Wen sotu syudad bong nô bè kilil mohin boluyen Tisalunika, snakuf Masdunya. Moni bè Flipay nim syudad ni. Tehe slob tmolok bè yó Pol bè yóm gewuhen dulék mógów na a hetngón du yóm Tulón Hyu gbak ebè Krays. Okóm là dogen legen bè yó, abay se wen yó kem dumuhen Ju kembê du yóm toloken, ne tódô hdó le lu bè yó. Tódô le hlós le Pol efet le gefet bè syudad Kurin. Okóm sónmoen tafa nawan kul yó kem tau lomi hemtahu tebel bè yóm syudad yó. Tnafa nawahen kô knogol le yóm kehtahu le lemwót bè yóm alì kehlayam le kul yó kem hmohon kul bè yó. Lelen laen dù mdengen malak kul. Yó gónó Pol hógów ke Timuti etu mò na a hmungol yóm mò kmò le.

Bè yóm bud kkól Timuti gu ditu, ya tey kehligal Pol bè yóm kungolen du yóm tendo ketnù yó kem tau hemtahu, balù yóm tendo gel kehlayam le kul bè yó. Yó gónó Pol smulat ebélê le. Ne tey kdóyónen ke Dwata bè yóm là konol nawa le, ne bè yóm tey kehbala le yóm gónó le gel glayam. Bnalaen snéen yóm tehe snólók le bè yóm bud kesfulék Krays, ne yóm kmò kehlowil Dwata yó kem tau hemtahu deng tehe matay. Nim bok senfalahem ni, ni se yóm tehe balà Pol kul.