Nag̓abëgkës Da Ti Satanas Ang Nag̓ibugsu Tung Bulalut (20:1-3)
20
Pagkatapus may naitaw sing sasang angil ang paparanëk dang liit tung langit.
May nag̓apëgsan nang liabi may kadinang durug bakëd ang yang liabing atia nag̓ipagsiradu tung bulalut ang atiang pinakaadalëma.
2-3 Pagkaw̓ut na,
dayun na rang dinëëp yang dragun ang ya ka man mismu yang nagpairaw-iraw atiing primirung pisan ang pag̓imu yang Dios tung taub,
ang yang dumang pag̓ingaran tung anya yay maggug̓uuyan tung Diablo ubin tung ni Satanasc.
Pagkadëëp yang angil,
dayun na rang sinaw̓ëd-saw̓ëran yang kadinang binëgkës.
Pagkatapus diritsyung ibinugsu na tung bulalut ang pinakaadalëm.
Dayun na ra kang siniraduan yang purta nang kinandaduan ang pagkatapus kinula na.
Dapat duun da magtinir tung sëlëd san liw̓ung takun ug̓ud indi ra malua-lua ang para magpandaya pa rin ang uman tung mga tau tung bilug ang kaliw̓utan mintras indi pa ag̓akumplitu yang san liw̓ung takun ang atia.
Piru kung makumplitu ra nganing tia,
dapat ang palpasan ka ta gësyëng uras.
Natëtëngëd Tung Paggaraëmën Yang Mga Tauan Ni Jesus Tung Sëlëd San Liw̓ung Takun (20:4-6)
4 Pagkatapus may naitaung mga kakarungan ta mga adi pati yang pamansikarung asan ang yay piniaran yang Dios ta katëngdanan nirang mamaggaraëmën.
Ya ra yang mga taung atiing bui pa rin tung kaliw̓utan ang dati,
nagkarapug̓usan da ta dikël natëtëngëd tung pag̓urubligarën nira ang ultimu ilëm ti Jesus yang nag̓atingara nirang may kagaëman tung nira ig natëtëngëd ka tung pagparakaw̓utun nira yang bitala yang Dios tung mga taud.
Tanira ka man yang mga tau ang indi ra ka ëngëd namagtuu tung ayëp may tung bultung ipinakbung tung anya.
Indi ra ka namagrisibi yang marka na tung kikilayën nira ubin tung mga kalima nirae.
Tanirang tanan binwi si kang uman yang Dios ig pinampakarung na ra ka tung mga kakarungan ang atia ang para mamaggaraëmën tung sëlëd san liw̓ung takun,
kasiraan da ka tanira yang pag̓aningën ang Cristo.
5 Yang pagpabui nang atia tung nira ya ray primirung pagpabui na si kang uman tung mga taung nagkarapatay ra.
Yang kadaklan,
baklu ra pabuiay na,
kung mataklib da yang san liw̓ung takun.
6 Kung tinu pay malg̓ud tung primirung pagpabui yang Dios ang atia,
durung pisan agkasadya yang mabtangan na ay banal da tanira.
Indi ra ka ëngëd sakpën yang pag̓aningën ang yadwang kamatayën,
kung indi,
may kalëlëngtën ëngëd nira tung Dios ang katulad ka tung mga paring tukaw ang para mamanirbian dang pirmi tung anya durua ni Jesu-Cristo.
Magkasiraan da ka tanira ni Jesu-Cristong mamaggaraëmën tung sëlëd san liw̓ung takunf.
Yang Pangultimung Pagpalagpak Tung Ni Satanas (20:7-10)
7 Kung mataklib da nganing yang san liw̓ung takun ang atia,
palpasan da ti Satanas tung bulalut ang atiing pinagkulungan tung anya.
8 Kung malua ra nganing,
mag̓intra si pagpandaya tung tanan ang mga nasyun tung bilug ang kaliw̓utan ang tung dumang kasulatan ya ray paggug̓uuyan ang Gog may Magogg.
Yang katuyuan na magpasagpun da tung nira ang para mamaningayaw ra tung gira.
Yang kinadaramëlën nira,
maning pa tung kënay ang indi mabilang-bilang.
9 Mamagwasak da tanira tung intirung kaliw̓utan ig mamaglësëb da tung pag̓atiniran yang binuat yang Dios ang mga tauan na ang ya ka man mismu yang siudad ang nag̓amaal nah.
Piru tung paglësëb nira,
pabungsaran da tanira ta apuy ang ya ray madiaduan nira.
10 Atia,
ti Satanas ang atiang nagpandaya tung nira,
dayun dang iplëk duun tung lalagunang atiang pag̓apuy ang yang pag̓aningën ang asupri ya ray nag̓ipagpagkal.
Ya ra kang lag̓i ay pinamlëkan tung ayëp may tung aruman nang ayëp ang pulus bukli yang mga bitalang ipinalatay nai.
Kapurisu kasiraan da ka tanirang tulu ang papinitinsiaan kaldaw law̓ii ang anda ëngëd ang pisan ay katapus-tapusan na.
Natëtëngëd Tung Sintinsia Yang Dios Tung Uri Kung Ya Pa Ag̓ari (20:11-15)
11 Pagkatapus may naitaung dakulung pagkarungan ang kulit pati yang pagkarung asan naitaw ka.
Yang katanëkan may yang kalangitan parariu rang naparëng tung katalungaan na.
Indi rang pisan naitang uman.
12 Asta yang kadaklan ang mga taung nagkarapatayj,
naitaw ka.
Darakulu kag gërëg̓ësyë,
anday nalsik,
kung indi,
parariung tumalungaan tung pagkarungan na.
Numanyan may mga kasulatan ang pinanulw̓ad.
Pagkatapus may sam bilug pang sinulw̓ad ka ang ya ra yang listaan yang tanan ang mga taung kumpurming mapagpasapën tung Dios ang asta tung sampang anda ëngëd ay katapus-tapusan.
Numanyan pinagsintinsiaan da yang Dios yang mga taung atia.
Kumpurming unu pay mga ubra-ubra nira atiing mga bui pa rin ang ya ka man ay isinulat tung mga kasulatan ang atia,
ya ray pinatiëlan yang Dios ang nagsirintinsiaën tung nira sasa may sasa.
13 Baklu sintinsiaay na yang mga taung atia,
luw̓us na ra kang lag̓ing pinamui si kang uman.
Ay linalangan na yang tëëb ang yang mga taung nagkaralëmës,
dapat ang ipamalik na ra ang para mamanalunga ra tung pagkarungan na.
Pati yang tanëk ang pinanlëbngan tung mga taung nagkarapatay tung banwa linalangan na ka ang ipamalik na ra ka ang para mamanalunga ra ka tung pagkarungan na.
Asta yang lugar ang atiang pag̓aningën ang Hades ang ya ray pinagkulungan tung mga ispiritu nira,
ya ka.
Linalangan na ka ang ipamalik na ra ka ang para mamanalunga ra ka tung pagkarungan na.
Purisu sasa may sasa tung nira luw̓us dang pinagsintinsiaan yang Dios ang kumpurming unu pay mga ubra-ubra nira,
ya ray pinatiëlan nang nagsirintinsiaën tung nira.
14 Pagkatapus yang kamatayën may yang lugar ang atiang pag̓aningën ang Hades,
dayun da kang ipinamlëk tung lalagunang pag̓apuy.
Yang lalagunang atiang pag̓apuy,
ya ra yang pag̓aningën ang yadwang kamatayën ang yay malambëg̓an yang kumpurming iplëk duun.
15 Kumpurming tinu pay indi ra nasagyapan yang aran na asan tung listaan yang kumpurming mapagpasapën tung Dios ang asta tung sampa,
duun da ka iplëkay tung lalagunang atiang pag̓apuy.