Natëtëngëd Tung Sasang Siudad Ang Yang Kaalimbawaan Na Maning Pa Tung Sasang Baw̓ay Ang Pagpagamit (17:1-18)
17
Taa numanyan,
yang sam bilug tung pitu ngangilan ang atiing pinapag̓ëkël yang Dios tung pitu nga mangkukan ang atii,
ya ray nagpalëngët tung yëën ang nagbugnu ang mag̓aning,
“Taniita.
Ipaitaw ra tung nuyu kung ya pa ag̓ari yang pagsintinsia yang Dios tung sasang baw̓ay ang pagpagamit ang bantug tung intirung kaliw̓utan.
Bilang sasang siudad ang duun tung may durung subaa.
2 Yang mga adi tung kaliw̓utan namangumbaw̓ay ra tung anya pati yang kadaklan ang mga taung pamagtinir tung kaliw̓utan ang naang kumpurming pagpaguyud pa tung sistima na,
nangabuu ra ka tung irinëmën ang itinangway na sigun tung pangita nang durug kalawayb,”
mag̓aning yang angil tung yëën.
3 Pagkatapus dayunaw rang ingkëlan na duun tung banwang kapas ang duunaw ra ginaëman yang Espiritu Santo ang may sasa si kang ipinadakat na tung panëlëngu.
May naitaung sasang baw̓ay ka man ang yag sasaay tung sasang ayëp ang apuy-apuyan yang kulay na.
Yang ayëp ang atia ya ka man taang naitaw rang primiru ang pituy kulu na ig sam puluk ay sungay na.
Lëëp da yang intirung tinanguni na ta mga aran ang magkabag̓ay ang tung Dios ilëm nga dapat ang pagkatapus ya ray inaambu na ang ultimu ilëm unu tung anya nga bag̓ayc.
4 Yang baw̓ay ang atia may pag̓asuut nang aw̓ël ang tapël yang kulay na ig apuy-apuyan.
Sari-saring mga alaas na,
may bulawan,
may mga batung mamaalën ang pagsiringgat-singgat,
may mga musya pa.
Dispuis may nag̓iparawat nang sasang tasang bulawan ang punuk ta irinëmën ang yay kapananglitan yang tanan ang mga ubra-ubrang makalalaway ta isip yang Dios sigun ka man tung pag̓urubraën na.
5 Tung kikilayën na may sasang aran ang nasulat ang may linëgdangan nang indi nag̓amarësmësan yang kadaklan ang maning taa:
“Babiloniad ang bantug ang siudad ang yay ina yang mga baw̓ay ang pagpagamit pati yang kumpurming makalalaway ta isip yang Dios tung bilug ang kaliw̓utan”.
6 Numanyan naitaw ra ang yang baw̓ay ang atia nagpabuu ra tung dug̓u yang mga tauan yang Dios,
bilang yang mga taung pinangimatay ra natëtëngëd bug̓us yang isip nira tung ni Jesus ang indi ra ka ëngëd namamalpas tung anya.
Numanyan tung pagtëlëngu tung anya,
nabërëngaw ra ta dakulung pagkabërëng.
7 Mag̓aning yang angil tung yëën ang nagbugnu,
“Ayw̓a nag̓abërënga?
Pakdëkëna ra yëën kung unu pay nag̓adapatan yang naita mung atia ang indi nag̓amarësmësan ta kadaklan.
Ya taa yang linëgdangan yang baw̓ay ang atia pati yang ayëp ang atiang nag̓asaayan na ang pituy kulu na ig sam puluk ay sungay na.
8 Atiang ayëp ang naita mu,
minyang atiing tukaw pa,
piru numanyan anda ra.
Ang pagkatapus siguradung maglua pa ka ëngëd duun tung bulalut ang atiing pinakaadalëm.
Piru tung uri kadiaduan da ka ëngëd yang panampëtan na.
Ug̓aring tung paglua na,
kung maita ra nganing yang kadaklan ang mga taung pamagtinir tung kaliw̓utan ang naa ang kumpurming pagpaguyud pa tung sistima na,
mangabërëng da ta mupia tung anya natëtëngëd tung pagkabëtang nang minyang atiing tukaw ang pagkatapus naplëk ang pagkatapus minyang si kang uman.
Yang mga taung atia,
ya ra yang disti pa atiing indi pa ag̓aimu yang Dios yang kaliw̓utan,
indi nasulat yang mga aran nira tung listaan yang kumpurming paëyangan ta ipagpangabui nirang baklu ang anday pagtapusan na.
9 Kung tinu pay mawayang ta isip ang maskëng mag̓intindi,
bala ra tung anyang magsaulu yang ianingung naang magdasun.
Yang linëgdangan yang pitu nga kuluan yang ayëp ang atia,
pitu ka nga bukiran ang yay pagkarungan yang baw̓ay ig pitu ka ngadian.
10 Yang lima tung nirang mga adi,
nagkarapatay ra,
yang sam bilug paggaëm pa,
yang sam bilug indi pa paglua.
Maglua ra nganing tia,
dapat ang gësyë ilëm yang uras ang ipaggaëm na.
11 Yang ayëp ang atiang minyang ang tukaw ang pagkatapus numanyan anda ra,
tanya mismu yang yawalung adi,
piru nag̓auri pa tung yapitu ig nagapil da kang lag̓ing nabilang tung nirang pitu.
Anday dumang panampëtan na,
kadiaduan da ka ëngëd ang anday katapus-tapusan na.
12 Dispuis pa yang mga sungay nang sam puluk ang naita mu,
yang linëgdangan na,
sam puluk ka ngadian ang dërëngan ang mamaggaraëmën ang indi pag papgësën ta kagaëman nira.
Piru tung uri pamakdulan da ka ëngëd ta kagaëman nira ang para kasiraan da ka tanira yang ayëp ang mamaggaraëmën ta gësyë ilëm ang uras.
13-14 Yang sam puluk ang atia,
sasay kërësën nira ang yang katëngdanan nira bilug̓un da nirang ipalalang tung ayëp ang para kasiraan da ka tanirang mamansibatuk tung pag̓aningën ang Karniru.
Piru pamirdiën ka ëngëd yang pag̓aningën ang Karniru ay natëtëngëd tanyay makagag̓aëm tung tanan ang may mga kagaëman,
maskin unu pang kaabwatay.
Pati yang mga tauan na gapil da ka tung pandëëg na ang ya ra ka man yang mga taung pinagpilik na kang lag̓i ang pagkatapus bintëng na ra ka yang mga isip nirang magpamangulu tung anya,
ig bug̓us da ka yang mga isip nirang pamag̓usuy tung kalëlyag̓an na,”
mag̓aning.
15 Numanyan mag̓aning si yang angil tung yëën ang nagsugpat,
“Yang linëgdangan yang mga subang atiang naita mu ang yay pag̓atiniran yang baw̓ay ang atiang pagpagamit,
ya ra yang mga tau tung bilug ang kaliw̓utan ang maskin unu pang nasyunay,
maskin unu pang bitalaay.
16 Asta yang mga sungay ang atiang sam puluk ang naita mu pati yang ayëp mismu,
imbis padayunan nira yang pagpakisanyug nira tung baw̓ay ang atiang pagpagamit,
unaw̓is kasiraan da ka tanirang mamagdëmët tung anya.
Anday duma,
kapasan da nirang pisan tung tanan ang nag̓amaal na ang asta mag̓ing luas da,
pati tinanguni na panganën da ka nira ig kung unu pay maëpëd kuw̓ulan da ilëm nira ta apuy.
17 Ya ray buatën nira tung anya ay natëtëngëd ya ray ipaisip yang Dios tung nirang buatën ug̓ud matumanan da nira yang planu na,
maskin indi nira masiman.
Purisu sasay kërësën nirang mga adi ang yang katëngdanan nira bilug̓un da nirang ipalalang tung ayëp ang asta magkamatuud da ka ëngëd yang tanan ang ipinagpaula yang Dios tung mga taung pinanalig̓an nang yay dapat ang magkarainabu tung kauri-urian.
18 Dispuis pa,
anday dumang linëgdangan yang baw̓ay ang atiang pagpagamit ang naita mu,
ya ra yang sasang siudad ang bantug ang yay may gaëm tung tanan ang mga adi tung bilug ang kaliw̓utan,”
mag̓aning.