Nim Timuti gónó Pol e smulat ni, sotu tau lomi lemnok. Tau Grik yóm maen, ne libun Ju yóm yéen. Bè yóm hol tanay kógów Pol na a hetngón du yóm Tulón Hyu bè yó kem dumu benwu, slob tmolok bè Listra, yóm benwu le Timuti. Yó se gónó le baling hemtahu bè Jisas le Timuti ne yéen ne béhen.

Bè yóm gewu dulék Pol mógów na a tmolok bè yó kem dumu benwu, mung du Timuti mò gel tóbóng lówóhen. Hol lómón ke ngà Pol nim Timuti bè yóm alì kehyu nawahen ebéléen.

Wen sotu syudad gónó Pol tmolok bè yóm kógów le yó, boluyen Ifisus. Bè yóm bud kewót le bè yó, tebel Pol Timuti, tódô gotu saligen du yó kem tau deng hemtahu bè yó.

Tikóng kól bè Masdunya Pol, smulat ebè Timuti mò gónón gemduf du bè ktoloken, duhen ni se yóm bok senfalahem nii. Hlauhen ke Timuti anì bnólówen yó kem tmolok sekban. Ne tulónen du yóm kmò kélék le yó kem tau mò fen malak yó kem dumu le hemtahu, ne yóm kmò kalak le kul.