Ju Jesús cꞌuchꞌu pumatam ju va ilhtuculunta
9
Ju Jesús tanuchokolh lacabarco chai anchokolh lhimakꞌantacutni atantsꞌin.
Chai chinchokolh laꞌixtꞌun.
2 Chai lhichaꞌanicalh pumatam lapanac ju va ixlacalhtuculunta.
Pulhichaꞌancalh ju lona.
Chai ju Jesús acsni alaktsꞌilh ni na ixtalhilaksi ju yuchi ju anuch lapanacni pus chani juni ju takꞌankꞌan:
―Jantu atꞌalhan ji quintsꞌalh.
Ju miꞌalactuꞌunti macꞌacxanicanta.
3 Para ju aliꞌin ju ixtalhatalanininta ju ixlhamapꞌaksinꞌan ju istꞌaꞌisraelitanin takꞌasmatlh ixchivinti ju Jesús chai tanaulh laꞌixꞌalhunutꞌan ni ma na macxcai chivinti xanajun ju Jesús ni ma tachi Dios ixjumputun.
4 Para ju Jesús cꞌatsa tuchi ixtapastꞌacꞌa chai chani ajuni:
―Tajuch ni va chunch ju pꞌastꞌacꞌatꞌit lamiꞌalhunutꞌan.
5 Ni va acjunilh ni macꞌacxanicalh ju ixꞌalactuꞌunti pus jantu lai pꞌucꞌatsꞌayatꞌit ni vasalh alin ju quintachaput u jantu.
Para ni acjunilh ni cakꞌostavi chai caꞌalhtanalh pus ju chunch lai apꞌucꞌatsꞌayaꞌitꞌit ni alin ju quintachaput u jantu.
6 Pus ju chavai aclamasuniyau ni vasalh alin ju quintachaput ju ani lacamunutpaꞌ ni lai icmacꞌacxai ju alactuꞌunti.
Quitꞌin ju quimalakachatachilh ju Dios ni lapanac actsucuyaꞌ ju ani.
Pus ju acsnich ju Jesús chani juni ju takꞌankꞌan:
―Akꞌostꞌaꞌulh.
Asactꞌich ju mimputaman chai aꞌinchich laminchakaꞌ.
7 Pus ju acsnich ju anuꞌ takꞌankꞌan ixjunita taya.
Alh laꞌixchakaꞌ.
8 Chai ju lapanacni acsni talaktsꞌilh na tatalhanalh chai talakꞌayalh ju Dios ni xtaknilh ju chunch tachaput ju Jesús ni laich caꞌaꞌaktaijuyaꞌ ju lapanacni.
Ju Jesús tꞌasanilh ju Mateo
9 Chai ju Jesús taxtulh ju anch chai acsni ixꞌanta ju lacati pus laktsꞌilh pumatam achꞌiniꞌ ju ixvi junta amapalanancan.
Ju yuchi Mateo ixjuncan.
Chai ju Jesús chani juni:
―Aqꞌuinchꞌakꞌokꞌach.
Pus ju Mateo lana taya chai chꞌakꞌokꞌalh.
10 Pus ju aktam ju Jesús ixtꞌajun venaꞌ laꞌixchakaꞌ ju Mateo.
Chai na lhu tachaꞌalh ju achꞌinin chai vachuꞌ ju aliꞌin alactuꞌunin.
Chai kꞌaixtam tatꞌatavi ju Jesús lacamixa.
Chaich ju ixꞌamamakaꞌui vachuꞌ anch ixtavilanalh.
11 Para ju fariseonin acsni talaktsꞌilh ni anch ixvi ju Jesús chanich tajuni ju ixꞌalacmamakaꞌui ju Jesús:
―Ju miꞌamamakaꞌunuꞌan tajuch ni va kꞌaixtam alactꞌavajin ju achꞌinin chai ju alactuꞌunin.
12 Para ju Jesús acsni kꞌasmatlh ju ixchivintiꞌan chani alacjuni:
―Ju kꞌox tatꞌajun jantu tamaktasqꞌuini ju acꞌuchꞌunuꞌ.
Va yuꞌunch ju talactakꞌankꞌai ju tamaktasqꞌuini ju acꞌuchꞌunuꞌ.
13 Alanichitꞌit tuchi ju nomputun ju chivinti ju tsꞌokcanta laꞌixchivinti Dios junta chani najun:
“Ju quitꞌin iclacasqꞌuin ni aꞌaktꞌaiꞌuyatꞌit lacaꞌamapaininti ju mintꞌalapanacniꞌan.
Jantu va yuchi ni aquilalhikꞌailaktsꞌinau ju tuꞌuꞌ atapacxat”.
Chunch ju najun laꞌixchivinti Dios chai chun ju icnavi.
Pus ju quitꞌin jantiyuꞌ iclhiminta ni acꞌalactꞌasanilh ju lapanacni ju tanajun ni na soknicꞌa ju isꞌatsucuntiꞌan.
Alai icminta alactꞌasaniniꞌ ju alactuꞌunin ni catamacaulh ixꞌalactuꞌuntiꞌan.
Tasacmi ju Jesús ixlacata ju tascajat
14 Ju acsnich ju ixꞌamamakaꞌui ju Xivan talakmilh ju Jesús chai tasacmi:
―Ju quijnan chai ju fariseonin na paklhu ju ictascajayau.
Para ju mintamamakaꞌun jantu tatascajai.
Tajuch.
15 Ju acsnich ju Jesús chani ajuni:
―Ja laich cataꞌamakꞌaninilh ju tamakꞌanta junta alin ju tamakꞌaxtꞌokꞌat acsni makvilhcaꞌ ju anuꞌ tsꞌalh ju catamakꞌaxtꞌokꞌaꞌ.
Pus vana va chunch ju quintamamakaꞌun.
Jantu tatascajai ni icꞌalactꞌavilhcaꞌ.
Para cachinaꞌ avilhchan acsni acmakꞌosucanaꞌ ju ani lacamunutpaꞌ.
Chai acsnich ju catatascajayaꞌ ni na aquintalhamakꞌanininach.
16 Jantu xamatiꞌ lai lhalakyavanan ju pumpuꞌ ju jantu amakpanti chai lai va chunch camucꞌalh ju lacakꞌatꞌili pumpuꞌ.
Ni chunch calacalh pus va palai makat cakꞌexlh acsni talakatumi ju sastꞌi pumpuꞌ.
17 Chai nin yuchi ni lai acpumuju ju sastꞌi vino lacakꞌatꞌili axtꞌakꞌan ni na kꞌalhpꞌasnicaꞌ.
Ni chunch ju canavicalh pus va cakꞌexlh ju axtꞌakꞌan chai ju vino capuꞌankꞌolh.
Chai ju axtꞌakꞌan catsꞌankꞌalh.
Alai pumucan ju sastꞌi vino lacasastꞌi axtꞌakꞌan.
Ju chunch laich pumakꞌacan ju vino ju axtꞌakꞌan.
Chunch ju ajuni ju lapanacni ju Jesús.
Va ixꞌamamachakxaniputun ni jantu lai catilhiyaulh ju makꞌaniya ixlhamapꞌaksin ju Moisés ju sastꞌi ixlhamapꞌaksin ju yuchi.
Acꞌuchꞌucalh istsiꞌ ju Jairo chai pumatam chakoꞌulh
18 Acsni ixtꞌajun ajuniniꞌ ju lapanacni ju ani chivinti pus lakchilh pumatam xakꞌai sia yuꞌunch ju ixtachꞌalhcatnan laꞌixpujitatꞌan ju israelitanin.
Chai ju yuchi taꞌaktsokotanilh ju Jesús chai juni:
―Ju quintsiꞌ va pantsꞌiquiscaꞌ xani.
Para caꞌauch chai amokslanitꞌachiꞌ ju mimacaꞌ laꞌixlacatuna chai catsucuchokoyaꞌ.
19 Pus ju Jesús lacataya chai tꞌaꞌalh.
Vachuꞌ tatꞌaꞌalh ju ixꞌamamakaꞌui.
20 Chai acsni ixtaꞌanta ju lacati pus chincha pumatam chakoꞌulh laꞌixlhipulacan ju Jesús.
Chai ju yuchi va tachi ixꞌalinta ixtakꞌankꞌat.
Lakacautꞌui cꞌata ixpacxanta ju anuꞌ takꞌankꞌat.
Pus ju yuchi lakchaꞌanilh ju ixquilhtuꞌ ixpumpuꞌ ju Jesús.
21 Chunch ju lalh ni ixnajun laꞌixꞌalhunut ni mas va yuchi ni calakchaꞌanilh lacatsꞌunin ju ixpumpuꞌ ju Jesús pus palai cajunaꞌ.
22 Chai ju Jesús talakaspꞌitlh.
Laktsꞌilh chai juni:
―Quintsiꞌ jantu atꞌalhan.
Ni xaquilhilaksi pus yuchi palai xalhiꞌun.
Pus ju anuꞌ chakoꞌulh palai va ju anuꞌ pantsꞌiquis.
23 Pus ju Jesús acsni chaꞌalh laꞌixchakaꞌ ju anuꞌ xakꞌai pus alaktsꞌilh ju asanin chai ju lapanacni ni na ixtalackꞌalhun.
24 Chai ajuni:
―Apꞌinchitꞌit ju uxijnan.
Ju atsiꞌ jantu nita.
Va lhtatai.
―Chunch ju ajuni.
Para ju lapanacni va talhitsꞌiꞌilh.
25 Para ju Jesús acsni alacxcoxtukꞌo ju lapanacni pus tanulh chai macchꞌapalh ju anuꞌ atsiꞌ chai ju yuchi lana kꞌostavi.
26 Pus lana laccꞌatsakꞌocalh tachi ixlhilacaputsꞌun ju lacatꞌun ju vanin vi ju anuꞌ lakꞌachakꞌan.
Ju Jesús acꞌuchꞌu ixtꞌiyunꞌan alakꞌachꞌixnin
27 Chai acsni taxtuchokolh ju Jesús ju anch pus tachꞌakꞌokꞌalh ixtꞌiyunꞌan alakꞌachꞌixnin.
Pꞌas ixtachivinin.
Ixtalactꞌasai.
Va tsa tsa ixtajuni ju Jesús:
―Aquilaꞌaktaijuch ji istsꞌalh ju kꞌai ucxtin David.
28 Pus acsni chinchalh ju Jesús laꞌixchakaꞌ pus vachuꞌ tachaꞌalh ju alakꞌachꞌixnin.
Chai ju Jesús chani ajuni:
―Ja lacꞌaꞌiyatꞌit ni laich aclamalacꞌavaniu ju uxijnan.
Chai ju yuꞌunch takꞌalhtayanalh.
Tajuni:
―Iclacaꞌiyau ji ucxtin.
29 Pus ju acsnich ju Jesús achꞌapanilh ixlakchulhꞌan ju anuꞌ alakꞌachꞌixnin chai ajuni:
―Ni xaquilalhilaksiyau ju quitꞌin pus chunchach ju aclanaviniyau.
30 Chai lana taꞌalacꞌavanalh.
Para ju Jesús slivasalh alhimapꞌaksi.
Chai ajuni:
―Alaktsꞌintꞌit.
Tun xamatiꞌ aꞌunitꞌit tuchꞌi xatꞌapꞌasayatꞌit.
31 Para ju yuꞌunch acsni tataxtuchalh lana talacquilhuntsuculh tachi ixlhilacaputsꞌun ju anuꞌ lacatꞌun tuchi ixtapasata laꞌisꞌatsucuntiꞌan.
Ju Jesús cꞌuchꞌu pumatam nunuꞌ
32 Chai acsni tataxtulh ju yuꞌunch pus lana lhichaꞌanipalacalh pumatam lapanac ju va nunuꞌ ixjunita ni ixtanun ju lhacaticuru laꞌixlacatuna.
33 Para acsni xcoxtulh ju Jesús ju lhacaticuru pus ju anuꞌ nunuꞌ chivinilh.
Chai ju lapanacni slivasalh na talhamakꞌaninilh.
Ixtanajun:
―Jantu tavanan laktsꞌincanta tuꞌuꞌ ju chunch ju ani laquilacatꞌunꞌan.
34 Para ju fariseonin chani ixtanajun:
―Ju ani ya lapanac xcoxtui ju lhacaticuru laꞌixlacatunaꞌan ju lapanacni laꞌixtachaput ju xakꞌai lhacaticuru.
Ju Jesús amapaini ju lapanacni
35 Pus ju Jesús talacaputocꞌalh tachi chun ju kꞌai lakꞌachakꞌanixni chai tachi chun ju lactꞌicstꞌi lakꞌachakꞌanixni.
Ixꞌamalanininch laꞌixlacpujitatꞌan ju yuꞌunch.
Ixꞌajuni ju lapanacni ni lhinomputun ju Dios laꞌisꞌatsucuntiꞌan.
Vachuꞌ palai anavi ju lapanacni mas va tuchi takꞌankꞌat ju ixtapacxanta.
36 Para acsni alaktsꞌilh ju lapanacni slivasalh na amapaini ni jantu xamatiꞌ ixꞌamasuni ju soknicꞌa ti.
Chunch ixtajunita tachi ju tuꞌuꞌ borregojni ju va matiꞌ ixꞌalhistacnaꞌan.
37 Pus ju acsnich ju Jesús chani ajuni ju ixꞌamamakaꞌui:
―Slivasalh na lhu ju xatocꞌat ju achꞌananti chai na cꞌatata para na lacatsꞌunin ju chꞌalhcatnin.
38 Pus yuchi alhitꞌapꞌaininitꞌit ju xaꞌucxtin ju lhichꞌalhcat ni camacamilh aliꞌ ju chꞌalhcatnin laꞌixlhichꞌalhcat.
Ju Jesús chunch ajuni ju ixꞌamamakaꞌui ni va ixꞌamamachakxaniputun ni na lhu alin ju lapanacni ju laich caꞌamalacaꞌinicalh ixchivinti Dios para na lacatsꞌunin ju taꞌamalaninimputun.