Ju Jesús amalanilh ju lapanacni acsni ixvi ju lakatam akstijun
5
Pus ju Jesús acsni alaktsꞌilh ni na lhu tatakꞌaixtoklh ju lapanacni pus alh junta ixvi lakatam akstijun chai tolhcha ju anch.
Chai talakmilh ju ixtamamakaꞌun.
2 Chai ju Jesús tsuculh amalaniniꞌ.
Chani ixꞌajuni:
Jesús najun tichi chavaich ju va paxcatch
3 ―Va paxcatch ju lapanacni ju tacꞌatsai ni na tamaktasqꞌuini ju Dios.
Pus catachaꞌanaꞌ ju lactꞌiyan junta lhinajun ju Dios.
4 Va paxcatch ju yuꞌunch ju na taꞌamakꞌaninin.
Pus ju Dios caꞌamakꞌankꞌachayach ju yuꞌunch.
5 Va paxcatch ju yuꞌunch ju lana jantu tuꞌuꞌ talhitakꞌayai.
Pus caꞌaxtaknicanaꞌ ju lacatꞌun ju akꞌalhtasunita ju Dios.
6 Va paxcatch ju na talacasqꞌuin ju soknicꞌa atsucunti.
Pus chunch cajunaꞌ isꞌatsucuntiꞌan.
7 Va paxcatch ju na taꞌamapaininin.
Pus vachuꞌ caꞌamapainicanaꞌ ju yuꞌunch.
8 Va paxcatch ju jantu tuꞌuꞌ tapastꞌacꞌa macxcai laꞌixꞌalhunutꞌan.
Ju yuꞌunch catalaktsꞌinaꞌ ju Dios.
9 Va paxcatch ju yuꞌunch ju talamakꞌoxamixich junta alin ju tuꞌuꞌ axcayanti.
Yuꞌunch ju cajuncanaꞌ isꞌaskꞌatꞌan Dios.
10 Va paxcatch ju yuꞌunch ju na amamakꞌalhkꞌajnican va ixlacaꞌatalh ni soknicꞌa ju isꞌatsucuntiꞌan.
Ju yuꞌunch catachaꞌanaꞌ ju lactꞌiyan junta lhinajun ju Dios.
11 Va paxcatch untꞌatꞌit ju uxijnan acsni tajunan macxcai chivinti ju lapanacni chai acsni alhimakchꞌapꞌucꞌanatꞌit chai acsni mucꞌanicꞌanatꞌit tachi chun ju macxcai mas jantu slivasalh.
Tachi chun ju ani taꞌulhtuyan va ixlacata ni quilalhilacaꞌanauch ju quitꞌin.
12 Pus alhikꞌachꞌantꞌit chai na kꞌox alhiulatꞌit acsni chunch aꞌulhtꞌucꞌanaꞌitꞌit.
Chunch alatꞌit ni slivasalh na kꞌox ju axtꞌaknicꞌanaꞌitꞌit ju lactꞌiyan.
Chai apꞌastꞌactꞌit ni vana va chunch ju anavicalh ju ixlapanacni Dios ju makꞌanchich ixtatꞌajun acsni tucaꞌ ixtꞌonatꞌit ju uxijnan.
Ju talhilacaꞌanta ju Jesús chunch tajunita tachi ju tuꞌuꞌ matsat chai tachi ju tuꞌuꞌ maclhcu
13 Na kꞌox ju matsat.
Para ju matsat ni jantu skꞌokꞌo cava pus jantu lhitapalai.
Jantu lai tuꞌuꞌ punavican.
Alai va makꞌancanch chai va taputayalhavananch ju lapanacni.
Pus vana va chun ju uxijnan.
Lhitapalai ju miꞌatsucuntiꞌan acsni vasalh tasui ni quilalhilacaꞌanau.
Para ni jantu chun tasui lamiꞌatsucuntiꞌan pus jantu lhitapalai ju miꞌatsucuntiꞌan.
14 Mas va lakatam maclhcu makat mapulhcui.
Pus vana va chun ju uxijnan.
Na lhu talaktsꞌinan chai tacꞌatsai ni quilapanacni untꞌatꞌit.
Tachi ju tuꞌuꞌ lakꞌachakꞌan ju laꞌixꞌucxni talhpa jantu lai xamatiꞌ catiꞌakxtakma.
15 Chai ju tuꞌuꞌ maclhcu jantiyuꞌ lhixavacan ni va caꞌakxtakꞌulacalh lacatuꞌuꞌ caja.
Alai mucꞌacan talaclhman ni laich mapulhcuni tachi chun ju tatanumanalh lacachakaꞌ.
16 Pus vana va chun ju uxijnan.
Ju Dios taꞌulatan ju ani lacamunutpaꞌ ni laich catacꞌatsayaꞌ ju lapanacni lamiꞌatsucuntiꞌan ni vasalh quilalhilacaꞌanau ju quitꞌin.
Pus jantu tuꞌuꞌ anavitꞌit ju va caꞌasastucnulh.
Ju chunch acsni talaktsꞌinan ni na kꞌox ju naviyatꞌit pus catalakꞌayayach ju quimpaiꞌan Dios ju vilhcha lactꞌiyan.
Ju Jesús amalani ju lapanacni ixlacata ju lhamapꞌaksin
17 Ju Jesús tailhiꞌalh ju ixchivinti chai chani ju ajuni ju ixtamamakaꞌun:
―Jantu va anaꞌuntꞌit ni va icminta samakꞌanaꞌ ju lhamapꞌaksin ju tsꞌokꞌula ju Moisés nin ixchivintiꞌan ixlapanacni Dios ju makꞌanchich ixtatꞌajun.
Jantu icminta samakꞌanaꞌ ju yuchi.
Alai icminta muctaxtunuꞌ.
18 Slivasalh ju iclajunau.
Acsni tiꞌalincaꞌ ju lactꞌiyan chai ju lacatꞌun pus nin lacatsꞌunin ju najun lacalhamapꞌaksin lai catixacaxtulh xamatiꞌ.
Chux lana caꞌuctaxtukꞌoyaꞌ.
19 Pus va tichi chavaich ju jantu camuctaxtukꞌoyaꞌ tachi chun junima lhamapꞌaksin mas yuchi ju tanajun ju aliꞌin ni jantu lhitapalai ni canavicalh chai ni va chunch ju caꞌalhimalani ju lapanacni pus va lacatꞌicstꞌi calaktsꞌincananta ju lactꞌiyan junta lhinajun ju Dios.
Para va tichi chavaich ju camuctaxtuyaꞌ chux tachi ju najun laꞌixlhamapꞌaksin Dios chai ni chunch ju caꞌalhimalaniyaꞌ ju aliꞌin lapanacni pus ju yuchi calhimispacanach ni xakꞌai ju lactꞌiyan junta lhinajun ju Dios.
20 Para chani iclajunau.
Ni atꞌanuyaꞌitꞌit ju lactꞌiyan junta lhinajun ju Dios pus tasqꞌuini ni palai soknicꞌa cava ju miꞌatsucuntiꞌan ju uxijnan.
Jantu chun tachi ju fariseonin nin tachi ju yuꞌunch ju talhatalaninintach ju milhamapꞌaksinꞌan.
Ju Jesús amalani ju lapanacni ixlacata ju talhkꞌamti
21 Ju Jesús tailhiꞌalh ju ixchivinti chai chani ju ajuni ju lapanacni:
―Ju uxijnan kꞌasmatꞌatꞌit ni ixꞌajuncan ju makꞌaniya lapanacni ni jantu catalamakni.
Chai va tichi chavaich ju caꞌamaknininaꞌ pus camucꞌanicanaꞌ ixtalakꞌalhin.
22 Para ju quitꞌin iclajunau ni camucꞌanicanaꞌ ixtalakꞌalhin va tichi chavaich ju va catꞌalatalhkꞌamniyaꞌ ju tam ixlakꞌau.
Chai va tichi chavaich ju cajunach macxcai chivinti ju tam ixlakꞌau camamakꞌalhkꞌajnicanaꞌ laꞌixmacaꞌan ju xalackꞌajin ucxtinin.
Chai va tichi chavaich ju cajunilh tam ixlakꞌau ni jantu kꞌox ju isꞌaktsulh pus camamakꞌalhkꞌajnicanaꞌ ni camacaꞌancanaꞌ ju lacajipi.
23 Pus ni lhipꞌintꞌach ju milhakꞌailaktsꞌin junta xtaknican ju Dios pus jantu xcai ni apꞌastꞌactꞌi ni va ixtꞌalakꞌaꞌitꞌa ju milakꞌau.
24 Pus ni pꞌastꞌactꞌa ju chunch pus amacꞌauch ju milhakꞌailaktsꞌin ju anch junta xtakcan.
Aꞌinchꞌokꞌochich.
Pꞌulhnan atꞌapꞌaininich ju milakꞌau.
Acsnicaꞌ ju laich apꞌinaꞌ xtaknaꞌ ju milhakꞌailaktsꞌin.
25 Ni catachivimakꞌanan tam xamatiꞌ chai catakꞌailhiꞌanan lacapuꞌucxtin pus vatsꞌalhti atꞌatꞌakꞌoxitꞌit acsni tꞌapꞌintꞌatꞌitcaꞌ ju lacati.
Ni jantu pus ju mintꞌalaxcaiꞌan laich catalhichaꞌanan lacapuꞌucxtin.
Chai ju ucxtin catamakꞌaxtakniyanch ju pulasiyajni chai catatꞌalhnuyanch.
26 Chai slivasalh ju iclajunau.
Jantu atꞌitꞌaxtꞌutꞌit ju anch tus acsni amapꞌalaꞌitꞌit chux ju mimulhtaꞌan.
Ju Jesús najun ni alactuꞌunti acsni tꞌatsucucan ju jantu miꞌamachakaꞌ u jantu mimpapa
27 Ju uxijnan kꞌasmatꞌatꞌit ni ixꞌajuncan ju makꞌaniya lapanacni ni jantu catatꞌatsuculh ju jantu ixꞌamachakaꞌ u jantu ixpapa.
28 Para ju quitꞌin iclajunau ni alactuꞌununtach laꞌixꞌalhunut va tichi chavaich ju laktsꞌin tam chakoꞌulh ju lana tꞌatsucuputunch.
29 Pus ni yuchi ju laktsꞌimpꞌutꞌunatꞌit lamilakchulhꞌan ju lamilhicanaꞌan ju catamapastꞌacꞌaniyan ju alactuꞌunti pus jantu alaktsꞌintꞌit.
Alai alatꞌit tachi ju va maxtꞌutꞌatꞌit ju milakchulhꞌan chai makꞌantꞌatꞌit.
Pus palai kꞌox cava ni catsꞌankꞌa lacatsꞌunin ju milacatunaꞌan.
Jantu chux ju milacatunaꞌan ju caꞌalh ju lacajipi.
30 Chai ni pꞌuꞌalactꞌuꞌunumpꞌutꞌunatꞌit ju mimacaꞌan lamilhicanaꞌan pus alatꞌit tachi ju va chꞌakxpꞌuxtꞌatꞌit chai makꞌantꞌatꞌit.
Pus palai kꞌox cava ni catsꞌankꞌa lacatsꞌunin ju milacatunaꞌan.
Jantu chux ju milacatunaꞌan ju caꞌalh ju lacajipi.
Ju Jesús amalani ixlacata ju talamacajunta
31 Vachuꞌ ixnoncan ni caxtaknilh ixꞌalhiqui ju lapumaconcan va tichi chavaich ju camacaulh ju ixꞌamachakaꞌ.
32 Para ju quitꞌin iclajunau ni va acsnich ju lai macꞌonatꞌit ju miꞌamachakaꞌan ni va tꞌatꞌajun apumatam jokꞌat.
Para ni va kꞌaya amacꞌonaꞌitꞌit ju miꞌamachakaꞌan pus uxijnan ju malactꞌuꞌunitꞌit ju miꞌamachakaꞌan ni astan catꞌatsuculh apumatam jokꞌat ju yuchi.
Chai va tichi chavaich ju catꞌatsucuyaꞌ ju va maconcanta vachuꞌ navi ju alactuꞌunti.
Ju Jesús amalani ixlacata ixlhipastaccan ju Dios
33 Vachuꞌ kꞌasmatꞌatꞌit ni ixꞌajuncan ju makꞌaniya lapanacni ni catamuctaxtulh ni talhipastacta ju Dios ixpumavasalaca ju ixchivintiꞌan.
34 Para ju quitꞌin iclajunau ni jantu tuꞌuꞌ alhipꞌastꞌactꞌit ju ixpumavasalaca ju minchivintiꞌan mas va tuchꞌi anaviyaꞌitꞌit.
Nin yuchi ni lai alhipꞌastꞌactꞌit ju lactꞌiyan ni anchach ju lhinajun ju Dios.
35 Nin yuchi ni lai alhipꞌastꞌactꞌit ju lacatꞌun ni anchach ju chꞌantai ju Dios.
Nin yuchi ju lakꞌachakꞌan Jerusalén ni yuchach ixlakꞌachakꞌan ju kꞌai ucxtin Dios.
36 Nin yuchi ni lai alhipꞌastꞌactꞌit ju miꞌaktsulhꞌan ju ixpumavasalaca ju minchivintiꞌan.
Jantu lai alhipꞌastꞌactꞌit ju yuchi ni jantu lai xnapapa atꞌinavitꞌit ju miꞌaiꞌan nin smalaka.
37 Alai chach tacꞌatsayaꞌ ju lapanacni ni vasalh a ju nompꞌutꞌunatꞌit acsni nonatꞌit a.
Chai vasalh jantu ju nompꞌutꞌunatꞌit acsni nonatꞌit ni jantu.
Para ni maktꞌasqꞌuiniyatꞌit tuꞌuꞌ atumpa va nomputun ni na va alactꞌuꞌununatꞌit chai ixlhiyuchi jantu lai lalhiqꞌuiclacꞌaꞌiyatꞌit ni jantuch tuꞌuꞌ lhipꞌastꞌacꞌatꞌit ju ixpumavasalaca ju minchivintiꞌan.
Jantu lhijun ni aclamamalakchavani ni xamatiꞌ quinavi tuꞌuꞌ macxcai
38 Ju Jesús tailhiꞌalh ju ixchivinti chai chani ju ajuni ju lapanacni:
―Ju uxijnan kꞌasmatꞌatꞌit ni ixtanajun ju makꞌaniya milacpaꞌitniꞌan ni xamatiꞌ canavinilh tuꞌuꞌ talakꞌalhin ju apumatam pus vana va chunch canavinicalh ju anuꞌ ju alactuꞌunulh.
39 Chunch ju ixnoncan.
Para ju quitꞌin iclajunau ni jantu atꞌalasatꞌit ju alactuꞌunuꞌ va ixlacaꞌatalh ni amamapꞌalanipꞌutꞌutꞌit.
Alai ni xamatiꞌ cataꞌulaniyan ju lamilakxtanꞌan pus axtꞌaknichꞌokꞌotꞌit ju mintalakxtantamꞌan.
40 Chai ni xamatiꞌ catachivimakꞌanan chai catataiꞌiniputunan ju mimpumpuꞌan pus jantu alhikꞌaꞌitꞌit vachuꞌ ju mincutunꞌan.
41 Chai ni xamatiꞌ taropa tapꞌastu tamacꞌucꞌayan ju ixtacꞌucꞌat ni alhipꞌiniyaꞌitꞌit ixlhimakat tachi ju lhcacanta lacalhamapꞌaksin pus palai kꞌox cava ni palai makat ju alhipꞌitꞌit.
Palai jantu kꞌox cava ni va alhitꞌalhkꞌamtꞌit.
42 Chai va tichi chavaich ju catasqꞌuiniyan tuꞌuꞌ jantiyuꞌ ju jantu alhixtꞌaknipꞌutꞌutꞌit ni va makꞌapꞌutꞌunatꞌit miꞌakstuꞌan.
Chai va tichi chavaich ju catamatsꞌisqꞌuiniyan tuꞌuꞌ jantu aꞌunaꞌitꞌit ni jantu va ixlacata ni makꞌapꞌutꞌunatꞌit miꞌakstuꞌan.
Tasqꞌuini ni camapainiu ju tam quintꞌalaxcaiꞌan
43 Vachuꞌ kꞌasmatꞌatꞌit ni ixtanajun ju makꞌaniya milacpaꞌitniꞌan ni amapꞌainitꞌit ju tamapainiyan chai alhitꞌalaxcꞌaꞌitꞌit ju tanaviyan macxcai.
44 Chunch ju ixnoncan.
Para ju quitꞌin iclajunau ni amapꞌainitꞌit ju mintꞌalaxcaiꞌan chai asqꞌuintꞌit ju kꞌox isꞌatsucuntiꞌan ju macxcai tajunan.
Chai anavinitꞌit kꞌox ju na taxcayan.
Chai atꞌapꞌaininitꞌit ju Dios ixlacataꞌan ju talhimakchapuyan.
45 Chai ni chunch ju aꞌulhtꞌutꞌit pus anaviyaꞌitꞌit tachi ju navi ju quimpaiꞌan Dios ju vilhcha lactꞌiyan.
Pus ju yuchi amacamini ju ascꞌunuꞌ chai ju xcan ju kꞌai tajunita chai ju lackꞌoxin lapanacni.
46 Pus ni va yuꞌunch ju amapꞌainiyaꞌitꞌit ju tamapainiyan pus ja kꞌoxich ju chunch.
Mas yuꞌunch ju taꞌokxchokꞌomaxtui ju tumin tanavi ju chunch.
47 Chai ni va yuꞌunch ju miꞌalakꞌavin ju atꞌalaxakꞌalayatꞌit pus vana va chunch ju naviyatꞌit tachi ju tanavi ju lapanacni ju jantucaꞌ tamispai ju Dios.
48 Pus sok atsꞌucꞌutꞌit ju uxijnan tachi ju quimpaichꞌan ju vilhcha lactꞌiyan ni sok navi ju yuchi.