Nim Mark fen smulat du nim sulat ni, hanà tolo lomi lemnok bè yóm tehe knô Jisas te tonok. Yó benwu kem tuhahen, Jirusalim. Ne bè kul gónô se sotu gónó le gel stifun yó kem tau hemtahu bè Jisas. Yó se gónó Mark temngón ke Pitér ne yó kem dumu tau tehe gel lemolò ke Jisas. Wen se gel mon du lemwót bè Pitér yóm kehtahu Mark bè Jisas.

Bè yóm hol tanay kógów Pol lewu le Barnabas na a tmolok bè yó kem tau là Ju le, mung kul Mark mò tmóbóng kul. Sotu gónón mung kul, abay se mo le mom setwoli Barnabas nim Mark. Okóm là kóen deng tahà lan le, deng sana gna mulék ke Mark kun.

Tikóng deng lewu halayen bè yó, bud tô nóló nauy Pol yó kem tau bè yó kem benwu tehe gónó le tmolok. Kóyô Barnabas ke bud nit le Mark, okóm là móyóen Pol. Lemwót bè yóm là kessotu nawa le, yó gónó le là slomong. Lemwót ke Pol, niten Silas. Ne fen nit Barnabas Mark ne tólóng benwu gónó le e tmolok.

Ngangen ne efet mbegel kehtahu Mark, efet wen gónón gemtóbóng ke Pol. Bè yóm tehe kógów Pitér ebè Rom, Mark se yóm sotu dumuhen. Bè Rom tehe gónó Mark smulat du nim sulat ni. Du se hol tanay tau smulat du yó kem tehe gel nmò Jisas anì tngón yó kem dumu tau sundu Ju du bè yó bè Rom. Yó alì tulónen yóm tehe gel nmò Jisas. Kóyóen ke dilô yó kem tau semfala du yóm tey kfasangen. Bong yó du kem gel tolok Jisas, là hol tulón Mark du.