Bè yóm tehe kgefeten bè yó kem tau hemtahu bè Tisalunika yóm tanay sulat Pol, wen se bélê le mom tólóng kmò kehedem le du yóm tulón Pol bè yóm bud kesfulék yóm gónó le mogot Jisas Krays. Ofo kul mon du ke deng kól. Yó nmò le, là bud le tô mò nmò, tódô nangat le kkólen elem blóng le.

Timbow gungol Pol nim ni bè yóm tolo knóen bè Kurin, yó gónón kendel hemwit sulat etu bélê le anì géhél tngón le yóm hol ktahuhen. Yó tulónen kul, gu laanen là deng sut yóm gónó le mogot, nan gna sut yóm tau tô matù ke Krays, yóm alì hulung mò sidek, ne nan gotu nwit lu mò sidek yóm kdéen tau là hemtahuhen bè klamangen benwu.

Bud hnau Pol yó kem tau hemtahu anì na le hol mò nmò, ne anì hol hentilob le kmò le ebè kem dumu le tau, ne tódô hol henbala le yó kem gónó le gel glayam. Ne bud tulónen kul snéen yóm angat kbeles Dwata yó kem tau gel hmayam kul yó.