Bè yóm tanay kógów Pol na a tmolok Udél Dwata lem blóng yó kem tau là Ju le, nan slob tmolok bè yó kem benwu bè prubinsya Glasya, ne tey dê tau bè yó hemtahu bè Jisas. Hentahu le yóm katayen bélê le mò mayad salà le.

Kogol yóm ktolok Pol lem blóng le, wen bè yó kem dumu Ju sut bè yó. Lu se yó kem tau alì megenek klolò le du yó kem hlau Musis. Yó mon le là keten kun yóm kehtahu yó kem tau là Ju le ke là lolò le du yóm kul hlau yó kem Ju. Bè yóm ktolok le yó, yó se buten yóm tey kesbeweg kehedem yó kem tau lomi hemtahu bè yó. Ofo kul mon du ke lemwót bè Dwata yóm tolok le kul yó.

Timbow gungol Pol yóm tolok sekban tolok le kul yó, ya tey sidek kebuten. Yó se but gónón smulat du nim sulaten ni. Yó tulónen kul tek sotu gónón tedeng kton Dwata du yóm tau, són bè kehtahuhen yóm deng katay Krays béléen. Sotu bud hlauhen kul, duhen yóm kmò kwit le ktau le yó kem tau deng hemtahu bè Krays.