Natëtëngëd Tung Mga Taung Ginawad Yang Pag̓aningën Ang Karnirung Nagpakugmatay (14:1-5)
14
Numanyan pagtëlëngu si,
unu pay maitaw,
kung indi,
ya ra yang pag̓aningën ang Karniru ang yag këkdëng tung bukid ang pag̓aningën ang Siona.
May mga aruman nang sang gatus may ëpat ang puluk may ëpat ang liw̓u nga tauan (144,000) ang atiing nagkarasulatan da yang mga kikilayën nira yang aran na may yang aran yang pag̓aningën nang Ama nab.
2 Pagkatapus may nagngëlung busis duun tung langit ang durug tunul ang kung pamatianu,
ang kaisan midyu tung dinag̓unu yang lakun ang pamamuka.
Puidi kang aningënu ang kaisan midyu tung duldul ang darakulu ang paglëlpakën ubin midyu ang kaisan tung turugtug̓an yang mga dikuirdas ang atiang pag̓aningën ang arpa.
3 Dispuis yang mga taung atiang sang gatus may ëpat ang puluk may ëpat ang liw̓u (144,000),
tumalungaan tung siang bulawan ang pagkarungan yang Dios ang asan ka tung paliw̓ut na yang ëpat ang nag̓abui may yang duruang puluk may ëpat nga mamaëpëtan.
Pamagkarantaën ta sasang kantang baklung pisan ang inding pisan maaralan ta duma,
kung indi,
tanira ra ilëm ay pangaskë.
Nagkamaningan da ta maning tia ay natëtëngëd tung tanan ang mga tau tung bilug ang kaliw̓utan,
ultimu ilëm taniray ginawad yang pag̓aningën ang Karniru ang ipinampaulik da tung Dios ang pinagpaalawiran da ka rin nira.
4 Yang mga taung atia,
ya ra yang mga taung indi ra ëngëd namagpamansa tung mga sadili nirang namagtuu tung ayëp,
kung indi,
binilug da nira yang isip nira tung pag̓aningën ang Karniru ang indi ra ka ëngëd namamalpas tung anya,
maskin ay pa ilëm ngaëklay na,
maskin ya pay magakdan nira ta kamatayën.
Tung tanan ang mga tau tung kaliw̓utan,
ultimu ilëm tanira ay ginawad nang ipinampaulik tung Dios.
Bug̓us da yang mga isip nira tung Dios durua yang pag̓aningën ang Karniru ang ya ray pinag̓intrigaan nira yang mga sadili nira.
5 Inding pisan namagbukli ang para mangalikay ra rin tung malainc,
andang pisan ay mabangdan tung nirang malain.
Yang Kadaklan Ang Mga Tau Nag̓apakdulan Pa Ta Timpu Nirang Mamanligna Tung Mga Ubra-ubra Nirang Malalain (14:6-7)
6 Numanyan may naitaw si kang sasang angil ang paglayug-layug tung pamilat-pilatan yang langit.
Ëkël na yang Matinlung Balitang indi ëngëd mag̓uman ug̓ud ipakaw̓ut na tung tanan ang mga tau tung bilug ang kaliw̓utan ang kumpurming pamagpasuag pa tung Dios,
maskin unu pang nasyunay,
maskin unu pang bitalaay.
7 Dakulu yang busis nang pag̓aning tung mga tau,
“Kaministiran ang magkatiniramu ra ta pag̓ëlëd ming ustu tung Dios ig manlignaamu ra ka tung mga ubra-ubra ming balaw̓ag tung anya ang nunut da ka ta pagdarayawën mi tung anya.
Kipurki magkakaw̓ut da yang uras ang ipagsintinsia na tung tanan ang mga tau.
Maayën pang magsukuamu rang lag̓ing magtuu tung anya ang nunut da ka ta pag̓urubligarën mi yang mga kasalanan ang nagkarabuat mi ang tanya ka man yang nag̓imu yang kalangitan may yang kaliw̓utan may yang tëëb may yang mga sungkuk ta wai,”
ag̓aaning.
Nag̓aula Kang Lag̓i Ang Yang Siudad Ang Babilonia Magëw̓a Rang Pisan (14:8)
8 Numanyan may sam bilug sing angil bilang pangyadwa ra ang ya ray nagdasun ang luminua ang yay nagbitalang mag̓aning,
“Salamat tung Dios!
Talagang gëw̓a rang pisan yang siudad yang Babilonia ang bantug da rin tung intirung kaliw̓utan.
Ya ra ka man yang siudad ang nagpanangway tung tanan ang mga nasyun yang sasang irinëmën ang maisëg ug̓ud mamanginlasay ra tung Dios ig durung kalëlyag nirang mamagsagyap ta mapakli nira tung anya ang para yay pag̓inëtëg̓an yang mga isip nira.”d
Yang Panampëtan Yang Mga Taung Kumpurming Magtuu Tung Ayëp May Tung Bultung Ipinasuad Tung Anya (14:9-13)
9-10 Numanyan may sam bilug sing angil bilang pangyaklu ra ang ya ray nagdasun ang luminua ang yay nagkëkëndalën ang mag̓aning,
“Kumpurming tinu pay magtuu tung ayëp ang atia,
pati tung bultung ipinasuad tung anya ang pagkatapus magpauyun da ka ang yang marka yang ayëp imarka ra ka tung kikilayën na ubin tung kalima nang tuu,
yang taung atia,
ya ray masapul ang pisan tung kasisilag̓ën yang Dios.
Yang kaalimbawaan yang kasisilag̓ën nang atia,
maning pa tung sasang irinëmën ang durung pisan agkaisëg ig andang pisan ay simbul nang pandisimular.
Ya ray itag̓ay na tung basu ang ipainëm tung anya.
Anday duma,
papinitinsiaan na tung asupring pag̓apuy ang ya ra ka pa man agdawalay nira yang mga angil ang pag̓apanuw̓ul yang Dios may yang pag̓aningën ang Karnirue.
11 Yang taw̓uk yang apuy ang pagpapinitinsiaan tung nira sigi-sigi ra ilëm yang ukbu nang asta tung sampa ang anda ëngëd ang pisan ay katapus-tapusan na.
Kumpurming tinu pa man ay magtuu tung ayëp pati tung bultung ipinasuad tung anya ig magpauyun da ka ang yang aran na imarka ra ka tung anya,
kaldaw law̓ii,
inding pisan maënayan tung pinitinsiang atiang asta tung sampa,”
ag̓aaning yang angil.
12 Mga putulu,
ta yatën ang mga tauan yang Dios ang pagtuman yang mga katuw̓ulan na ig pagpadayun tung pagtaralig̓ën ta tung ni Ginuung Jesus,
kaministiran ang patëntënën ta ëngëd yang mga isip tang mag̓agwanta tung mga kaliwag̓an ang kumpurming mapasaran ta.
13 Taa numanyan may nagngëlu sing sasang busis ang duun manliit tung langit ang ya ray nagbugnu tung yëën ang mag̓aning,
“Juan,
ya ra taa yang isulat mu.
Mag̓impisa numaan,
kung nainu pay imatayën natëtëngëd ang indi ra mamalpas tung yëën,
talagang ya ray pasadyaën yang Dios ta mupia,”
mag̓aning.
Mag̓aning ka yang Espiritu Santong nagpaugtun,
“Tama ka man ang pisan tia ay mangadiskansaan da tanira tung tanan ang mga pinitinsiang napasaran nira arangan da ilëm tung pagtaralig̓ën nirang bug̓us tung ni Ginuung Jesus.
Talagang pasadyaën da ka man tanira yang Dios ay natëtëngëd kung ay pa ag̓ari yang pinakaw̓ut yang tanan ang pagpakabëdlay nirang nanirbian tung anya,
inding pisan malipatan na,
kung indi,
ya ra ka ëngëd ay dëmdëmën nang balësan,”
mag̓aningf.
Yang Pagsagpun Ni Ginuung Jesu-Cristo Tung Tanan Ang Mga Tauan Na Nag̓ipananglit Tung Pangayëg (14:14-16)
14 Numanyan pagtëlëngu si,
unu pay maitaw,
kung indi,
may sasang panganud ang kulit ang may Maninga Tau ang yag kakarung asan.
Tung kulu na may yag susuklub ang kurunang bulawan ang yay pagpailalang nandëëg da tung mga kuntrariu ig tung kalima na may nag̓apëgsan nang karit ang matarëmg.
15 Pagkatapus may sam bilug sing angil bilang pangyaëpat da ang luminua tung pagtuuan tung Dios tung langith.
Nagkëkëndalën da tung yag kakarung tung panganud ang mag̓aning,
“Ala,
gamitën mu ra unu tiang karit mung magpanggasap ta paray.
Kipurki tilingayëg da unu,
lutuk da unung pisan yang paray ang garasapën tung bilug ang kaliw̓utan,”
ag̓aaningi
16 Pagkatapus naang yag kakarung tung panganud,
dayun na rang ipinanggasap yang karit na ang asta luw̓us da yang paray ang nagkaragasap na.
Yang Pagsintinsia Yang Dios Nag̓ipananglit Tung Panggërët Tung Mga Kapuyut Yang Mga Ubas. (14:17-20)
17 Pagkatapus may naitaw sing angil ang sam bilug bilang pangyalima ra ang ya si kay luminua duun tung pagtuuan tung Dios tung langit ang may nag̓apëgsan na kang karit ang matarëm.
18 Pagkatapus may angil si pa ka ëngëd ang sam bilug bilang pangyaënëm da ang ya si kay luminua ang duun manliit tung midyu lamisaan ang parataw̓ukan ta paamut.
Tanya yang may kagaëman tung apuy asan.
Nagkëkëndalën da tung aruman nang sam bilug ang angil ang may pëg̓ës nang karit ang matarëm ang mag̓aning,
“Ala,
gamitën mu ra unu atiang karit mung matarëm ang magpanggërët tung mga kapuyut yang mga ubas tung bilug ang kaliw̓utan ay natëtëngëd lutuk da unu,”
ag̓aaningj.
19 Purisu numanyan yang angil ang atiang sam bilug,
dayun na ra ka man ang ipinaggërët yang karit nang nagpanggërët yang mga kapuyut yang mga ubas tung bilug ang kaliw̓utan.
Pagkatapus dayun na ra kang ipinamukbuk tung lilikëran ang dakulu,
ang ya ray kapananglitan yang kasisilag̓ën yang Dios ang duru ang ya ray maagmaan yang mga taung bëlag̓an mga tauan na.
20 Numanyan pinaglikëd-likëran da yang mga ubas tung lilikdan duun tung lua yang siudad ang yang dug̓u yang mga tau,
maninga bawang ang tuminulw̓a ang yang dalëm na tumimpëng da tung pagtakëran ta mga busal tung nganga yang mga kabayuk ig yang tinëgkaan yang tinulw̓aan na,
san liw̓u may ënëm ang gatus (1,600) ang istadia ang pag̓aningënl.