Bè yóm gewu dulék Pol mógów na a tmolok Udél Dwata bè yó kem tau là Ju le, wen hegfan Dwata béléen bè yóm sotu kifu. Tódô wen tau tonen mdà bè soluhen ne mudél ebéléen, monen, “Ó Pol, géhél tnóbóngem mi ne ditu bè Masdunya.” Tahu se, tódô lemwót le Pol smakay kafal ebè Masdunya. Nim Masdunya ni, sotu prubinsya bè benwu yó kem tau Grik. Ni se yóm tanay kógów le Pol etu.

Bè yóm kkól le ditu, tódô tmolok Pol bè yóm sotu syudad boluyen Flipay. Ne wen se kem tau baling hemtahu bè yó, ne tey tilob kimón le ke Dwata. Tey kbong nawa Pol kul, ne dê duléken se bud gel mauy kul. Bong nawa le ke Pol snéen kul. Lewu dulék le hemwit filak ebéléen mò tóbóng le du bè yóm gel kógówen na a tmolok bè yó kem dumu benwu.

Timbow gungol yó kem tau bè Flipay yóm kegkukub Pol ditu bè Rom, glok le hógów yóm sotu dumu le boluyen Ipafruditus etu mò na a tmóbóng du. Ne wen filak hwit le ebéléen snéen mò gastuhen lem blanggù. Ni se gónó Pol hemwit sulat ebélê le mò gónón bemlay slamat bè yóm tey któbóng le du. Gdilô bè nim sulat ni yóm tey kbong nawa Pol kul dalang se yóm tey kligalen bélê le.