Ju Jesús amalani ixlacata ixnavica ju kꞌox
6
Ju Jesús tailhiꞌalh ju ixchivinti chai chani ju ajuni ju lapanacni:
―Alaktsꞌintꞌit.
Tun tꞌinavitꞌit ju tuꞌuꞌ kꞌox laꞌixꞌucxlacapuꞌan ju lapanacni va ixlacaꞌatalh ni na kꞌoxich catapulhiulayan.
Ni chunch ju alatꞌit pus jantu tuꞌuꞌ apꞌulhaꞌayaꞌitꞌit laꞌixmacni ju quimpaiꞌan ju vilhcha lactꞌiyan.
2 Chai acsni aꞌaktꞌaiꞌuyaꞌitꞌit ju quilhpatinin jantu chunch aꞌulhtꞌutꞌit ta yu laich catacꞌatsayaꞌ tachi chun ju lapanacni.
Pus chunch ju talai ju yuꞌunch ju tanajun ni tanavini ixlhamapꞌaksin Dios mas jantu.
Ju yuꞌunch taxtꞌakꞌa ju ixtuminꞌan laꞌixpujitatꞌan chai lacati ni laich catacꞌatsayaꞌ ju lapanacni chai catanaulh ni lackꞌoxin lapanacni tajunita.
Pus slivasalh ju iclajunau.
Ju yuꞌunch taꞌamaklhtayanankꞌota ju ixtalhajaꞌan ju ani lacamunutpaꞌ ni alakꞌayacan laꞌixmacni ju ixtꞌalapanacniꞌan.
3 Para ju uxijnan acsni axtꞌakꞌaꞌitꞌit ju tuꞌuꞌ pus va sek axtꞌaktꞌit.
4 Chai ni va sek ju axtꞌakꞌaꞌitꞌit pus ju quimpaiꞌan Dios cataxtakniyan ju mintalhajaꞌan.
Pus ju yuchi laktsꞌin tuchi sek navican.
Ju Jesús amalani ta yu laich putꞌachivincan ju Dios
5 Chai acsni tꞌachꞌivinintꞌit ju Dios jantu chun ju alatꞌit tachi ju talai ju yuꞌunch ju tanajun ni tanavini ixlhamapꞌaksin Dios mas jantu.
Ju yuꞌunch na kꞌoxich talhiulai acsni tatayai lacpujitat u lacatalhavat acsni tatꞌachivinin ju Dios.
Vachuꞌ tatꞌachivinin ju Dios mas lacati ni laich catalaktsꞌilh ju lapanacni.
Para slivasalh ju iclajunau.
Ju yuꞌunch taꞌamaklhtayananta ju ixtalhajaꞌan ju chavai ni na alakꞌayacanta.
6 Para ju uxijnan acsni tꞌachꞌivinintꞌit ju Dios atꞌanutꞌit ju laminchakaꞌan.
Chai atꞌolaꞌitꞌit va miꞌakstuꞌan.
Chai atꞌachꞌivinintꞌit ju quimpaiꞌan Dios ju vachuꞌ vi junta aseknicꞌa.
Chai ju quimpaiꞌan Dios ju laktsꞌin tuchi navican junta aseknicꞌa yuchach ju cataxtakniyan ju mintalhajaꞌan.
7 Chai acsni tꞌonatꞌit tꞌachivinin ju Dios jantu na paklhu anaꞌuntꞌit ju tijtam chivinti tachi ju talai ju aliꞌin lapanacni ju jantucaꞌ tamispai ju Dios.
Pus ju yuꞌunch tanajun ni va acsnich ju laich cakꞌasmatnicalh ni na lhu chivinti catanaulhch.
8 Pus jantu chun ju anavitꞌit tachi ju talai ju yuꞌunch.
Pus ju quimpaiꞌan Dios cꞌatsai tuchꞌi maktꞌasqꞌuiniyatꞌit mas tucaꞌ sqꞌuiniyatꞌit.
9 Pus ju uxijnan chanich anonaꞌitꞌit acsni atꞌachꞌivininaꞌitꞌit ju Dios:
Quimpai ju vilhchiꞌ lactꞌiyan
chach tacꞌatsa ju lapanacni ni na salakaꞌat ju uxintꞌi.
10 Chach chilh ju avilhchan acsni alhinonaꞌ ju uxintꞌi.
Chach navicalh ju minkꞌachat ju ani lacatꞌun tachi ju navicantacha ju lactꞌiyan.
11 Aquilaxtakniuch ju chavai ju vaiti ju icmaktasqꞌuiniyau.
12 Aquilamacꞌacxaniuch ju quintalakꞌalhin quincꞌan ni vachuꞌ icꞌamacꞌacxanitauch ju quintanavitan tuꞌuꞌ macxcai.
13 Jantu aquilalhiꞌau junta acmapastꞌacꞌanicau tuꞌuꞌ macxcai.
Alai aquilamakꞌosuniuch ju macxcai.
Pus uxintꞌi ju lhinaꞌun chai uxintꞌi ju alin ju mintachaput chai uxintꞌi ju lakꞌayacꞌan tus va tavananch.
Slivasalh chunch ju unitꞌa.
Chunch ju anonaꞌitꞌit acsni atꞌachꞌivininaꞌitꞌit ju Dios.
14 Ju Jesús tailhiꞌalh ju ixchivinti chai chani ju ajuni ju lapanacni:
―Chai ni amacꞌacxaniyaꞌitꞌit ju lapanacni ju ixꞌalactuꞌuntiꞌan ju tanavinitan pus vachuꞌ catamacꞌacxaniyan ju uxijnan ju quimpaiꞌan ju vilhcha lactꞌiyan.
15 Para ni jantu amacꞌacxaniyaꞌitꞌit ju lapanacni ju ixꞌalactuꞌuntiꞌan pus nin yuchi ju quimpaiꞌan Dios jantu catitamacꞌacxanin ju mintalakꞌalhinꞌan ju uxijnan.
Ju Jesús amalani ixlacata ju tascajat
16 Acsni atꞌascꞌaꞌayaꞌitꞌit jantu chun alayaꞌitꞌit tachi ju talai ju quintꞌaꞌisraelitaninꞌan ju tanajun ni tanavi ju ixlhamapꞌaksin Dios mas jantu.
Pus ju yuꞌunch tamalacasui ju amakꞌanit laꞌixꞌucxpuꞌan chai tamucꞌai ju lhcꞌacꞌa laꞌixꞌucxpuꞌan ni catasulh ni tatascajaich.
Pus slivasalh ju iclajunau.
Ju yuꞌunch taꞌamaklhtayananta ju ixtalhajaꞌan ju ani lacamunutpaꞌ ni na alakꞌayacan.
17 Para ju uxijnan acsni atꞌascꞌaꞌayaꞌitꞌit atꞌuꞌuyaꞌitꞌit ju miꞌaiꞌan chai alakpꞌuchꞌakꞌayaꞌitꞌitch.
18 Ju chunch jantu catacꞌatsayaꞌ ju lapanacni ni tꞌascꞌaꞌayatꞌit.
Va yuchi ju quimpaiꞌan Dios ju cacꞌatsayaꞌ ni laktsꞌin ju yuchi tuchi navican junta aseknicꞌa.
Chai yuchi ju cataxtakniyan ju mintalhajaꞌan.
Alin ju quimakꞌalitꞌan ju lactꞌiyan
19 Jantu alalhavatꞌit ju mimakꞌalitꞌan ju ani lacatꞌun junta na alin ju saꞌatsꞌacanaꞌ chai junta va cajoksaꞌ chai junta alin ju akꞌalhonin ju takꞌalhotanui lacachakaꞌ.
20 Alai anch ju lactꞌiyan ju apꞌulhavayaꞌitꞌit ju mimakꞌalitꞌan va ixlacata ni naviyatꞌit ju kꞌox ju ani lacatꞌun.
Pus ju anch matiꞌ ju saꞌatsꞌacanaꞌ cativa chai jantu lai joks ju tuꞌuꞌ nin cataꞌalilh ju akꞌalhonin ju lai catakꞌalhotanu.
21 Pus chunch ju alatꞌit ni va tsa tsa pastaccan ju xataxtokni ju lacamunutpaꞌ acsni ani ju makꞌacan ju mimakꞌalitꞌan.
Para ju tamakꞌai ju ixmakꞌalitꞌan ju lactꞌiyan pus anchach ju tapastactꞌajun.
Quilakchulhꞌan ju xamaclhcu ju quilacatunaꞌan junita
22-23 Ju milakchulhꞌan chunch junita tachi ju tuꞌuꞌ maclhcu ni yuchach ju puꞌalacꞌavanancan.
Pus ju milakchulhꞌan ni na lackꞌox pus laich alacꞌavananatꞌit.
Para ju milakchulhꞌan ni jantu kꞌox pus tachi ju va tꞌonatꞌit lacaꞌatatsꞌisni.
Pus vana va chun ju miꞌatalacpastꞌacꞌatꞌan.
Ni alacpꞌastꞌacnantꞌit ju kꞌox pus laich amachꞌakxayaꞌitꞌit ixchivinti Dios.
Para ni asamakꞌanaꞌitꞌit ixchivinti Dios pus jantu kꞌox ju miꞌatalacpastꞌacꞌatꞌan chai va ixtꞌachunch jun ju miꞌatsucuntiꞌan tachi ju va tꞌonatꞌitcaꞌ lacaꞌatatsꞌisni.
Jantu lai tijtꞌui actimapaini
24 Jantu xamatiꞌ lai pumatꞌui catinavi ixꞌucxtin ju vaktam.
Pus aktsꞌiya jantu tuꞌuꞌ calhiulayaꞌ ju pumatam chai na camapainiyaꞌ ju apumatam.
U ni jantu para aktsꞌiya calhilaksiyaꞌ ju pumatam chai ju apumatam lana jantu tuꞌuꞌ canaviyaꞌ cuenta.
Pus vana va chun ju uxijnan.
Jantu lai atꞌimapꞌainitꞌit ju Dios chai vachuꞌ ju tumin.
Ju Dios alhistꞌacꞌa ju isꞌaskꞌatꞌan
25 Iclajunau ni jantu alhamakꞌaninintꞌit ixlacata ju miꞌatsucuntiꞌan ju tuchꞌi aꞌuyaꞌitꞌit u tuchꞌi akꞌotꞌaꞌitꞌit nin yuchi ixlacata tuchꞌi ju amalakchꞌininaꞌitꞌit.
Pus palai tuꞌuꞌ ju miꞌatsucuntiꞌan.
Palai jantu ju va tuꞌuꞌ vaiti.
Chai palai tuꞌuꞌ ju milacatunaꞌan.
Palai jantu ju va mimpumpuꞌan.
26 Alaktsꞌintꞌit ju tsꞌoknin.
Ju yuꞌunch jantu taꞌachꞌananan.
Chai jantu taxkꞌaꞌi ju catamakꞌayaꞌ ju xatocꞌat.
Chai jantu tamakꞌai ju ixvaitiꞌan lacatuꞌuꞌ pacꞌatsa.
Para ju mimpaiꞌan ju vilhcha lactꞌiyan yuchi ju amavai.
Pus ju Dios palai tuꞌuꞌ talhiulayan ju uxijnan.
Palai jantu ju va tuꞌuꞌ tsꞌokꞌo.
27 Chai jantu xamatiꞌ ju milhiꞌuxijnan ju lai palai putankꞌai catijunlh mas na lhu capastaclh.
28 Chai tajuch ni na va lhamakꞌanininatꞌit ixlacata ju mimalakchꞌintichꞌan.
Alaktsꞌintꞌit ta yu takꞌayaich ju xaxanti lacaqꞌuivin.
Ju yuꞌunch jantu tachꞌalhcatnan nin cataꞌasiunilh.
29 Para iclajunau nin yuchi ju kꞌai ucxtin Salomón mas na makꞌaliꞌ ixjunita jantu malakchꞌinilh tachi ju tuꞌuꞌ xanti.
30 Pus ju Dios na cꞌus malakchꞌini ju achꞌitin ju alin mas va lacaqꞌuivin.
Chai ju yuchi jantu jonkꞌalhi.
Ju chavai stakꞌaucaꞌ.
Para ju lhi calacxavacanaꞌ.
Pus ja va a ti uxijnan jantu cataxtakniyan ju Dios ju mimpumpuꞌan.
Para ju uxijnan na lacatsꞌunin lhilaksiyatꞌit ju Dios ni lai cataxtaknin ju tuchꞌi maktꞌasqꞌuiniyatꞌit.
31 Pus ni cataxtakniyan ju Dios tuchꞌi amaktꞌasqꞌuiniyaꞌitꞌit pus jantu alhamakꞌaninintꞌit.
Jantu anaꞌuntꞌit:
“Tijuch nuꞌ ju caꞌuyau ju chavai”.
U “tijuch nuꞌ ju cakꞌotꞌau ju chavai”.
U “tijuch nuꞌ ju calakchꞌiyau ju chavai”.
32 Jantu alhamakꞌaninintꞌit ju ani taxtokni ni chunch ju talai ju yuꞌunch ju jantucaꞌ tamispai ju Dios.
Para alin ju quimpaiꞌan ju vilhcha lactꞌiyan chai ju yuchi cꞌatsai ni maktꞌasqꞌuiniyatꞌit tachi chun ju ani taxtokni.
33 Para yuchi ju pꞌulhnan anavitꞌit cuenta ta yu palai lai calhinonaꞌ ju Dios lamiꞌatsucuntiꞌan.
Vachuꞌ yuchi ju anavitꞌit cuenta ta yu laich soknicꞌa cava ju miꞌatsucuntiꞌan tachi ju kꞌachani ju Dios.
Chai ni chunch ju alatꞌit pus ju yuchi cataxtakniyan tachi chun ju ani taxtokni.
34 Pus jantu alhamakꞌaninintꞌit ju catapasayach ju lhi.
Pus chux avilhchan na alin ju ixlhamakꞌan.
Chai jantu lhijun ni na alhamakꞌaninintꞌit ju tuchi laich camilh ju alhi.