Yang Durua NGa Ayëpan (13:1-10)
13
Numanyan may naitaung sasang ayëpa ang ya lua tung tëëb.
Pituy kulu na ig sam puluk ay sungay na ang karampëd ka ta kuruna ang yay pagpailala tung kagaëman na.
Dispuis kada kulu may nasulat ang aran ang magkabag̓ay ang tung Dios ilëm nga dapat ang pagkatapus ya ray ingkëlan ta mga tau ka ilëm ang pamag̓aambu ang tung nira ilëm unu nga bag̓ayb.
2 Dispuis yang ayëp ang atiang naitaw anggid tung tigri ang puntuk-puntuk ilëm yang kulay na ang yay paggug̓uuyan tung leopardo.
Yang kakay yang ayëp ang atia durug dakul ang yang ukub na durug tarëm ig abubwat ang katulad ka tung sasang ayëp ang talunun ang paggug̓uuyan tung oso.
Yang nganga na maninga nganga ta liunc.
Dispuis pinakdulan da yang dragun yang sadiling kagaëman nang durug kapuirsa ang para maggaraëmën da tung intirung kaliw̓utan.
3 Dispuis pa yang kulu nang sam bilug,
midyu may luka nang dilikadu ang puiding ya ra rin ay mapatayan na ang pagkatapus ya ra ngaulikay.
Purisu yang kadaklan ang mga tau tung kaliw̓utan,
namag̓usuy ra tung ayëp ang atia natëtëngëd tung pagkabërëng nirang duru tung pagkabëtang na.
4 Purisu anday dumang linuaan na,
namagtuu ra dayun tung dragun natëtëngëd yay nagpakdul yang kagaëman na tung ayëp ang atia.
Pati yang ayëp tinuuan da ka nira.
Ya ra ag̓aningay nirang,
“Inding pisan mapasiring-siringan yang ayëp ang naa.
Andang pisan ay mandëëg tung anya,”
mag̓aning.
5 Taa numanyan yang ayëp ang atia,
tinugtan da yang Dios ang magpaambug da tung sadili nang mag̓ambu ang tanya ilëm unu ay bag̓ayan yang pagkabëtang yang Diosd.
Dispuis tinugtan da ka yang Dios ang maggaraëmën tung sëlëd ëpat ang puluk may duruang bulan (42)e.
6 Purisu numanyan pinag̓intraan na ra ka man duminar yang Dios.
Maskin yang aran nang durug kasagradu may yang pag̓atiniran na,
bilang yang kumpurming pamagtinir tung langit,
ya ra kay pinaglamku naf.
7 Dispuis tinugtan da ka yang Dios ang magkuntra ta maayën tung mga taung binuat nang mga tauan na ang asta pandëëg̓ën na.
Dispuis pa tinugtan na ra kang maggaraëmën tung tanan ang mga tau,
maskin unu pang nasyunay,
maskin unu pang bitalaay tung bilug ang kaliw̓utan,
sakëp na rang tanan.
8 Purisu mamagtuu ra tung anya yang tanan ang mga taung pamagtinir tung bilug ang kaliw̓utan,
puira pa tung kumpurming nasulat yang mga aran nira tung listaan yang kumpurming paëyangan yang Karnirung inimatay ta ipagpangabui nirang baklu ang anday pagtapusan na.
Baklu naimu yang kaliw̓utan,
nasulat da kang lag̓i asan yang mga aran nira.
9 Kapurisu,
mga putulu,
kumus maning da ka man tia yang mainabu,
kung tinu pa asan ay pamati tung sulat ang atiang nag̓abasa,
kaministiran ang intindiën na ta mupia yang ag̓ianingung naa.
10 Kung yang planu yang Dios para tung yatën ang mga tauan na ang ita dëëpën ang ipakalabus natëtëngëd tung pagtaralig̓ën ta tung ni Jesus,
pauyunan ta ra ilëm.
Ubin kung yang planu na tung yatën ang ita sibatan ta ispadang imatayën natëtëngëd tung pagturumanën ta yang kalëlyag̓an ni Ginuung Jesus,
ya ra ka ilëm ay pauyunan tag.
Yang ilyag̓ung ianing,
dapat ang ëltën ta ta maayën ang pabakërën yang pagtaralig̓ën ta tung anyang mag̓aragwantaën tung mga pinitinsiang kumpurming mga maning tiang mapasaran ta.
Natëtëngëd Tung Sam Bilug Pang Ayëp Ang Naita Na (13:11-18)
11 Numanyan may naitaw si kang sam bilug pang ayëp ang ya lua tung adalëm yang katanëkan.
Duruay sungay nang magkapariu tung sungay ta karnirung lalii ig kung magbitala,
maninga dragunh.
12 Yang kagaëman yang aruman nang ayëp ang durug puirsa ya ray gamitën na,
bilang ya ray tinalig̓an yang aruman nang mangërëngan tung anyang magkalalangan tung mga tau.
Purisu yang tanan ang mga taung pamagtinir tung bilug ang kaliw̓utan ang kumpurming pamagpaguyud pa tung sistima na,
ya ray panrëgsan nang mamagtuu tung aruman nang ayëp ang may luka nang dilikadu ang pagkatapus ya ra ngaulikay.
13 Dispuis yang ayëp ang atiang sam bilug,
magpalapus da ta mga pruibang maktël.
Maski nganing apuy,
ipabungsad na tung katanëkan ang yag dawalay yang mga tau.
14 Purisu duun da mapatalang na yang mga taung pamagtinir tung kaliw̓utan natëtëngëd tung mga pruibang atiang ilinug̓ut yang Dios tung anyang ipampalapus na i ang tung uras ang ipagpalapus na asan da ka tung anya magpaniid yang ayëp ang pangërëngan na.
Lalangan na ra nganing yang mga tau ang mamagpabuat da ta sasang bultu ang para yay pagtuuan nira tung aruman nang ayëp ang sinibatan ta ispadang napatay ang pagkatapus nabui si kang uman.
15 Yang ayëp ang atia linugtan da ka yang Dios ang magpakdul ta linawa tung bultung atiang ipakbung tung aruman nang ayëp ug̓ud mapagbitala ra ig mapagkalalangan da ka ang kumpurming tinu pay indi magtuu tung anya,
dapat ang imatayënj
16 Dispuis pa magpanrëg̓ës da ka tung tanan ang mga tau maskin mga abwat ta pagkabëtang kag aranëk man,
maskin manggaranën kag maliliwag̓ën man,
maskin turuw̓ulun kag bëlag man,
ang tanira dapat ang mamagpamarkang luw̓us tung mga kalima nirang tuu u kung indi,
tung mga kikilayën nirak.
17 Yang katuyuan na tia,
ay ug̓ud anday mapangalang,
anda kay mapagpaalang kung anday marka nang maning tial ang ya ra yang aran yang aruman nang ayëp ubin yang lumiru ang yay kapananglitan yang aran na.
18 Purisu ta yamung pamati,
kaministiran asan da gamitay mi yang mga isip ming mawayang.
Kung tinu pay maskëng mag̓intindi,
bala ra tung anyang magsaulu kung unu pay nag̓adapatan yang lumirung atiang kapananglitan yang aran yang ayëp ang atia ay kipurki yang kapananglitan yang lumiru na aran ta sasang tau.
Yang lumiru na,
ënëm ang gatus may ënëm ang puluk may ënëm (666)m.