Natëtëngëd Tung Pag̓arampuën Yang Mga Tauan Yang Dios Ang Tuw̓alën Na Ang Ya Ra Yang Magkarainabu Kung Ëyëpën Da NGaning Yang Pitu NGa Budyungan (8:1-5)
8
Numanyan atiing pagkaukab da yang pag̓aningën ang karniru yang yapitung ikinula tung kasulatan ang naang yag lululun,
andang pisan ay iw̓ëk-iw̓ëkën yang intirung kalangitan tung sëlëd yang tënga tung urasa.
2 Numanyan may naitaw sing pitu ngangilan ang yay pinakaabwat tung tanan ang mga angil.
Ya ra yang këmdëngan ang pirmi tung katalungaan yang Dios.
Numanyan sasa may sasa tung nira pinamakdulan da ta anya-anyang budyungb.
3 Pagkatapus may sam bilug pang angil ang lumimput ang asan da nanalunga tung midyu lamisaan ang bulawan ang may mga bala ta apuy tung sagpaw nac May nag̓apëgsan nang midyu karag̓ay ang gësyë ang bulawan ka ang yay parabtangan ta mga bala may paamut.
Numanyan dayun dang pinakdulan ta duru-durung paamut ang para ipataw̓uk na tung midyu lamisaan ang atia ang asan agbëbtang tung katalungaan yang pagkarungan yang Dios.
Ay ipagngan na yang pagpataw̓uk na tung pag̓arampuën yang tanan ang mga taung kumpurming binuat da yang Dios ang mga tauan nad.
4 Purisu numanyan dërëngan dang napaabwat tung katalungaan yang Dios yang taw̓uk yang paamut ang atiang nag̓ipataw̓uk yang angil tung midyu tung karag̓ay ang atiang nag̓apgësan na may yang pag̓arampuën yang mga tauan yang Dios.
5 Simanyan yang midyu karag̓ay ang atiang bulawan ang nag̓apgësan na ya ray pinunukan na ta mga balang ingkëlan na tung midyu lamisaan ang atiang parataw̓ukan ta paamut.
Pagkatapus ya ra ibukbukay nang ipinabungsad tung katanëkan.
Atii nag̓intra ra kidlat ang ya rag papabugsuk may duldul ang paglëlpakën ang nunut da ka ta yëgyëg yang kaliw̓utane.
Yang Nagkarainabu Tung Pag̓ëyëp Tung Ëpat NGa Budyungan (8:6-13)
6 Pagkatapus yang pitu ngangilan ang atiang karampëd ta budyung,
namagsimpan dang magbërëlës ang mag̓ëyëp tung anya-anyang budyung.
7 Numanyan yang primirung angil,
inëyëpan na ra yang budyung na.
Pagkatapus may mga yilung mabiw̓ilug ang diritsyung nagkarabungsad tung katanëkan ang nunut da ka ta apuy ang naglalakëtan da ka ta dug̓u.
Purisu tung tulung parti yang kaliw̓utan,
nasiruk da yang sam parti,
pati mga ayu na asta mga ilamunun,
damay ra kang nagkarasiruk.
8 Pagkatapus tia,
yang pangyadwang angil,
ya si kay nag̓ëyëp yang budyung na.
Pagkaëyëp na,
may sasang mag̓abukid ang makbu ang pag̓apuy ang ipinlëk da tung tëëb.
Pagkatapus tung tulung parti yang tëëb,
yang sam parti nag̓imu rang dug̓uf.
9 Purisu tung tanan ang nag̓abui tung tëëb,
sam parti ka yang nagkarapatay.
Pati yang mga salaayan ang pantëëb,
sam parti ra ka yang nagkaradiadu.
10 Pagkatapus tia,
yang pangyaklung angil,
ya si kay nag̓ëyëp yang budyung na.
Pagkatapus may dumakël ang durug dakul ang paglig̓arang ang ya ray nataktak ang tumimpa tung yaklung parti yang mga bawang may mga waing tubdun.
11 Yang aran yang dumakël ang atia ay “Mapakit”.
Purisu pagtëpa na tung mga wai,
tung tulung parti,
yang sam parti nagpakit da.
Purisu dakëlëng mga taung nagkarapatay natëtëngëd tung waing nagkarainëm nirang nagpakit da.
12 Pagkatapus tia,
yang pangyaëpat ang angil,
ya si kay nag̓ëyëp yang budyung na.
Pagkatapus may sasang suminakëp da tung kaldaw may tung bulan may tung mga dumakël.
Yang pinakaw̓ut na,
tung tulung parti yang uras ang dati-rating nag̓ipagpasadlaw nira,
nagkarabuinan da ta salëgsang parti.
Bilang tung sëlëd mag̓apun,
tung tulung parti yang uras na,
yang sam parti makiklëp dang pisan ig tung sëlëd magdamal,
ya kag.
13 Numanyan pagkatingaraw,
may naitaung sasang kanug ang paglayug-layug duun tung pamilat-pilatan.
Nagngëlung pagkëkëndalën ang mag̓aning,
“Kanugun,
kanugun,
kanugun!
Kipurki kung magkaradëngël da nganing yang tunul yang mga budyung ang dapat ëyëpën yang mga angil ang tulu pang magdarasun,
talagang kanugun da ka man ang pisan yang mga taung pamagtinir tung kaliw̓utan ang kumpurming pagpaguyud tung sistima nang balaw̓ag ang pisan tung kalëlyag̓an yang Dios,”
ag̓aaning.