Yang Pamukbuk Tung Paklëd Yang Pitu NGa Mangkukan (16:1-21)
16
Numanyan may nagngëlung busis ang dakulu ang liit duun tung pagtuuan ang atii ang yay nagkalalangan tung pitu ngangilan ang mag̓aning,
“Ala panawamu ra.
Ibukbuk mi ra yang irinëmën ang atiang ipinabtang tung pitu nga mangkukan ang yay kapananglitan yang kasisilag̓ënu ang ya ray ipaitaw tung mga tau tung bilug ang kaliw̓utan,”
mag̓aning.
2 Pagkatapus,
diritsyu ra ka man ang nagpanaw yang primirung angil ang ibinukbuk na tung kaliw̓utan yang paklëd yang mangkuk ang ëkël na.
Pagkabukbuk na,
yang mga taung kumpurming may marka yang ayëp ig pamagtuu ka tung bultung atiang ipinasuad tung anya,
pinanubwan da ta mga lukang dilikadung durug kasisiita.
3 Numanyan yang pangyadwang angil,
ya si kay namukbuk tung tëëb yang paklëd yang mangkuk ang ëkël na.
Pagkabukbuk na,
yang tëëb nanulad da tung dug̓u ta taung pinatay ang pagkatapus nagkurta rang duru rag buyu.
Purisu yang tanan ang nag̓abui tung tëëb luw̓us dang nagkarapatay.
4 Numanyan yang pangyaklung angil,
ya si kay namukbuk yang paklëd yang mangkuk ang ëkël na tung mga suba may tung mga sungkuk ta wai.
Pagkabukbuk na,
namagyari rang dug̓u.
5 Atii nagngëlu ra yang angil ang may gaëm tung mga wai ang yay nagbitala tung Dios ang mag̓aning,
“Yawang sagradung pisan ig asana kang lag̓i disti pa tung katëbtëw̓an ang asta simanyan,
talagang matadlëng ang pisan yang pagkadios mu,
kipurki sinintinsiaan mu ra nganing ang pinarusaan yang mga taung atia.
6 Kipurki yang ipinaturuk nira dug̓u yang mga tauan mu may yang mga manigpalatay yang bitala mu ang pagkatapus simanyan dug̓u ka yang ipinakdul mu tung nirang igmën.
Bag̓ay ang pisan tung nira,”
mag̓aning.
7 Pagkatapus,
may nagngëlu sing busis ang liit duun tung midyu lamisaan ang atiing pagparataw̓ukan ta paamut ang ya ray nagpauyun tung bitala yang aruman nang angil ang mag̓aning,
“Ëë ka man,
yawang Dios ang makagag̓aëm tung tanan,
yang tanan ang pagparadangatën mu ta mga parusa tung mga taung atia anday mali na may gësyë,
kung indi,
matadlëng dang pisan,”
mag̓aning.
8 Numanyan yang pangyaëpat ang angil,
ya si kay namukbuk yang paklëd yang mangkuk ang ëkël na.
Asan ibukbukay na tung kaldaw.
Purisu tinugtan da yang Dios ang yang mga tau magkarakiaw ra tung kinit nang nagsubra ra.
9 Purisu nagkarakiaw ra ka man tanira tung kinit yang kaldaw ang puirti.
Piru bëlag ya mamanligna tung mga kasalanan nira ang nunut ta pagdarayawën nira tung Dios,
ya ra mamagduminar ang mamagtag̓am ta pakusalak tung anya ang yay may kalalangan tung mga sarut ang mga maning tia.
10 Numanyan yang pangyalimang angil,
ya si kay namukbuk yang paklëd yang mangkuk ang ëkël na tung pinakasintru yang nag̓apagkëmkëman yang ayëp.
Pagkabukbuk na,
nangiklëp da yang intirung sinakëpan yang kagaëman na.
Yang mga kinasakpan na mga ya nga këg̓ëtay nira yang mga dilak nira natëtëngëd mas pang nadulangan yang siit yang mga luka nira natëtëngëd tung ëlëd nirang subra tung makiklëp ang atii.
11 Piru bëlag ya mamanligna tung mga ubra-ubra nirang malain,
ya si mamagduminar ang mamagtag̓am ta pakusalak tung Dios ang pag̓istar duun tung langit natëtëngëd tung mga luka nirang atiang durug kasisiit.
12 Numanyan yang pangyaënëm ang angil,
ya si kay namukbuk yang paklëd yang mangkuk ang ëkël na tung subang dakulu ang paggug̓uuyan ang Eufrates.
Pagkabukbuk na,
naplaan da ang para maalpës dang matindakan yang mga ading duun mamanliit tung ampir tung lëlpakan yang kaldaw,
kasiraan da ka tanira yang mga sundalu nira.
13 Pagkatapus may naitaung tulu nga dimunyuan ang kuari talipaka ang dërëngan ang nansilua.
Yang sam bilug luminua tung nganga yang dragun,
yang sam bilug tung nganga yang primirung ayëp,
yang sam bilug tung nganga yang aruman nang ayëp ang pangërëngan tung anya ang pulus bukli yang mga bitala na.
14 Yang tulu nga dimunyuan ang atia may mga pruibang makabëw̓ërëng ang nag̓asarangan nirang nag̓ipampalua.
Yang bida nira pamagliliw̓utun tung intirung kaliw̓utan ang para yang tanan ang mga adi panagpunun da nira tung sasang lugar ang para duun da maggiriraan tanira.
Yay mainabu tung uras ang ipinagtipu kang lag̓i yang Dios ang makagag̓aëm ang ya ra kay uras ang ipagsintinsia na tung bëlag̓an mga tauan na tung kalainan ang anday katapusan.
15-16 Numanyan yang pinagpasagpunan yang mga dimunyu tung mga ading atia,
ya ra yang banwang paggug̓uuyan ang Armagedon tung bitalang Hinebreob.
Numanyan ti Jesus inali rang suminalëët ang nagpabantay tung yatën ang mga tauan na ang mag̓aning,
“Kung maglëkataw ra nganing,
maning pa tung panaw ta sasang takawan ang masapuan da ilëm,
nainabu ra.
Yang taung pasadyaën ëngëd yang Dios ya ra yang taung pirming riparasiun tung ipaglëkatu ug̓ud indi ra masëka.
Muya manularamu tung sasang sundalung indi ra nagsimpan ta aw̓ël nang masuut na kung manuyu ra nganing tung labanan.
Kung liamarën da nganing ta inali,
anday duma,
magpanaw ra ilëm ta luas ang ya ray maëyakan na tung mga kaarumanan nang nangariparasiun dang lag̓i,”
ag̓aaning.
17 Numanyan yang yapitung angil,
ya si kay namukbuk yang paklëd yang mangkuk ang ëkël na tung pamilat-pilatan yang langit.
Pagkatapus may busis ang dakulu ang nagbitala ang liit tung siang bulawan asan tung pagtuuan tung Dios tung langit ang mag̓aning,
“Talusun da ka ëngëd yang tanan!”
mag̓aning.
18 Pagkatapus diritsyu rang nag̓intra kidlat ang ya rag papabugsu may duldul ang paglëlpakën ang nunut da ka ta yëgyëg yang kaliw̓utan ang durung pisan agkëtël.
Impisa pa atiing primirung pag̓imu yang Dios tung mga tau,
anda pay yëgyëg ang maning tiig këtël.
19 Yang pinakaw̓ut na,
yang siudad ang atiang bantug da rin tung intirung kaliw̓utan,
nagbërëlag̓an da ta tulung parting nagkaradiadu.
Pati yang mga siudad tung tanan ang banwa,
luw̓us da kang nagkaradamay ang nagkaragëw̓a yang mga kabalayan.
Ay ya pa ag̓ari yang siudad ang atiang pag̓aningën ang Babilonia ang bantug da rin tung intirung kaliw̓utan,
dinëmdëm da yang Dios ang pinagrëg̓ës ang manginëm yang sasang irinëmën ang durug isëg ang itinag̓ay na tung basu ang yay kapananglitan yang kasisilag̓ën na.
20 Dispuis yang dumang pinakaw̓ut yang yëgyëg ang atii,
yang tanan ang kapupulu-puluan nagkaraparëng dang nagkaratëgdang tung tëëb,
pati mga bukid nagkaragëw̓a rang nag̓ing datal dang tanan.
21 Dispuis pa,
may mga yilung mabiw̓ilug ang maninga kuran ang mamag̓abatug kadarakul ang ya ray nagkarataktak tung mga tau.
Kung timbangën pa yang lëbat nira,
alëngët taglilimang puluk ang kilu.
Numanyan yang binuat yang mga tau,
yang Dios ya si ay dinuminar nirang pinakusalak natëtëngëd tung sarut ang atiang yilu ang makakaëlëd.