Yóm Jan smulat du nim bok ni, sotu tau tehe nélék Jisas mò gel hógówen mit yóm kun tulón. Tólóng yó dum Jan gel mabtays, yóm tehe hfatay Hirod.

Yóm tehe kélék Jisas ke Jan tolo nô lem ówóng maen bè kilil lanaw, lewu le twoguhen Jim. Tolo bneteng le huket mà le. Tódô tnaba Jisas se lu mò lemolò du. Tahu se, tódô tebel le mà le lem ówóng, lolò le Jisas. Yó boluy mà le, Sibidi, sotu tau gel hmuket. Ne yóm yê le, sotu bè yó kem libun gel tmóbóng ke Jisas ne yó kem gel lemolò du.

Bè yóm ktaba Jisas kul, tolo lomi tau he Jan. Tódô seflós kinì nawahen lemolò ke Jisas efet kól bè kukol towoken. Tey sogot nawa le Jisas nim Jan.

Yó hol tulón Jan lemen nim sulaten ni, duhen Jisas yóm hol Ngà Dwata, yóm deng nélék Dwata mò hkamalen yóm klamangen. Lemwót bè kehtahu tekuy gónó tekuy gmuta du yóm klowil laen dù sónen.