Jantu amucꞌanitꞌit ixtalakꞌalhin ju apumatam
7
Ju Jesús tailhiꞌalh ju ixchivinti chai chani ju ajuni ju lapanacni:
―Jantu anaꞌuntꞌit ni talakꞌalhin ju xanavi ju akꞌantam.
Ni chunch ju alatꞌit pus ju Dios canonaꞌ ni vachuꞌ navitꞌatꞌit talakꞌalhin ju uxijnan.
2 Pus tachi ju ulaniyatꞌit ixtalakꞌalhin ju akꞌantam pus vana va chun ju aꞌulanicꞌanaꞌitꞌit ju uxijnan.
Chai ju tuchꞌi anaviniyaꞌitꞌit ju akꞌantam pus vana va chun ju anavicꞌanaꞌitꞌit ju uxijnan.
3 Tajuch ni na naviyatꞌit cuenta ju tuꞌuꞌ lacatꞌicstꞌi talakꞌalhin ju navi tam milhilakꞌau para lana jantu naviyatꞌit cuenta ju kꞌai talakꞌalhin ju naviyatꞌit miꞌakstuꞌan.
Ni chunch ju layatꞌit pus ixtꞌachunch untꞌatꞌit tachi tam lapanac ju cajunilh akꞌantam ni tanun ju lacatꞌicstꞌi amacxtalh laꞌixlakchulh mas tanun ju palai kꞌai amacxtalh laꞌixlakchulh isꞌakstu.
4 Chai tas laich aꞌunitꞌit ju tam milhilakꞌau:
“Alakꞌaꞌitꞌich ni acꞌaktaijuyan ni amaconaꞌ ju talakꞌalhin ju navi”.
Tas laich chunch aꞌunitꞌit ni jantu naviyatꞌit cuenta ju kꞌai talakꞌalhin ju naviyatꞌit ju uxijnan.
Pus acsni chunch ju layatꞌit pus ixtꞌachunch untꞌatꞌit tachi tam lapanac ju cajunilh akꞌantam:
“Acmaxtuniyanch ju lacatꞌicstꞌi amacxtalh ju tanun lamilakchulh”.
Laich chunch juni mas palai kꞌai amacxtalh ju tanun laꞌixlakchulh isꞌakstu.
5 Para ju uxijnan acsni chunch ju layatꞌit pus va acxpꞌutꞌiyununatꞌit.
Pus pꞌulhnan amacꞌaꞌuntꞌit ju kꞌai talakꞌalhin ju naviyatꞌit.
Chai ju chunch lai aꞌaktꞌaiꞌuyaꞌitꞌit ju milakꞌauꞌan ni camacaulh ju lacatꞌicstꞌi talakꞌalhin ju navi ju yuchi.
6 Jantu aꞌunchꞌokꞌotꞌit ju ixchivinti Dios ju lapanacni ju tamispai para va tasamakꞌanta.
Jantu xcai ni catalhitalhkꞌamalh u catalhitsꞌiꞌilh ju ixchivinti Dios.
Pus ni aꞌunchꞌokꞌoyaꞌitꞌit ixchivinti Dios ju chunch talai pus va ixtꞌachun tapasai tachi acsni xtaknican ju can ixvaitiꞌan ju tuꞌuꞌ xkꞌoyun chai ju yuꞌunch catatalhkꞌamalh chai catatsꞌacayan.
U tachi ju tuꞌuꞌ pꞌaxnin ni axtꞌakniyaꞌitꞌit ju tuꞌuꞌ chiux ju na laklhu ixtapalh para ju yuꞌunch va taputayalhavanan ni jantu tacꞌatsai ni laklhu ixtapalh.
Asqꞌuininch. Apꞌuxcꞌauch. Chai asatꞌi ju malhtich
7 Asqꞌuinitꞌit ju Dios chai ju yuchi cataxtakniyan.
Apꞌuxcꞌaꞌutꞌit laꞌixmacni Dios ju tuchꞌi maktꞌasqꞌuiniyatꞌit chai alhitꞌaꞌuyaꞌitꞌit.
Va tsa tsa asqꞌuinitꞌit ju Dios tachi acsni va tsa tsa sacan laca tuꞌuꞌ malhtich chai ju Dios cataxtakniyan.
8 Pus va tichi chavaich ju casqꞌuiniyaꞌ ju Dios ju tuꞌuꞌ pus caxtaknicanaꞌ.
Chai va tichi chavaich ju puxcajui tuꞌuꞌ laꞌixmacni Dios calhitajuyaꞌ.
Chai va tichi chavaich ju va tsa tsa sai ju malhtich pus camalhtekꞌanicanaꞌ.
9 Jantu xamatiꞌ ju milhiꞌuxijnan ju lai caxtaknilh tam isꞌaskꞌatꞌa lakatam chiux acsni casqꞌuinilh ju vati.
10 U ni casqꞌuinilh ju pamata jantu xamatiꞌ milhiꞌuxijnan ju laich caxtaknilh lakatam lu.
11 Pus ju uxijnan mas na kꞌai untꞌatꞌit lai xtꞌakniyatꞌit ju kꞌox ju miꞌaskꞌatꞌanꞌan.
Pus ja va a ti yuchach ju quimpaiꞌan Dios ju vilhcha lactꞌiyan jantu catiꞌaxtaknilh ju kꞌox ju yuꞌunch ju tasqꞌuini.
12 Pus ni lacꞌasqꞌuinatꞌit ni kꞌox catatꞌalalhiꞌan ju lapanacni pus vachuꞌ kꞌox atꞌalalhiꞌitꞌit ju yuꞌunch.
Pus chunch ju najun laꞌixlhamapꞌaksin ju Moisés chai chunch ixtanajun ju makꞌaniya lapanacni ju ixtanajun ixchivinti Dios.
Alin ju ti ju va putꞌicstꞌi junita
13 Anch ju apꞌupꞌitꞌit junta va putꞌicstꞌi ju ti.
Pus junta na pokꞌai ti chai junta na akꞌox anchach ju puꞌancan junta jonkꞌalhita makꞌalhkꞌajnat.
Chai na lhu ju tapuꞌanch ju anch.
14 Para na putꞌicstꞌi chai na axcai ju xati ju puꞌancan ju lactꞌiyan junta alin ju atsucunti jonkꞌalhita.
Chai na lacatsꞌunin ju tapuꞌan ju anch.
Laxatocꞌat pumispacan tuchi qꞌuiu
15 Alhistꞌaccꞌantꞌit ni jantu cataꞌokxchokꞌoyan ju lapanacni ju talacasui tachi ju lapanacni ju tanajun ixchivinti Dios mas jantu.
Ju yuꞌunch tamalacasuniyan tachi ju vasalh lackꞌoxin lapanacni tajunita.
Para laꞌixꞌalhunutꞌan chunch tajunita tachi ju tuꞌuꞌ maktilin.
Ju yuꞌunch va talakꞌalhiniputunan ju miꞌatsucuntiꞌan.
16 Para laꞌisꞌatsucuntiꞌan apꞌumispꞌayaꞌitꞌit tichi chavaꞌitnich ju yuꞌunch.
Pus ju uxijnan cꞌatsꞌayatꞌit ni jantu tocꞌai ju uvas lacaꞌalhtucunan.
Nin yuchi ju capen lai catocꞌalh lacachatai.
17 Pus tachi chun ju kꞌoxi qꞌuiu caxtꞌakꞌaꞌ ju kꞌox xalhiꞌut.
Chai ju tuꞌuꞌ qꞌuiu ju jantu kꞌox pus caxtꞌakꞌaꞌ ju lhiꞌut ju jantu kꞌox.
18 Pus ju tuꞌuꞌ kꞌoxi qꞌuiu jantu lai catixtaklh ju xalhiꞌut ju jantu kꞌox.
Chai ju tuꞌuꞌ qꞌuiu ju jantu kꞌox jantu lai catixtaklh ju xalhiꞌut ju kꞌox.
19 Pus tachi chun ju qꞌuiu ju jantu xtꞌakꞌa ju xalhiꞌut ju kꞌox pus chakxmakꞌancan chai lakxavacanch.
20 Pus vana va chun ju lamiꞌatsucuntiꞌan.
Laich apꞌumispꞌayaꞌitꞌit tichi lapanacnich ju laꞌisꞌatsucuntiꞌan.
Jantu catitatanukꞌo ju lactꞌiyan chux ju lapanacni
21 Tachi chun ju lapanacni ju quintajuni ni ixꞌucxtin icjunita jantu si catatanuyanta ju lactꞌiyan junta lhinajun ju Dios.
Va yuꞌunch ju catatanuyanta ju tanavini ju ixkꞌachat ju quimpai ju vilhcha lactꞌiyan.
22 Pus ju anuꞌ avilhchan acsni camakꞌosaspitcanaꞌ ju lapanacni na lhu chanich aquintajunach:
“Quiꞌucxtin ju quijnan xacꞌajunau ju lapanacni ju minchivinti lamintapakaꞌut.
Chai lamintapakaꞌut icxcoxtuch ju lhacaticuru laꞌixlacatunaꞌan ju lapanacni.
Chai lamintapakaꞌut na lhu xacnaviyau ju lhamakꞌan”.
Chunch ju aquintajunach.
23 Para ju acsnich chani acꞌajunach:
“Jantu tavanan xaclamispayau.
Akꞌostꞌit ju laquimacni ju uxijnan ju naviyatꞌit ju alactuꞌunti”.
Lacatꞌui junta lai tayai ju chakaꞌ
24 Va tichi chavaich ju quinkꞌasmatni ju quinchivinti chai canaviyaꞌ tachi ju icnajun pus ixtꞌachunch junita tachi tam lapanac ju na acꞌatsananta.
Pus ju yuchi na talhman lana ju pucutulh tus lhitajulh ju chiux.
Chai laꞌixꞌucxni ju anuꞌ chiux ju yaulh ju xatantun ixchakaꞌ.
25 Chai astan lalh ju xcan.
Alilh ju akmuxtutu.
Chai na pꞌas lalh ju un.
Para jantu taꞌaktalh ju anuꞌ chakaꞌ ni laꞌixꞌucxni chiux ju ixchꞌantai.
26 Para va tichi chavaich ju quinkꞌasmatni ju quinchivinti para jantu canaviyaꞌ tachi ju icnajun pus ju yuchi ixtꞌachunch junita tachi ju apumatam lapanac ju na tonto ixjunita.
Pus ju yuchi yaulh ixchakaꞌ lacacucujni.
27 Chai astan lalh ju xcan.
Alilh ju akmuxtutu.
Chai na pꞌas lalh ju un.
Pus taꞌaktalh ju anuꞌ chakaꞌ chai lana takꞌalhikꞌo.