Pag̓ëyëp Da Yang Pangyalimang Angil Yang Budyung Na (9:1-12)
9
Pagkatapus tia,
yang pangyalimang angil,
ya si kay nag̓ëyëp yang budyung na.
Pagkatapus may naitaung sasang dumakël ang nabugsung tumimpa tung katanëkan.
Pinakdulan da yang liabing ipag̓abri tung bulalut ang pinakaadalëma.
2 Pagkatapus,
dayun na ra ka man ang inabrian yang bulalut ang atii.
Pagkaabri na,
diritsyung suminiraw̓u yang taw̓uk ang puirtig damël,
ang maning pa tung taw̓uk ang pagsungaw tung urnuan ang dakulu.
Purisu nakiklëpan da yang sadlaw yang kaldaw,
pati yang palët pulus da taw̓uk yang magguyurun na natëtëngëd tung taw̓uk ang atiang durug damël ang duun manliit tung bulalut ang atii.
3 Pagkatapus may mga apan ang namansinunut tung taw̓uk ang namagkarawasak da tung sagpaw yang katanëkan.
Pinamakdulan da ta pudir nirang mamagpaningët tung mga tau ang yang dalit nira pariu tung dalit yang mga sipitan tung katanëkan.
4 Pinaglalangan da ka tanira ang indi nira ëngëd diaduën yang mga ilamunun ubin maskin unu pang ayuay,
ubin maskin unu pang luakay tung sagpaw yang kaliw̓utan.
Suluminting itinug̓ut tung nirang tigbakën,
ya ra ilëm yang mga tau ang kumpurming indi pinamarkaan yang Dios tung mga kikilayën nira.b
5 Indi ka itinug̓ut tung nirang pangimatayën,
kung indi,
papinitinsiaan da ilëm nira ta mupia tung sëlëd limang bulan.
Yang siit ang pag̓ipakdul nira tung mga taung atia,
magkapariu tung pakdul yang dalit yang mga sipitan.
6 Purisu tung sëlëd limang bulan ang atia,
anday dumang sikarën yang mga taung atia,
kung indi ang tanira mapatay ra ilëm.
Piru indi ka ëngëd matultulan nira yang pag̓asikad nira.
Maskin duru rang paglangkag nirang mapatay,
piru midyu tung panlaksuan ka ëngëd tanira yang kamatayën.
7 Dispuis pa kung tëlënganu yang mga apan ang atiang nag̓ianingu,
midyu tung mga kabayung isinimpan dang saayan yang mamanuyu tung gira.
Tung mga kulu nira midyu tung may yag susuklub ang yay pagpailala ang tanira mamandëëg da.
Yang mga ityura nira midyu tung ityura ta tau.
8 Yang mga bua nira midyu tung bua ta mga baw̓ay.
Yang mga isi nira midyu tung isi ta mga liun.
9 May mga kalub nira tung mga dëbdëb nira ang midyu tung landuk.
Dispuis kung magkayab-kayab da nganing yang mga pakpak nira,
magdarag̓unu ang pariu tung dinag̓unu yang mga dikaritun ang pag̓aguyuran yang mga kabayung nag̓apampalaksu ang para mamaningayaw ra tung girac.
10 Dispuis may ikuy nirang pariu tung ikuy ta sipitan ang may kilid na ang ya ray nag̓ipanëw̓ëk nirang nag̓ipagpapinitinsia tung mga taung atia tung sëlëd limang bulan ang atia.
11 Dispuis pa tanira may ading paggaëm tung nira ang ya ra yang sasang angil ang may kagaëman duun tung bulalut ang atii.
Yang aran na tung bitalang Hinebreo ti Abadon.
Tung bitalang Giniriego ti Apolion yang aran na ang yang kinaulug̓an na pariung Mandidiadu.
12 Kapurisu taklib da yang primirung pinanganugunan yang kanugd.
Piru kuidaw,
may durua pa ka ëngëd ang magdinasunay ang magkakaw̓ut.
Pag̓ëyëp Da Yang Pangyaënëm Ang Angil Yang Budyung Na (9:13-21)
13 Numanyan yang yaënëm ang angil,
ya si ay nag̓ëyëp yang budyung na.
Pagkatapus may nagngëlung busis ang duun liit tung ëpat nga kantuan yang midyu lamisaan ang atiang bulawan ang parataw̓ukan ta paamut tung katalungaan yang Dios.
14 Mag̓aning yang busis tung pangyaënëm ang angil ang baklung napag̓ëyëp yang budyung na,
“Panguw̓aran mu ra yang ëpat ngangilan ang yag bëw̓ëgkës duun tung binit yang subang atiang dakulu ang paggug̓uuyan ang Eufrates,”
ag̓aaning.
15 Numanyan diritsyu ra ka man ang pinalpasan yang ëpat ngangilan ang atii ug̓ud mamagpangimatay ra tung yaklung parti yang mga tau tung kaliw̓utan.
Tanira itinig̓ana kang lag̓i ang para kung kaw̓utun da nganing yang uras ang atia,
ya ray ipaglua nira ang yang takun na may yang bulan na may yang kaldaw na may yang uras na ya ra kang lag̓i ay ipinagtipu yang Dios.
16 Dispuis may mga kaarumanan ka nirang mga sundalung mga manigsaay tung kabayu.
Nagngëlu yang kinadakël nira ang duruang gatus ang milyun (200,000,000).
17 Numanyan tung ipinadakat ang atii tung panëlëngu,
naitaw ra yang pagkarabëtangën yang mga kabayu may yang pamagsaay ang maning taa.
Parariung may mga lakub tung mga dëbdëb nirang taluklung gëlëng-gëlëng na ang taluklu kang kulay na.
Yang kulay yang sam bilug ang gëlëng-gëlëng na apuy-apuyan,
yang kulay yang sam bilug kuruglawën ig yang sam bilug madulaw.
Yang mga kabayung pag̓asaayan nira,
yang kulu nira midyu tung kulu ta liun.
Dispuis pa,
yang nag̓iunsad nira apuy may taw̓uk may yang pag̓aningën ang asupri.
18 Kapurisu tung tulung parti yang mga tau tung kaliw̓utan,
nagkarapatay ra yang sam parti ay natëtëngëd tung tulung sarut ang atiang apuy may taw̓uk may yang pag̓aningën ang asupri ang ipinag̓unsad yang mga kabayu.
19 Kinayanan nira tia ay natëtëngëd bëlag̓an ilëm yang mga nganga nira ay nag̓ipagdali nira tung mga tau,
kung indi,
pati mga ikuy nira ya ka.
Ay kipurki yang mga ikuy nira midyu tung iraw ang yang kampus na may kulu na ka ang ya ray nag̓ipangëg̓ët nira tung mga taung papinitinsiaan.
20 Piru yang kadaklan ang mga taung indi nagkarapatay tung mga sarut ang atia,
bëlag ya mamamlëk tung mga bultung atiang binuat-buat ka ilëm ta mga kalima nira,
ya mamagpadayun tung pagturuuën nira tung mga dimunyu ang ya ka man ay pamag̓ërëkëlën tung pagturuuën nira tung mga bultu ang sari-saring bag̓ay ang pinaggamit ang katulad ka tung bulawan ubin landuk ang salapi ubin saway ubin batu ubin ayu.
Ang pagkatapus indi ka ilëm maita,
indi ka ilëm magngël,
indi ka ilëm mapanaw.
21 Yang mga ubra-ubra yang mga taung atia,
indi ka ëngëd nira pinanlignaan ang katulad tung pangimatay nira tung mga masigkatau nira may tung paggaramitën nira yang kinatakwanan nirang liit tung indi nag̓aita may tung pangumbaw̓ay nira ubin pangunlalii,
may tung pagtarakawan nira.