Yóm Pol smulat ni, sotu tau deng nélék Jisas mò hógówen na a hetngón du ebè yó kem tau là Ju le yóm Tulón Hyu lemwót bè Dwata. Tey dê yó kem benwu gónóhen na a gel tmolok ne yó se gónón alì tótól boluyen.

Nim sulaten ni, hwiten ebè yó kem tau sundu Ju du deng hemtahu bè Rom, yóm yê yó kem syudad snakuf prubinsya Itali. Tey mayuk bè yóm kul benwu yó kem Ju yóm Rom yó. Bè yó se gónóhen nô yóm tau hol geta bélê le boluyen Sisar. Tey dê benwu knamalen nim Sisar ni, gomong lemen yó kem benwu yó kem Ju.

Bè yóm ksulat Pol du nim ni, hanà tolo knóen bè Kurin he. Tey tô óyóen gel mauy yó kem tau hemtahu bè Rom, bede sal gel wen gónóhen gseng. Okóm ni, deng wen lanen etu ne. Yó gónón hemwit nim sulat ni mò gónón eles hetngón du kul yóm angat kauyen kul.

Yó hol lemen yóm tulón Pol bè nim sulaten ni, duhen yóm lan tau mit sefyu bè Dwata. Bud tulónen kul snéen yóm kmò kekdol le yó kem tau deng hemtahu bè Jisas.

Nim sulat Pol ni, hwiten yóm sotu libun hemtahu boluyen Fibi, abay se geslaen yóm kógówen ebè Rom. Okóm ke Pol, song gemdà ditu deng mom mlan bè yóm keblanggù le du. Ne ditu gónó le hlós hmatay du.