Ju lhacaticuru malactuꞌuniputun ju Jesús
4
Pus ju acsnich ju Spiritu Santu lhiꞌalh ju Jesús ju lacamacni ni laich canavi talacmaskꞌatinti ju lhacaticuru ni tsꞌa ma laich caꞌixmalactuꞌuni ju Jesús.
2 Pus tꞌupꞌuxam avilhchan chai tꞌupꞌuxam atatsꞌisni jantu vailh ju Jesús chai astan na chavanilh.
3 Chai ju acsnich lana chincha ju lhacaticuru chai ixmalactuꞌuniputun ju Jesús.
Chai chani juni:
―Ni sala vasalh istsꞌalh Diosꞌat pus aꞌunch ni chach junlh xkapavati junima chiux.
4 Para ju Jesús kꞌalhtailh.
Juni:
―Jantu lai chun actinavi ni najun ju ixchivinti Dios ju tsꞌokcanta ni jantu va yuchi ju xkapavati ju canaviyaꞌ cuenta ju tam lapanac.
Alai canaviyaꞌ cuenta tachi chun ju ixchivinti Dios.
5 Ju acsnich ju lhacaticuru alhiꞌananalh.
Lhiꞌalh ju Jesús ju lakꞌachakꞌan Jerusalén.
Chai anch ju yocalh junta palai aksti putankꞌai ixjunita ju ixpujitatꞌan ju israelitanin.
6 Chai chani juni:
―Ni sala vasalh istsꞌalhꞌat Dios pus amakꞌanlhtꞌujnuch.
Lai chunch alatꞌi ni chani ju tsꞌokcanta laꞌixchivinti Dios:
Ju Dios ma caꞌalhimapꞌaksiyaꞌ ju ixꞌanquilhnin ni catalhistꞌacꞌan.
Ma laꞌixmacaꞌan catachꞌixan ni jantu cachꞌanꞌuyan tuꞌuꞌ chiux.
7 Para ju Jesús chani lhiꞌakꞌalhtayanalh:
―Vachuꞌ tsꞌokcanta ju anch ni jantu alaktsꞌintꞌanutꞌi ju Dios ni camuctaxtuyaꞌ ju ixchivinti u jantu.
8 Astan ju lhacaticuru alhiꞌanananchokolh laꞌixꞌucxni lakatam talhpa ju na putankꞌai ixjunita.
Chai ju anch malacasunikꞌo tachi chun ju xalacpuꞌucxtin ju ani lacamunutpaꞌ chai tachi chun ju ixpuxakꞌaiꞌan.
9 Chai chani juncan ju Jesús:
―Uxintꞌi ju acxtaknikꞌoyan chux ju ani ni aqꞌuintꞌaꞌaktsꞌokꞌotꞌaniyaꞌich chai aqꞌuilakꞌayatꞌich.
10 Para ju Jesús chani akꞌalhtayanalh:
―Apꞌinchich ji Satanás ni najun laꞌixchivinti Dios ju tsꞌokcanta ni yuchi ju ucxtin Dios ju calakꞌayacalh chai va yuchi ju caquiclacaꞌicalh.
11 Pus ju acsnich ju lhacaticuru lana macoyaulh ju Jesús chai talakmilh ju anquilhnin chai talhiminilh ju ixvaiti.
Ju Jesús taiꞌula ixlhichꞌalhcat laxaꞌestado Galilea
12 Pus ju Jesús acsni cꞌatsa ni tachꞌin navicalh ju Xivan pus anchokolh laꞌixtꞌun lhiGalilea.
13 Para jantu makꞌan tolhcha laꞌixlakꞌachakꞌan junta Nazaret ixjuncan.
Alai alh tsucunuꞌ ju Capernaum ju vi laꞌixquilhtuꞌ atantsꞌin junta Galilea juncan.
Chai vanin ixvi ju xalacatꞌun Zabulón chai ju xalacatꞌun Neftalí.
14 Pus ni alh ju anch pus uctaxtulh ju ixchivinti ju makꞌaniya ixlapanac Dios ju Isaías ixjuncan acsni chani xanajun laꞌisꞌatsꞌoknut.
15 Ju xalacatꞌun Zabulón chai ju xalacatꞌun Neftalí tavilanancha laꞌixquilhtuꞌ ju atantsꞌin ju ma lakꞌantacutni ju kꞌai xcan Jordán laxaꞌestado Galilea junta na lhu tatꞌajun ju jantu israelitanin tajunita.
16 Chai ju amachakꞌan anch tachi ju va ixtatꞌajun lacaꞌatatsꞌisni ni jantu ixtamispai ju ixtavasalanti ixlacata ju Dios.
Para ju chavai tachi ju va talaktsꞌilh ju atuncunuꞌ ni ajunicalh ju stavasalanti.
Ju amachakꞌan anch ixꞌalacmucꞌanicanta ju ixꞌanintiꞌan junta jonkꞌalhita makꞌalhkꞌajnat.
Para ju chavai talaktsꞌinta ju atuncunuꞌ ni ajunicalh ju stavasalanti.
Chunch ju naulh ju Isaías.
17 Pus acsni ixvilhcha ju lakꞌachakꞌan Capernaum ju Jesús acsnich ju taiꞌula ixꞌamalanica ju lapanacni.
Chani ixꞌajuni:
―Amacꞌaꞌuntꞌit ju miꞌalactuꞌuntiꞌan ni vanin minta ju avilhchan acsni calhinonaꞌ ju Dios.
Ju Jesús atꞌasanilh pumatꞌatꞌi ju ixtatꞌajun chꞌapanin pamata
18 Pus ju Jesús ixꞌalhtanan laꞌixquilhtuꞌ ju xaꞌatantsꞌin Galilea acsni alaktsꞌilh ixtꞌiyunꞌan lhiꞌalakꞌavin.
Ju pumatam yuchi ju Simón ju vachuꞌ Pitaluꞌ ixjuncan.
Chai ju pumatam Tilix ixjuncan.
Ju yuꞌunch ixtatꞌajun munin ixchꞌokxniꞌan lacaꞌatantsꞌin ni ixchꞌapanin pamata ixtajunita.
19 Pus ju acsnich ju Jesús chani ajuni:
―Aquilachꞌakꞌokꞌau chai tachi ju ixmakꞌaixtꞌokꞌatꞌit ju pamata pus vana va chun aclaxtakniyau ju lhichꞌalhcat ni amakꞌaixtꞌokꞌaꞌitꞌit ju lapanacni ju aquintalhilacaꞌanaꞌ.
―Chunch ju alacjuni.
20 Pus ju yuꞌunch lana tamacaulich ju ixchꞌokxniꞌan chai tachꞌakꞌokꞌalh ju yuchi.
21 Chai ni alhtanampa alacatsꞌunin ju Jesús pus alaktsꞌimpa ju aliꞌin ixtꞌiyunꞌan lhiꞌalakꞌavin.
Yuchi ju Jacobo chai ju Xivan istsꞌalan ju Zebedeo.
Ju yuꞌunch ixtatꞌatajun ju ixpaiꞌan laꞌixbarcoꞌan.
Va ixtatꞌajun lakyonin ixchꞌokxniꞌan.
Pus ju Jesús alactꞌasanilh ixtꞌiyunꞌan lhiꞌalakꞌavin.
22 Chai lana tatacutcha lacabarco.
Tamacaulh ju ixpaiꞌan.
Chai tachꞌakꞌokꞌalh ju Jesús.
Ju Jesús amalanilh lhu ju lapanacni
23 Pus ju Jesús ixlacaputocꞌatꞌajun ixlhilacaputsꞌun ju xaꞌestado Galilea.
Ixꞌamalaninin laꞌixlacpujitatꞌan ju lakatamin lakꞌachakꞌan.
Ixꞌajuni ju lapanacni ni lhinomputun ju Dios laꞌixꞌalhunutꞌan ju yuꞌunch.
Vachuꞌ palaich ixꞌanavi ju lapanacni ju ixtachꞌapata mas va tuchi takꞌankꞌat.
24 Pus mas tus xalacatꞌun Siria laccꞌatsakꞌocalh ixlacata ju Jesús.
Chai alhiminikꞌocalh ju lapanacni ju ixtatꞌajun lhimakꞌalhkꞌajnin tijpachux makꞌalhkꞌajnat.
Alaclhimini ju ixtalactakꞌankꞌai chai ju yuꞌunch ju ixꞌachꞌapanita isꞌaktsulhꞌan ju lhacaticuru chai ju va ixtalhtucuni chai ju va ixtalacalhtuculuntach.
Chai ju Jesús si palai anavikꞌo.
25 Pus na lhu lapanacni tachꞌakꞌokꞌalh ju Jesús.
Amachakꞌan xaꞌestado Galilea chai ju amachakꞌan ju anuꞌ lakacau lakꞌachakꞌanixni chai ju amachakꞌan lakꞌachakꞌan Jerusalén chai chux ju lacatꞌun ju xaꞌestado Judea chai ju xalacatꞌun ju lakꞌantacutni kꞌai xcan Jordán.