Ju Jesús cꞌuchꞌu pumatam ju na ixlacatsꞌitsꞌita
8
Acsni mincha ju Jesús ju lactalhpa na lhu lapanacni ju tachꞌakꞌokꞌalh.
2 Chai lakmilh pumatam ju ixpacxanta ju macxcai tsꞌitsꞌi ju ixpuchꞌiꞌan.
Chai ju yuchi taꞌaktsokotanilh ju Jesús chai juni:
―Quiꞌucxtin ni va xaqꞌuincꞌuchꞌupꞌutꞌuch cava pus laich xaqꞌuincꞌuchꞌutꞌi.
3 Pus ju acsnich ju Jesús mokslanilh ixmacaꞌ laꞌixlacatuna.
Chai junich:
―Iclacasqꞌuinch.
Palaichꞌat ju chavai.
Chai acsni naulh ju chunch ju Jesús pus lana vatsꞌalhti lacamacaxnilh istsꞌitsꞌi ju anuꞌ lapanac.
4 Chai ju Jesús juni:
―Akꞌasmatꞌich ju icjunan.
Tun xamatiꞌ tꞌiꞌun tuꞌuꞌ.
Va aꞌinchich tꞌalacꞌasuniniꞌ ju pali chai axtꞌakchich ju milhakꞌailaktsꞌin tachi ju ixnajun ju Moisés lacalhamapꞌaksin.
Chai ju chunch ju lapanacni catacꞌatsayaꞌ ni salaka ju milacatuna.
Ju Jesús cꞌuchꞌu ixlapanac pumatam capitán
5 Acsni chaꞌalh ju Jesús ju lakꞌachakꞌan Capernaum pus lakmilh pumatam capitán chai sqꞌuinilh lamapainin.
Pus ju anuꞌ capitán jantu israelita ixjunita.
Romano ixjunita.
6 Chanich ju juni ju Jesús:
―Quiꞌucxtin ju quilapanac macha laquinchakaꞌ.
Va lacalhtuculunta chai slivasalh na makꞌalhkꞌajnan.
7 Chai ju Jesús juni:
―Acꞌanach cꞌuchꞌunuꞌ.
8 Para ju capitán chani kꞌalhtailh:
―Quiꞌucxtin ju quitꞌin jantu tuꞌuꞌ quintapalhni ni laich atꞌanutꞌi laquinchakaꞌ.
Para mas va anauch ju chivinti chai palaich cajunaꞌ ju quilapanac.
9 Iccꞌatsai ni laich chunch catapasalh ni alin vachuꞌ ju quintalhijuni.
Chai ju quitꞌin vachuꞌ alin ju quintaropajni ju icꞌalhijuni.
Acsni icjuni ju pumatam ni caꞌalh pus an.
Chai acsni icjuni apumatam ni camilh pus min.
Chai ni icjuni ju quilapanac ni canavi tuꞌuꞌ pus navi.
―Chunch ju junilh ju anuꞌ capitán.
10 Chai ju Jesús acsni kꞌasmatlh ju ixchivinti na lhamakꞌaninilh.
Chai ajuni ju ixtatꞌaꞌanta:
―Slivasalh ju iclajunau.
Jantu iclhitajuta nin pumatam israelita ju aquilhilaksilh tachi ju quilhilaksi ju ani ya lapanac.
11 Chai iclajunau ni na lhu cataminanta ju ixlhilacaputsꞌun ju lacamunutpaꞌ ju jantu israelitanin tajunita tachi ju ani ya lapanac.
Chai catatꞌatolach ju Abraham chai ju Isaac chai ju Jacob ju lactꞌiyan junta lhinajun ju Dios.
12 Para ju aliꞌin uxijnan ju ixlhijun ni ixtꞌanutꞌit ju lactꞌiyan junta lhinajun ju Dios jantu lai atꞌanuyaꞌitꞌit.
Alai amacꞌapꞌincꞌanaꞌitꞌit lacaꞌatatsꞌisni.
Chai ju anch alackꞌalhununaꞌitꞌit chai xvek xvek alacqꞌuictꞌaꞌunaꞌitꞌit ni na amakꞌalhkꞌajnanaꞌitꞌit.
―Chunch ju ajuni ju lapanacni ju Jesús.
13 Astan chani ju juni ju capitán:
―Aꞌinchꞌokꞌochich laminchakaꞌ.
Tachi ju xaqꞌuilhilaksich ni laich acꞌacꞌuchꞌunulh va laquinchivinti pus chunchach ju icnavilh.
―Chunch ju xajuni ju anuꞌ capitán.
Chai vasalh lana palaich va ju ixlapanac ju acs pantsꞌiquis.
Ju Jesús cꞌuchꞌu ixputꞌichakoꞌulh ju Pitaluꞌ
14 Ju aktam ju Jesús alh laꞌixchakaꞌ ju Pitaluꞌ chai acsni chilh pus laktsꞌilh ju ixputꞌichakoꞌulh ju Pitaluꞌ ni ixma laꞌixputaman.
Na ixchꞌapata ju iscacat.
15 Pus ju Jesús quimacchꞌapalh chai lana macaulh ju iscacat ju takꞌankꞌan.
Chai ju yuchi kꞌostavi chai lana tsuculh alacmavanaꞌ ju Jesús chai ju ixꞌamamakaꞌui.
Ju Jesús na pumalhu acꞌuchꞌu
16 Chai acsni tokꞌoxa na lhu alhiminicalh ju Jesús ju lapanacni ju ixtanun ju lhacaticuru laꞌixtanquilhacniꞌan.
Pus ju Jesús va lakatam chivinti ju ajuni ju lhacaticurulhni chai lana tataxtulh laꞌixlacatunaꞌan ju lapanacni.
Vachuꞌ palai anavikꞌo ju takꞌankꞌanin ju ixꞌalhiminicanta.
17 Chai ni chunch ju navilhch ju Jesús pus uctaxtulh ju chivinti ju ixnajunta ju makꞌaniya ixlapanac Dios ju Isaías ixjuncan.
Pus ju yuchi ma chani naulh:
“Yuchach ju makꞌosulh ju quintakꞌankꞌatꞌan”.
Ju aliꞌin tachꞌakꞌokꞌaputun ju Jesús
18 Ju Jesús acsni laktsꞌilh ni na lhu lapanacni ixtavilanalh ixtalakachoko junta ixvi ju yuchi pus ajunilh ju ixtamamakaꞌun ni caꞌalactꞌaꞌalh lhimakꞌantacutni atantsꞌin.
19 Para acsni tucaꞌ ixtaꞌanta pus lakmilh ju Jesús pumatam ju na ixlhatalanininta ju ixlhamapꞌaksinꞌan ju istꞌaꞌisraelitanin chai juni:
―Amamakaꞌunuꞌ acchꞌakꞌokꞌayanch vanta anchach ju apꞌinaꞌ.
20 Para ju Jesús junich:
―Ju zorra alin junta tanui.
Chai ju tsꞌokꞌo alin junta tatocꞌai.
Para ju quitꞌin matiꞌ ju quinchakaꞌ junta lai acꞌastacnalh.
Quitꞌin ju quimalakachatachilh ju Dios ni lapanac actsucuyaꞌ ju ani.
21 Chai lana xakꞌala ju Jesús apumatam ixtamamakaꞌun.
Juncanch ju Jesús:
―Quiꞌucxtin yauch aqꞌuiꞌun ni actꞌatolacaꞌ ju quimpai.
Ni caniyaꞌ ju yuchi pus acmacnuyaꞌ chai acsnich ju acchꞌakꞌokꞌayan.
22 Para ju Jesús chani kꞌalhtailh:
―Palai tuꞌuꞌ aqꞌuilhiulatꞌi ju quitꞌin.
Palai jantu ju mimpai.
Chai aqꞌuinchꞌakꞌokꞌach junta acꞌuctsuntsucuyaꞌ.
Chach tamacnu ju mimpai ju taꞌamacnunun ju tanita.
Ju Jesús akꞌailh ju un chai ju xcan
23 Pus ju acsnich ju Jesús tajulh lacabarco chai ju ixtamamakaꞌun vachuꞌ tatꞌataju.
24 Chai acsni taꞌalhtanalh lacatsꞌunin pus kꞌostaya ju kꞌai un chai na pꞌas tanekꞌalh ju xcan.
Chai na ixquitanui ju lacabarco.
Pus ju barco ixquiꞌakpaxputunch.
Para ju Jesús na ilhtatai.
25 Pus ju acsnich talakꞌalh ju ixtamamakaꞌun chai tamacuju.
Tajunich:
―Quiꞌucxtin aquilamakꞌalhtaxtuch ni na muxtuputunauch.
26 Para ju Jesús chani akꞌalhtailh:
―Tajuch ni va tꞌalhananatꞌit.
Ju uxijnan na lacatsꞌunin quilalhilaksiyau.
Chai acsni nonkꞌo chunch pus ju Jesús kꞌostavi chai kꞌailh ju un chai ju xcan.
Chai lana sek avanalh chai jantu lucunulh ju xcan.
27 Chai ju ixlapanacni lana na talhamakꞌaninilh.
Talaclajuni:
―Tis lapanac nuꞌ ju ani ni lai xataquiclacaꞌi ju un chai ju xcan.
Ixtꞌiyunꞌan lapanacni ixtapacxanta ju lhacaticurulhni
28 Pus ju Jesús chai ixꞌamamakaꞌui tachaꞌalh ju lhimakꞌantacutni atantsꞌin junta ixtꞌunꞌan ixjunita ju amachakꞌan Gadara.
Chai acsni tatacutcha pus taquipakxtokchilh ixtꞌiyunꞌan ju ixtapacxanta ju lhacaticurulhni laꞌixlacatunaꞌan.
Ixtamintacha campusantu chai slivasalh lakachapunin ixtajunita.
Jantu xamatiꞌ lai ixtamapasai ju anuꞌ lacati.
29 Chai lana tatsuculh tꞌasanin.
Chai ju lhacaticurulhni na pꞌas tamachivina ju anuꞌ lapanacni acsni chani tajuni ju Jesús:
―Tijuch ju quilamintau lhilaktsꞌinin ju uxintꞌi ji Jesús istsꞌalhꞌat Dios.
Ja va quilamintau mamakꞌalhkꞌajninin mas tucaꞌ chin ju avilhchan.
―Chunch ju tajuni ju anuch lhacaticurulhni ju Jesús.
30 Pus ju lhiꞌavinti lacatsꞌunin na lhu ixtayanancha ju pꞌaxnin.
Ju yuꞌunch va ixtatꞌajun kꞌexvenin.
31 Pus ju lhacaticurulhni talhitapaininilh ju Jesús.
Tajunich:
―Ni aquilatixcoxtuyau laꞌixlacatunaꞌan ju ani tayanalh lapanacni pus aquilalacasqꞌuiniuch ni acꞌanau laꞌixlacatunaꞌan ju pꞌaxnin.
32 Chai ju Jesús ajuni:
―Apꞌinchitꞌit.
Pus ju anuꞌ lhacaticurulhni tataxtulh laꞌixlacatunaꞌan ju ixtꞌiyunꞌan lapanacni chai lana taꞌalh tanunin laꞌixlacatunaꞌan ju pꞌaxnin.
Chai acsni tatanu laꞌixlacatunaꞌan ju pꞌaxnin pus ju pꞌaxnin taꞌatsꞌalalh.
Tin taꞌalh junta vac anta.
Tatajucha lacaꞌatantsꞌin chai tanitajukꞌo lacxcan.
33 Pus ju yuꞌunch ju ixtalhistꞌacꞌa ju pꞌaxnin na tatalhanalh chai taꞌatsꞌalalh.
Taꞌalh ju lakꞌachakꞌan chai taquinonkꞌo chux tuchi ixtapasata laꞌisꞌatsucuntiꞌan ju anuꞌ lapanacni ju ixtapacxanta ju lhacaticurulhni.
34 Pus ju acsnich chux ju lapanacni amachakꞌan anch tataxtulh.
Talakmilh ju Jesús.
Chai acsni talakchilh tatapaininilh ni cataxtulh ju laꞌixtꞌunꞌan.