Yóm hlingón bè yóm libun bolu ne yóm tau hemdeng knukum
18
Bud wen hlingón tulón Jisas yó kem gel lemolò du mò gónó le dmalang yóm là ktakas le mni bè Dwata anì là kendelen gel hlóng sidek kegnóm le du.
2 Yó monen mò kul,
“Wen sotu tau gel hemdeng knukum bè yóm sotu benwu.
Yóm tau yó,
laen kô klikoen ke Dwata,
ne là se nadaten kem dumuhen tau.
3 Uma kóm bè yóm benwu yó,
wen sotu libun bolu nô du.
Ket kiwólen tendo sut bè yóm tau hemdeng knukum yó na a hofin béléen,
yakà wen tau tendo tô na a ma yóm kun ngà kimu.
4 Tey kegenen là géhél kemmón du yóm tau hemdeng knukum yó.
Okóm tikóng deng tmakas,
yó hendemen,
monen,
‘Balù nim là klikou ke Dwata,
ne là se nadatu yó kem dumuhu tau,
5 lemwót bè yóm alì kehlalahen dou nim libun bolu nii,
tódô nofinu ne anì laen dù gmò le béléen yó kem hohonen.
Ke là nofinu du,
tódô senflósen se tendo hmala dou efete mom tmakas.’ ”
6 Ne bud mon Jisas mò kul,
“Hol hendem ye udélen yóm tau hemdeng knukum là tedeng kogoten kukum yó.
7 Milud he kofin Dwata yó kem kun tau tendo gel mni tóbóng béléen ket kdaw ne ket kifu.
Là kô feng gnanggaen kul.
8 Yó tulónu kuy,”
mon Jisas,
“tódô kendel gel nfihen lu.
Okóm bè yóm kdaw angat bud kesfuléken edini yóm Ngà Tau,”
monen,
“ngunte ke wen tau angat tonen hemtahu béléen.”
Yóm hlingón bè yó kem lewu tau mni bè Dwata
9 Bud wen sotu hlingón tulón Jisas bè yó kem tau gel hemtedeng knô,
ne gel kenhisik le kem dumu le.
Yó monen,
10 “Wen lewu tau mógów ebè Gónô Dwata na le e mni bè Dwata bè yó.
Farisi yóm sotu,
ne yóm sotuhen,
tau fen gel mtuk bwis.
11 Tódô mdà yóm Farisi yó tek sotuhen,
ne mni bè Dwata,
monen,
‘Tey hyu nawahu dou,
Dwata,
abay se là mkéle bè yó kem dumu tau,
lómón yó kem tau sbì,
ne yó kem tau mò kéng,
ne yó kem tau mdà yehen.
Ne tey hyu nawahu abay se là mkéle bè yóm tau fen gel mtuk bwis yóó.
12 Béléu dou,’
monen,
‘sal gel lewu kdawu bè yóm sotu fedyan gel fasting.
Ne là kô sen-gafasu du yóm gesfoloen gel ólólu kóm bè yó kem gel gutahu.’
13 Okóm kun yóm tau fen gel mtuk bwis,
tódô mdà hlayuk fi lem sokok,
là kô gbeken du temngel eta bè longit,
botong gdofien kfuhen,
yó monen,
‘Ó Dwata,
hol knoduhem o,
yakà tauhe gemsalà.’
14 Tódô tulónu kuy ktahuhen,”
mon Jisas,
“bè yóm kuléken ebè gónóen nim tau gel mtuk bwis ni,
deng baling tedeng kton Dwata du.
Fen là kun yóm Farisi yó koni.
Yó gónóm mon,
yóm tau hegetahen knóen,
angat heglaan Dwata.
Okóm yóm tau heglaanen knóen,
angat hegeta Dwata.”
Parable of the Pharisee and Tax Collector
Kni Jisas kul bè Dwata yó kem ngà lemnek
15 Tikóng bud sotu kdaw bè yó,
wen se kem tau smiwi ngà ebè Jisas anì na le e hnok du.
Bè yóm kton le du yó kem gel lemolò ke Jisas,
mom tô bnólów le lu.
16 Okóm tnaba Jisas ebéléen yó kem ngà,
ne monen mò yó kem gel lemolò du,
“Heflós ye lu edini yó kem ngà,
bê ye abay mom tô henseng lu.
Abay se yó kem tau nogot Dwata,
hol le mkél bè knawa ni kem ngà lómón ni.
17 Tódô tulónu kuy ktahuhen,”
mon Jisas,
“Yóm tau ke là gtud nawahen ke Dwata lómón yóm kul kegtud nawa yó kem ngà,
là kóen na a gmung bè yóm kogot Dwata tau.”
Yóm tau wen kendengenen
18 Wen sotu tau gónó le gel kmulu yó kem Ju mudél ebè Jisas,
monen mò du,
“Ó Sér,
uu se tau alì hyu kmoen.
Wen tô snólóku béléem.
Boluy se tô nmou du anì gutahu yóm klowil laen dù sónen?”
19 Ne bnalà Jisas se,
monen,
“Moen de ke monem tey hyu kmou?
Laen kô dù dumu hyu kmoen,
tek són Dwata.
20 Deng tngónem se yó kem hlau Dwata,
yóm monen,
béi mdà yehen,
béi monok,
béi mnagaw,
béi tmifù kéng,
nadatem maem ne yéem.”a
21 Ne mon yóm tau smólók ke Jisas yó koni,
monen,
“Tódô mbut bè yóm hanà kegenu ngà tendo mimón du ni kem hlau Dwata ni.”
22 Timbow gungol Jisas nim monen ni,
monen mò du,
“Sotu he duen tolo gónóhem là deng sikof.
Hbaluem yóm kdê nô béléem,
ne blayem bè tu kem tau élél yóm blihen.
Ke yó nmoem,
angat wen tey kendengenem bè longit.
Lemwót yó dum kóm,
loloem o.”
23 Timbow gungol nim tau ni koni yóm udél Jisas ebéléen,
tey sidek keblat nawahen,
abay se nalihen yóm tey kendengenen.
24 Ton Jisas yóm tey keblat nawahen yó,
yó gónón mon du,
“Tey mgel bè yóm tau wen kendengenen ke tô hogoten ke Dwata klowilen.
25 Mom mahil bè yóm kamél he ke hfusek tekuy bè sol dalum,
olo ke yóm tau wen kendengenen,
tey mgel béléen ke tô hogoten ke Dwata klowilen.”
26 Mon yó kem tau hmungol du yóm mon Jisas ni,
mon le,
“Ke lómón yó,
tau du de gembek gemwa du yóm klowil laen dù sónen?”
27 Bnalà Jisas se,
monen,
“Yóm là gbek tau du,
Dwata gembek du.”
28 Mudél se ke Pitér kun,
monen,
“Ngem ni dém mi,
glok me tódô gemtagak yó kem gónô me lan me lemolò kóm.”
29 Ne mon Jisas mò kul,
“Tódô tulónu kuy ktahuhen,
ke gloken gemtagak gónóen yóm tau,
kkólen bè yehenen ne yó kem dumuhen setwoli,
kkólen bè yó kem tuhahen ne yó kem ngaen lanen na a hból du yóm kogot Dwata tau,
30 angat tey wen blay Dwata du balù ni hem kmoen ni,
ne hulin kdaw angat gutahen yóm klowil laen dù sónen.”
Getlu dulék Jisas tmulón du yóm angat katayen
31 Omin Jisas mit kul hetsik yó kem sfolò lewu gel lemolò du,
yó monen mò kul,
“Hol hnungol ye ni.
Bè yóm kkól tekuy bè Jirusalim bè nim kógów tekuy ni,
angat gotu dohò eta yóm Ngà Tau yó kem kdéen tehe eles snulat yó kem gna tugod Dwata ekni.
32 Yó kmò le du,
angat lus le elem tdok yó kem tau là Ju le.
Angat tey keseflowon le du,
ne sendekà le,
ne lel le semdulak du.
33 Ne angat nabid nfes le,
ngangen efet hnatay le.
Bede bè yóm getluhen kdaw,
bud mowil.”
34 Okóm yó kem gel lemolò ke Jisas,
balù udì ke gtukul le lanen yóm tulón Jisas kul yó.
Gbuni bélê le,
là kô tngón le du tennefen.
Jesus Predicts His Death and Resurrection
Kehton Jisas yóm tau butô
35 Ngangen ne deng le moni ne bè yóm sotu benwu boluyen Jiriku le Jisas.
Wen sotu tau butô myón bè kilil lan,
sónmoen gel temfólól bè yó kem tau gel mius.
36 Tikóng gungolen yóm kehebnes yó kem genged tau mius,
yó gónón smólók,
monen,
“Tedu ni?”
37 Ne wen mon du mò du,
“Mlan bè ni Jisas,
yóm tau lemwót bè Nasarit.”
38 Tikóng gungolen boluy Jisas,
tódô henmungen tmaba,
monen,
“Ó Jisas,
sfu tehe Dabid,
hol knoduhem ou.”
39 Okóm deng mom senbólów yó kem tau mógów tukô gna ke Jisas,
mon le,
“Béi abay hebnes tmaba.”
Tnódónem mom lenwéen htawid tmaba,
“Ó Jisas,
sfu tehe Dabid,
hol knoduhem ou.”
40 Tikóng gungol Jisas yóm ktabahen,
tódô hegsud mdà,
ne monen mò yó kem tau,
“Nwit ye edini béléu.”
Ne tahu se.
Tikóng deng kól klohok Jisas yóm tau butô yó koni,
mon Jisas mò du,
41 “Tedu de yóm tô hmoem do?”
Ne mudél yóm tau butô yó,
monen,
“Móyóe ke bude mton,
Sér.”
42 Mon Jisas mò du,
“Mtoni sen.
Bè yóm kehtahuhem béléu,
yó se gónóm bud mton.”
43 Ne tahu se,
tódô sen-gengen se bud mton yóm tau tehe butô yó,
ne tey kdóyónen ke Dwata,
ne tódô henmung loloen Jisas.
Timbow ton yó kem tey genged tau,
tódô kdê le se gotu dmóyón ke Dwata.
Healing of Bartimaeus