Nim Kulasi ni, sotu benwu malù moni bè Ifisus. Smulat Pol ebè yó kem tau hemtahu bè yó bè yóm igoen tehe geblanggù bè Rom. Là kô le deng setngón Pol he yó kem tau gónón e smulat ni. Són olo tngónen bélê le, són Ipafras yóm tau malak kul bè yó, abay se lemwót bè yóm tehe ktolok Pol bè Ifisus, yó gónón hemtahu bè Dwata Ipafras.

Bè yóm kkól Ipafras bè Rom, tulónen ke Pol yóm tey kesgólól nawa yó kem tau hemtahu bè Kulasi lemwót bè yóm kkólen lem blóng le yó kem tau tmolok sekban. Yó kem tau tmolok sekban yó, gel henkéng le ke Krays yóm hol blóng tau ebè Dwata. Yó kesekban yóm ktolok le, wen kem hógów Dwata nô bè longit kun geta senta Krays, ne lu mò fen blóng tau ebè Dwata. Yó gónó Pol kendel smulat ebè yó kem tau hemtahu bè yó mò gónón hdilô du bélê le yóm tey kesekbanen yóm ktolok yó kem tau yó.

Yó tulón Pol kul bè sulaten, duhen Krays yóm hol Ngà Dwata yóm hol geta bè kdéen, ne yóm hol mfasang bè kdéen. Tek són du se yóm hol blóng tau ebè Dwata. Ne lemwót bè yóm katayen, wen lan tau gmuta du yóm klowil laen dù sónen. Bud du se hol kulu yóm kdéen tau hemtahu.