Nim Ifisus ni, syudad bong bè kilil mohin. Tey tótól, abay se mteg bè yó yóm gónô yóm dwata kéng hentahu yó kem tau bè klamangen Asya, boluyen Artimis. Deng tlu halay Pol tehe nô bè yó tmolok Udél Dwata, ne tey tilob kesetngón le Pol yó kem tau deng hemtahu bè yó.

Bè yóm ksulat Pol du nim sulat ni, tolo geblanggù bè Rom, nangaten yóm kkukum le du. Là olon bè yó kem tau hemtahu bè Ifisus gónó Pol e hemwit du nim sulaten ni, gotu homongen snéen yó kem tau hemtahu bè yó kem dumu benwu hmilol bè yó.

Yó hol tulónen kul, duhen yóm deng kessotu yóm kdéen tau hemtahu bè Jisas Krays bè klamangen benwu, ne Jisas se yóm hol gónó le mogot. Bud hlauhen kul snéen yóm kmò kwit le ktau le bè yóm deng kbaling le tau hemtahu.