaꞌ ju xaꞌamamakaꞌunin tachi ju ulhtucalh ju ixꞌamamakaꞌunuꞌan.
Chai lhijunch ni vana va chun caꞌaꞌulhtucanaꞌ ju xalapanacni tachi ju ulhtucalh ju ixꞌucxtinꞌan.
Pus ju quitꞌin miꞌucxtinꞌan icjunita.
Chai ju lapanacni ni quintajuni ni icpuchꞌalhcatnan ixtachaput ju lhacaticuru pus ja va a ti uxijnan jantu vana va chun aꞌuncꞌanaꞌitꞌit.
Ju Jesús najun tichi chavaich ju tasqꞌuini ni catalhonicalh
26 Ju Jesús tailhiꞌalh ju ixchivinti chai chani ju ajuni ju ixtamamakaꞌun:
―Chai ni cꞌatsꞌayatꞌit ni chunch ju aꞌulhtꞌucꞌanaꞌitꞌit pus yuchi iclalhijunau ni jantu atꞌalhonitꞌit ju mintꞌalapanacniꞌan.
Acꞌatsꞌatꞌit ni jantu tuꞌuꞌ ju va sek navicanta ju jantu catasuyaꞌ.
Chai jantu tuꞌuꞌ ju lai matankꞌanucan ju jantu cacꞌatsakꞌocanaꞌ.
27 Pus ju tuchi iclajunau acsni va quiꞌakstuꞌan vilau pus yuchach ju aꞌunitꞌit ju lapanacni.
28 Jantu atꞌalhonitꞌit ju mintꞌalapanacniꞌan ju lai catamaknin para astan jantu lai tuꞌuꞌ aliꞌ catanaviyan.
Alai yuchi ju atꞌalhonitꞌit ju Dios ni yuchach ju lai macaꞌan ju milacatunaꞌan chai ju mintacuvinꞌan ju lacajipi.
29 Jantu tasqꞌuini ni atꞌalhonitꞌit ju tam mintꞌalapanacꞌan.
Alaktsꞌintꞌit ju lacatꞌicstꞌi tsꞌokꞌo ni lhistꞌacan ju lakatꞌui tsꞌokꞌo lakatam sentau.
Pus mas va chunch ixtapalh ju yuꞌunch para jantu lai catipataju lakatam ju yuꞌunch ju lacatꞌun ni jantu calacasqꞌuinaꞌ ju mimpaiꞌan Dios.
30 Chai mas va miꞌaiꞌan ju uxijnan si putꞌekꞌekꞌocanta.
31 Pus yuchi iclalhijunau ni jantu atꞌalhanantꞌit.
Pus palai laklhu ju mintapalhniꞌan ju uxijnan.
Palai jantu ju va tuꞌuꞌ tsꞌokꞌo mas na lhuch catava ju yuꞌunch.
Chani caꞌulhtucanaꞌ ju tanajun ni talhilacaꞌanta ju Jesús
32 Va tichi chavaich ju canonaꞌ laꞌixꞌucxlacapuꞌan ju lapanacni ni quinchꞌakꞌokꞌai pus vachuꞌ acnonaꞌ laꞌixꞌucxlacapuꞌ ju quimpai ju vilhcha lactꞌiyan ni quilapanac junita.
33 Para va tichi chavaich ju canonaꞌ laꞌixꞌucxlacapuꞌan ju lapanacni ni jantu quilhilaksich pus vachuꞌ quitꞌin acnonaꞌ laꞌixꞌucxlacapuꞌ quimpai ju vilhcha lactꞌiyan ni jantu quilapanac junita.
Va ixlacata ju Jesús alin ju lasat
34 Jantu anaꞌuntꞌit ni va icminta naviniꞌ ju akꞌoxamixnit ju ani lacatꞌun.
Jantu va icminta lakꞌoxiniꞌ ju lacamunutpaꞌ.
Alai va ixlacaꞌatalh ni icminta caꞌalinaꞌ ju lakꞌaiti.
Caxcaicanaꞌ ju yuꞌunch ju quintalhilaksi.
35 Pus va ixlacaꞌatalh ni icminta ju tam lapanac catꞌalaxcayaꞌ ju ixpai.
Chai ju tam atsiꞌ catꞌalaxcayaꞌ ju ixnati.
Chai ju tam xaputꞌi catꞌalaxcayaꞌ ju ixputꞌichakoꞌulh.
36 Ju tatanumanalh laꞌixchakaꞌan ju quilapanacni yuꞌunch ju ixtꞌalaxcaiꞌan catajunaꞌ.
37 Pus ju palai camapaini ixpai u ixnati palai jantu ju quitꞌin pus jantu lhijun ni quilapanac cava.
Chai ju palai camapaini tam istsꞌalh u tam istsiꞌ palai jantu ju quitꞌin pus jantu lhijun ni quilapanac cava.
38 Chai va tichi chavaich ju jantu quinchꞌakꞌokꞌaputun va ixlacaꞌatalh ni va lai mamakꞌalhkꞌajnicalh pus jantu lhijun ni quilapanac cava.
39 Chai va tichi chavaich ju najun ni jantu quinchꞌakꞌokꞌaputun va ixlacaꞌatalh ni jantu lacasqꞌuin ni camaknicalh pus ju yuchi camakꞌatsꞌankꞌayaꞌ ju saꞌatsucunti ju lactꞌiyan.
Para va tichi chavaich ju camakꞌatsꞌankꞌayaꞌ ju isꞌatsucunti va ixlacaꞌatalh ni quinchꞌakꞌokꞌai ju quitꞌin pus caꞌalinaꞌ isꞌatsucunti ju lactꞌiyan.
Alin ju talhaja ju lactꞌiyan
40 Pus ju cataꞌamaklhtayananan ju uxijnan pus tachi ju va jun quitꞌin ju quiꞌamaklhtayanan.
Chai ju quiꞌamaklhtayanan pus tachi ju va jun Dios ju amaklhtayanan.
Yuchi ju quimacaminta.
41 Pus va tichi chavaich ju caꞌamaklhtayananach tam xamatiꞌ ju najun quinchivinti va ixlacaꞌatalh ni quilapanac junita pus vachuꞌ caꞌamaklhtayananaꞌ tuchi caxtaknicananta ju quilapanac ju lactꞌiyan.
Chai va tichi chavaich ju caꞌamaklhtayananach tam xamatiꞌ ju soknicꞌa isꞌatsucunti va ixlacaꞌatalh ni soknicꞌa ju isꞌatsucunti pus vachuꞌ caꞌamaklhtayananaꞌ tuchi caxtaknicananta ju lactꞌiyan ju lapanac ju soknicꞌa isꞌatsucunti.
42 Chai slivasalh ju iclajunau.
Vachuꞌ caxtaknicananta ju lactꞌiyan ju ixtalhaja va tichi chavaich ju caxtakniyaꞌ mas va tam vaso ju tsꞌucꞌuncꞌu xcan ju quinchꞌakꞌokꞌai.
Caxtaknicananta va ixlacaꞌatalh ni kꞌeu xalaktsꞌin mas jantu tuꞌuꞌ ixlhiulacan laꞌixmacniꞌan ju aliꞌin ixtꞌalapanacni.