Natëtëngëd Tung Mga Taung Indi Ra Ka Ëngëd Namagpadëëg Tung Ayëp (15:1-4)
15
Numanyan may naitaw sing sam bilug sing pruiba tung langit ang durung pisan agkabëw̓ërëng.
May pitu ngangilan ang yay may katëngdanan ang mamagpadangat tung pitu ka nga sarutan.
Yang mga sarut ang naa,
ya ra yang pangultimung mga sarut ang asan da nga talusay yang Dios yang pagpaita na yang kasisilag̓ën na.
2 Pagkatapus,
pagtëlëngu si,
unu pay maitaw,
kung indi,
ya si yang midyu salamin ang atiang pariu ka tung tëëb aglapad ang may apuy nang maning pa tung pagbawang.
May naitaw ra kang mga taung këmdëngan asan tung binit na ang may ëkël nirang mga dikuirdas ang ipinamakdul yang Dios tung nira ang para yay gamitën nirang mamagdayaw tung anya.
Anday duma,
ya ra yang mga taung indi ra ka ëngëd namagpadëëg tung ayëp,
kung indi,
namanguntiël dang indi ra namagtuu tung anya pati tung bultung ipinasuad tung anya.
Asta yang lumirung atia ang yay kapananglitan yang aran na,
indi ra ka namagpauyun ang imarka pa tung niraa.
3-4 Yang pagturugtug̓un nira ya kay pagkarantaën nira ta sasang kantang nag̓ipagdayaw nira tung Dios natëtëngëd tung pagparaktëlën na tung nira ang asta indi ra namagpadëëg tung ayëp ig natëtëngëd tung pagdipindir na tung nirang nangimalësan tung kumpurming tinu pay nagpandëëg-dëëg tung nira.
Yang nag̓akanta nirang atii,
magkaanggid ka ta palaksu tung kantang atiing kinanta ni Moises ang turuw̓ulun yang Dios atiing pagpalibri na tung nasyun nirang mga Israel ang tanira ipinagpalua na duun tung banwang Egiptob.
Puidi kang aningënu ang yang nag̓akanta nirang atii magkaanggid ka tung kinanta yang pag̓aningën ang karniru atiing nandëëg da tung sistima yang kaliw̓utan ang naa may tung kamatayënc.
Maning taa yang sarabyën yang kanta nira:
“Ampuan yamën ang Dios ang makagag̓aëm tung tanan,
Durug puirsa yang mga pag̓urubraën mu ig makabëw̓ërëng.
Yawang may kagaëman tung tanan ang nasyun tung bilug ang kaliw̓utan,
Talagang matadlëng ang pisan yang tanan ang pag̓abuat mu andang pisan ay mali na may gësyë.
Yang tanan ang mga tau mamagkatinir da ta ëlëd nirang duru tung nuyu,
Tanirang tanan mamagdayaw tung nuyu natëtëngëd tung pagkadios mu,
Ultimu ilëm yaway limpiung pisan ta ug̓ali.
Yang tanan ang mga tau maskin unu pang nasyunay mamagtuu ra ka ëngëd tung nuyu,
Kipurki bistu tung nirang tanan yang pag̓urubraën mung pagkatamang pisan,”
mag̓aning tanirang namagkanta.
Natëtëngëd Tung Pitu NGangilan Ang Mamagpadalpët Yang Bëtang Yang Pitu Ka NGa Mangkukan (15:5-8)
5 Pagkatapus yang pagkarantaën yang mga taung atii,
naitaw ra yang talub yang kuartung pinakasagradu ang yag lulg̓ud tung pagtuuan tung Dios tung langit ang naa pala,
nabukaan da.
Duun ka agbëbtang yang mga katuw̓ulan yang Dios ang isinulatd.
6 Asan da namansilua yang pitu ngangilan ang atiang may katëngdanan nirang mamagpadalpët tung pitu ka nga sarutan.
May pag̓asuut nirang aw̓ël ang pag̓aningën ang lino ang durug kalimpiu ig durug kasusulaw ig may aw̓ël kang yag baw̓anda tung tinanguni nirang bulawan yang kulay na.
7 Numanyan yang sam bilug tung ëpat ang atiang nag̓abui,
ya ray nagparawat tung pitu ngangilan ang atii yang pitu ka nga mangkukan ang mga bulawan ang punuk ta irinëmën ang yay kapananglitan yang kasisilag̓ën yang Dios ang yay nag̓abuing asta tung sampang anda ëngëd ang pisan ay katapus-tapusan na.
8 Pagkatapus yang pagtuuan tung Dios ang atii tung langit,
tinaw̓ukan dang tanan ëkël tung kasusulawën yang Dios may tung puirsa yang kagaëman na.
Purisu anday sarang ang maklëd asan mintras indi pa ag̓atapus ta pamukbuk tung kaliw̓utan yang pitu nga sarutan ang pag̓aëkël-ëkëlan yang pitu ka ngangilan.