Natëtëngëd Tung Durua Nga Pruibaan Ang Luminua Tung Langit Sigun Tung Sasang Baw̓ay May Sasang Dragun (12:1-6)
12
Numanyan may sasang pruibang durug kabëw̓ërëng ang luminua tung langit.
May sasang baw̓ay ang yang bisti na,
maninga kaldaw yang kasusulawën na.
Yang bulan midyu tung yay pamdungan yang mga kakay na.
Dispuis tung kulu na may sasang kurunang yag susuklub ang may sam puluk may durua nga dumakëlan ang yag pansidpët ang yay pagpailala ang tung uri tanya mandëëg da ka ëngëd.
2 Yang baw̓ay ang atia,
paranganaën da.
Paggaluak da nganing ta duru ang pagbalunbun ta masiit.
3 Pagkatapus may sam bilug sing pruibang luminua si tung langit.
May sasang dragun ang durug dakul ang yang kulay na mapulaa.
Pituy kulu na ang karampëd ka ta kurunab,
may sam puluk ay sungay na.
4 Simanyan yang ikuy na ya ray ikinaliwëswës na tung yaklung parti yang mga dumakël tung langit ang pagkatapus ya ray gulping ipinabungsad na tung katanëkanc.
Dispuis pa yag tatalunga tung baw̓ay ang atia ang ya rang ya rang mangana,
ug̓ud kung maluangan da nganing,
panganën na rang lag̓i yang mula.
5 Numanyan yang baw̓ay diritsyu ra ka man ang nangana ta mulang lalii ig yang ana nang atia,
ya ra ka pa man yang pinagpilik yang Dios ang maggaraëmën tung tanan ang nasyun ang durug kaigpit yang pagkërëmkëmën na tung nirad.
Piru imbis ang panganën da rin yang dragun,
unaw̓is ingkëlan da tung Dios ang yag kakarung tung siang bulawan ang para kasiraan da ka tanirang mamaggaraëmëne.
6 Numanyan yang baw̓ay tanya,
nagpalaksu ra tung banwang kapas duun tung may lugar ang pinagsimpan dang lag̓i yang Dios ang para duun da asikasuay tung sëlëd san liw̓u may duruang gatus may ënëm ang puluk ang kaldaw (1,260)f
Nag̓iplëk Da Yang Dragun Tung Langit Ang Nag̓ibugsu Tung Katanëkan (12:7-12)
7 Pagkatapus tia,
nagkagira ra yang langit.
Ti Miguelg ang yay sasang angil ang pinakaabwat may yang mga angil ang pag̓apanuw̓ul na,
namagpakiglaban da tung dragun ig yang dragun tanya nagbatuk da ka tung nira,
kasiraan da ka tanira yang mga angil ang pag̓apanuw̓ul na.
8 Pagkatapus dinëëg da yang dragun may yang mga kaarumanan na.
Indi ra tinugtan ang mamagtinir pa tung langit.
9 Anday dumang binuat tung dragun ang dakulu,
ipinlëk da ilëm ang ibinugsu tung katanëkan,
kasiraan da ka tanira yang mga angil ang pag̓apanuw̓ul na.
Naang dragun ang naa,
anday duma,
ya ra mismu yang nagpairaw-iraw atiing primirung pisan atiing pag̓imu yang Dios tung tauh.
10 Pagkatapus may nagngëlung busis ang durug tunul tung langit ang nagbitala ang mag̓aning,
“Ay salamat!
Yang Dios ang naang pag̓atuuan ta,
talagang ipampalibri na ra ka ëngëd yang mga tauan na,
ay ipalua na ra ka ëngëd yang paggaraëmën nang durug puirsa ëkël tung pag̓aningën ang Cristong pinagpilik na ang ya ray talig̓an nang magpapanaw tung paggaraëmën nang baklu tung bilug ang kaliw̓utan.
Siguradung ya ray mainabu natëtëngëd anda ra taa tung katalungaan yang Dios yang manigpamangdan tung mga kaputulan ta law̓iig kaldaw natëtëngëd tung mga kasalanan nira.
Kinaskas dang pinaliit taa tung langit.
11 Yang ipinandëëg nira tung anya ang tanira indi ra dinlutan yang mga pag̓ibangdan na tung nira,
bug̓us yang pagtaralig̓ën nira tung ni Jesus ang nagpaturuk yang dug̓u na para tung mga kasalanan nira ang tanya ka man maning pa tung sasang karnirung idinasag.
Dispuis pa,
yang sam bilug pang ipinandëëg nira tung ni Satanas,
ya ra yang pagparaingmatuurun nirang durug dërëp tung mga tau natëtëngëd tung kalibrian ang pinagtukud ni Jesus.
Maskin pinagpalëg pang imatayën kung indi mamalpas tung anya,
indi ra ka ëngëd kinanugun nira yang mga kabui nira.
12 Purisu yamung tanan ang pagtinir taa tung langit,
kumus kinaskas da ti Satanas taa tung langit,
ya ray ikasadya mi.
Piru yamung pagtinir asan tung bilug ang kaliw̓utan ang kumpurming pagpaguyud tung sistima na,
kanugun yang pagkabëtang mi.
Kipurki asan da tung numyu nga lënsad.
Duru rang kasilag na,
ay nag̓askëan na ra ang gësyë ra ilëm yang uras ang nag̓ilug̓ut tung anyang ipag̓ubra na,”
ag̓aaning duun yang busis tung langit.
Pagrutus Da Yang Dragun Tung Baw̓ay, Pati Yang Mga Kanubli Na Nag̓adëëg-dëëg̓an Na (12:13-18)
13 Taa numanyan yang dragun tanya,
pagkapamalad na tung sadili na ang naa pala kinaskas da tanyang ibinugsu tung kaliw̓utan,
anday dumang binuat na,
dayun dang nagrutus tung baw̓ay ang atiang nangana tung laliing atia ang para dëëg-dëëg̓an na.
14 Piru yang baw̓ay tanya pinakdulan da yang Dios ta pakpak ta kanug ang dakulu ug̓ud malayug da duun tung banwang kapas duun tung may sasang lugar ang duun da asikasuay tung sëlëd tulung takun may tëngai ug̓ud duun da nga libri tung iraw.
15 Numanyan anday dumang binuat yang iraw,
nagbula ta wai ang maninga subag kasëlëg ang para ibëëk da yang baw̓ay ang malmës.
16 Piru yang tanëk ya ray nagtaw̓ang tung baw̓ay ang nguminanga ra ang yang waing ibinula yang dragun,
ya ray tinlën na.
17 Pagkatapus yang dragun,
nasilag da ta duru tung baw̓ay.
Purisu naningayaw ra ang para kuntraën na ra ta maayën yang kadaklan ang mga kanubli yang baw̓ay ang naa ang ya ra ka man yang pamagtuman yang mga katuw̓ulan yang Dios ig pamag̓ubligar ang ultimu ilëm ti Jesus yang dapat tingaraën nirang may kalalangan tung nira.
18 Numanyan duun da nagkërëng tung binit yang bakayan.