Nim benwu boluyen Kurin ni, hol syudad bong bè prubinsya Akiya. Tódô nô bè kilil mohin, ne tey dê kafal lemwót bè dumu benwu gel dmuung bè yó. Yó gónó le alì tótól bè kmò le udél swa bè yó kem dumu benwu, lelen wen tey genbek le. Okóm tey dê dwata kéng gel hentahu le, yó se duón gónó le alì mò samuk.

Bè yóm gewu dulék Pol mógów na a tmolok ebè yó kem benwu, botong gefet bè yó bè Kurin, mung du le Silas ne Timuti ne Luk. Botong sfalay bud sóól kegenen tmolok udél Dwata bélê le bè yó, ne tey tau wen se baling hemtahu bè Dwata.

Bè yóm deng ktagak Pol kul, sónmoen tendo temnù yó kem tau hemtahu bè yó, okóm wen gónón mesgólól nawa le lemwót bè yóm klaen dù mdengen tau malak kul. Glok le smulat ebè Pol bè yóm knóen bè syudad Ifisus, ne tey dê snólók le béléen. Ne wen tau hógów le ebè Pol mò mit yóm sulat le. Bè yóm kógów le, smakay le kafal, botong wolu buteng le nô te mohin. Timbow le gefet bè Pol, blay le du yóm sulat nwit le. Ne smulat se ke Pol kun mò balaen kul, duhen ni sem bok Kurin nii.