Kul Nmò
Yó Kem Tau Tehe Hógów Jisas
Mò gna senfala
Yóm bok ni, sfu yóm gna snulat Luk. Bud hwiten ebè Tyufilus, yóm sotu tau tótól.
Lemwót bè ktolok Pol gónó Luk baling tau hemtahu bè Jisas. Yó gónón alì tilob keswè le Pol. Nbut le slomong Pol lenwóten bè yóm gewu dulék Pol mógów na a tmolok bè dumu benwu mayuk efet kól bè yóm khatay le du bè Rom, là kô le skó yóm lewu le. Gotu tulónen bè nim sulat ni yóm kmò kógów le.
Nim snulat Luk ni, tulónen yóm kmò kehból le du yó kem hógów Jisas yóm Tulón Hyu lemwót bè Jisas. Nbut le bè Jirusalim tmulón du efet kól bè klamangen benwu. Hanà tlu folò halay Jisas he deng matay, deng sana lenngeben klamang benwu yóm tulón gu béléen.
Yó bud tulón Luk yóm tey któbóngen kul yóm Tulus Dwata deng sù Dwata bélê le. Ket nmò le, són yóm Tulus Dwata tendo semgalak kul ne bemlay kul kfasang mò du yó kem hmò Dwata kul.
Bè yóm ksulat Luk du yóm kógów le, laen dù gónón tmulón du bè buten yóm kmungen kul efet kól bè tsaptér 20 bè nim bok ni. Lenwóten bè yó, mtukul ne ketngón te du yóm kmungen kul.
Mò gónóm hménég lebangen
(1:1-14) Yóm hol són hlau Jisas yó kem hógówen ne yóm fasaden kul
(1:15-26) Kélék le yóm tau mò tles Judas
(2:1–8:3) Ktolok yó kem hógów Jisas bè syudad Jirusalim
(8:4–12:15) Ktolok le bè klamang prubinsya Judiya ne prubinsya Samarya
(13:1–28:31) Ktolok Pol bè yó kem benwu mayuk lem blóng yó kem tau là Ju le
(13:1–14:28) Tanay kógów Pol
(15:1-35) Tanay kestifun le bè Jirusalim yó kem tau gel tmolok
(15:36–18:22) Gewu dulék Pol mógów
(18:23–21:16) Getlu dulék Pol mógów
(21:17–28:31) Keblanngù le ke Pol bè Jirusalim, ne bè Seseriya, ne bè Rom