Ni se yóm gewu dulék Pol smulat ebè yó kem tau hemtahu bè syudad Kurin. Là dengen gefet sfalayen he yóm gna ksulaten ebélê le. Bè nim sulaten ni, hol gónó tekuy mton du yóm tey kbong nawahen yó kem tau hemtahu. Balù yóm tey kdê gfaen lanen mit du yóm Udél Dwata, ewenem sana kehlelen mò du yóm nmoen. Lelen dê he gónón blat nawahen bè yó kem tau hemtahu. Bud yó he kem tau hmohon du, tey dê udél le etahen. Okóm tódô kem henlelen mò du yóm hmò Krays du.

Tulónen bè nim sulat ni yóm tey kligalen bè yó kem tau hemtahu bè Kurin lemwót bè yóm kimón le du yóm tehe hlauhen kul bè yóm gna ksulaten. Ne tey kegdufen kul snéen bè yóm keblay le ebè yó kem dumu le hemtahu wen gónó le élél. Okóm tey kudélen yó kem tau tmolok sekban lem blóng le.

Taytus fen meted du ebélê le nim gewu sulat Pol ni, duhen nim bok senfala ye nii.