Bê tekuy hebtang kem dumu tekuy
17
Yó bud mon Jisas ebè yó kem gel lemolò du,
monen,
“Laen kô gembek semya du se ke bangen sut bè tau yóm gónóhen btang elem salà.
Okóm nawaw tey tafaken yóm tau hebtangen kem dumuhen.
2 Mom hyu béléen he yóm tau yó ke tódô bot le elem mohin gu laanen là deng wen tau hebtangen,
tléwéng bè liholen yóm botu gónó gel gmaling,
olo ke hebtangen elem salà yóm sotu ngà.
3 Duhen yó,”
monen,
“eles hol ten-gama ye se yóm kuy kmò.
Ke wen salà nmoen bélê ye yóm sotu dumu ye,”
monen,
“bnólów ye.
Sok hegsel,
hol hnifót ye.
4 Baluen he ke hitu duléken gemsalà bélê ye yóm sendaw,
ne ke hitu duléken se hegsel bélê ye,
tódô hnifót ye.”
Woe To Those Who Cause Others to Sin
Kehtahu bè Dwata
5 Ne mudél le ebè Jisas yó kem gel hógówen,
mon le mò du,
“Hol tennuem kum dé,
Sér,
yóm kehtahu me.”
6 Bnalà Jisas se,
monen,
“Ke bnotù tekuy yóm kehtahu ye,
anien ke lómón kutiten yóm lem hulu alì lemnek bè kdéen,
kaem gbek ye ne mdók nim koyu bong nii anì tódô mdó bè ni,
ne mili elem mohin,
tódô nimónen yu.”
Hol kun kmò yóm tau dók
7 Bud mon Jisas,
“Mò kmoen ke wen bélê ye wen tau gel dóken dmadu duhen ke semgyok ubiha.
Ke unihen kól ta,
yó kô udélem ebéléen,
‘Géhéli ne,
nam e mken?’
Là kô yó du.
8 Kaem yó dé mom mon ye mò du,
‘Nam molob kut dé,
moi kut ken anì henkenem o.
Hulihi mken he kóm.’
9 Yóm tau gel dók ye yó,”
mon Jisas,
“ya mon ke hendemen yóm keslamat ye béléen bè yóm gel kimónen yó kem gel dók ye du.
10 Lómón se yó néen yóm kuy,”
monen.
“Ke sok deng gotu gdeng ye yóm deng hmò Dwata kuy,
tódô mon ye,
‘Olo me kem tau hkawang gel dóken ni dum kum.
Tódô nmò me yóm gel hmoen kum.’ ”
Kehkó Jisas des yó kem sfolò tau
11 Yóm kógów Jisas ebè Jirusalim,
mlan lem blóng yó kem prubinsya Samarya ne Galili.
12 Yóm igoen tolo mógów ebè yóm sotu benwu udì bè yó,
wen kem sfolò tau lemebet du,
hono gemnóm yóm des mifù.
Yó nmò le,
mdà le mayuk,
13 ne tmaba le ebè Jisas,
mon le,
“Ó Jisas,
gónó me mogot,
hol knoduhem mi.”
14 Bè yóm kton Jisas kul,
yó monen mò kul,
“Tù ye ne,
ne ye e hetngel lówó ye bè yó kem tau gel demsù ebè Dwata.”
Ne tahu se,
lemwót le.
Ne yóm igò le mógów,
tódô gotu mimot mkó bélê le se yóm des le.
15 Wen sotu bélê le bè yóm ktonen du yóm deng kkó yóm desen,
tódô mlóy semfulék ebè Jisas,
ya tey kdóyónen ke Dwata,
tey kehgelen udélen.
16 Tódô na a hegluduk klohok ti Jisas,
ne tey kdóyónen du.
Nim tau ni,
là Juhen,
tau lemwót bè Samarya.
17 Ne mudél ebéléen Jisas,
monen,
“Là sfolò ye du kô yóm deng gotu mkó desen?
Nô se lu du yó kem syóm?
18 Tek sónen u ne kô yóm semfulék na a dmóyón ke Dwata?
Lelem là Ju he kóm.”
19 Ne yó bud mon Jisas mò du,
“Mdai ne,
Wè,
ne hlósi.
Yóm kehtahuhem béléu,
yó se gónóhen mkó yóm desem.”
Kmò yóm angat bud kesfulék Jisas
20 Sotu kdaw bè yó,
snólók kem Farisi bè Jisas,
mon le,
“Kilón de ksuten yóm kogot Dwata tau?”
Bnalà Jisas lu,
monen,
“Laen kô dù tau mton du yóm ksuten.
21 Laen se kô angat mon du,
‘Ngem,
deng ni,’
duhen ke mon le,
‘Deng tu,’
yó gónón laen dù tau mton du yóm kogot Dwata tau abay se deng tódô sù Dwata lem nawa ye.”
22 Bud mudél Jisas ebè yó kem gel lemolò du,
monen mò kul,
“Angat wen kdawen tey kehdeen ye du ke géhél bud semfulék ebélê ye yóm Ngà Tau,
balù olon sendaw,
okóm là kô ton ye du.
23 Angat wen mon du mò kuy,
‘Ngem,
deng tu ne i,’
duhen ke mon le,
‘Ngem,
deng ni ne i,’
hol bê ye abay mógów etu.
24 Bè yóm angat bud kkól yóm Ngà Tau,”
monen,
“hol lómón mkal silà,
tódô lemayag klamang longit.
25 Okóm nan gna hol glayam he,
ne angat tey sidek kesekbê le du yó kem tau kmoen ni.
26 Gu laanen là deng semfulék yóm Ngà Tau,”
mon Jisas,
“hol lómón yóm tehe kun kdaw Nuwa.
27 Yó nmò kem tau,
mken le,
ne minum le,
ne syehen le efet yóm khotun Nuwa elem yóm kafal nmoen.
Ominen yó msut yóm tey dunuk,
ne gotu le meglà yóm kdê le.
28 Senged se bè tehe kun kdaw Lat,”
monen.
“Yó nmò kem tau,
mken le,
ne minum le,
ne senflós le bemli ne hembalù,
ne senflós le se mò hulu,
ne hdà le kgónô le.
29 Okóm bè yóm kdaw ktagak Lat yóm syudad Sodom,
tódô hkulón Dwata ofi nbol kbuda eta le,
ne gotu le meglà kdê le.
30 Angat bud lómón yó se kmoen yóm angat kesfulék yóm Ngà Tau.
31 Ke sok deng hto yóm buteng yó,”
mon Jisas,
“ke wen tau tolo nô bè gónó henos bè gónóen,
hol béen tlek bud snolò lu ne yó kem kimu nô lem gónóen.
Ke wen tau tolo nô bè tnibahen,
hol béen tlek bud mulék eta ne.
32 Hentulón ye nawa yóm kun tehe gfà yehen Lat.
33 Yóm tau ke knamaen klowilen,
angat lanahen yóm klowilen yó.
Okóm yóm tau ke là knamaen du klowilen,
angat gutahen yóm klowil laen dù sónen.
34 Tódô tulónu kuy ktahuhen,”
mon Jisas,
“ke kifu kkólen yóm Ngà Tau,
ke wen lewu tau stungô,
sotu nwiten,
ne sotu tebelen.
35 Ke kemdaw kkólen,
ke lewu libun mdek,
sotu nwiten,
ne sotu tebelen.
36 Ke lewu tau tmiba,
sotu nwiten,
ne sotu tebelen.”
37 Ne mon le mò ke Jisas yó kem gel lemolò du,
“Gónóhen angat seblà de nim ni,
Sér?”
Ne mon Jisas mò kul,
“Yó se gónóhen mta lób,
yó se gónóhen e sguku wak.”